स्कन्दप्रोक्तं शिवमहिमावर्णनम् १
(शिवरहस्यान्तर्गते भीमाख्ये)
स्कन्द (उवाच)
स गौरीहृदयानन्द आनन्दाम्बुनिधिः स्वयम् ।
भक्त्या भक्तैः स्तुतो नित्यं वेदवेद्यो महेश्वरः ॥ १०॥
ददाति मोक्षसाम्राज्यं प्राज्यं देवशिखामणिः ।
राज्यं वा शिवभक्तानां मन्नामाज्यप्लुतं सदा ॥ ११॥
वाणीपतेरयं प्रादाद्वेदजालं कृपाबलात् ।
शर्वाणीपतिरेवाथ चारुचन्द्रलसच्छिराः ॥ १२॥
रमारमणहारीशः स गौरीरमणो हरः ।
ददात्येव हि भक्तेषु शाम्भवेषु कृपावशात् ॥ १३॥
स एव गीयते वेदैर्वेदान्तैरपि शङ्करः ।
स एव सर्वदेवेशो मृत्युञ्जय उमापतिः ॥ १४॥
स एव भगवाञ्छम्भुः श्रुतश्चाथर्वणे शिवः ।
यस्यैश्वर्यस्य नान्तोऽस्ति सर्वगः सर्वदा प्रभुः ॥ १५॥
यद्ध्यानेन परा मुक्तिः सुलभा शाम्भवोत्तमे ।
स गौरीरमणो देवः कालकामान्धनाशनः ॥ १६॥
स तु मृत्युञ्जयो नित्यमपारविभवाश्रयः ।
यस्य प्रसादलेशेन विष्णुब्रह्मेन्द्रपूर्वकाः ॥ १७॥
धिष्टितानि वृताः सर्वे शिपिविष्टपदार्चकाः ।
उदारतरगम्भीरो भवमायामलापहः ॥ १८॥
सर्वदुःखहरो देवो रुद्रो वै नीललोहितः ।
य एनं विदुरीशानममृतास्ते सदा मुने ॥ १९॥
अथेतरे दुःखमेव प्राप्नुवन्ति पदे पदे ।
यस्य वामाङ्कगा देवी या सा सर्वेश्वरी शिवा ॥ २०॥
यन्मायया मोहिता वै ब्रह्मेन्द्राश्चाप्यधोक्षजः ।
यस्याः प्रसादलेशेन न जानन्ति महेश्वरम् ॥ २१॥
स्वात्मानं सर्वगं शान्तं सच्चिन्मयमुमाधवम् ।
यस्य पुत्रो गणाधीशः सर्वविघ्ननिवारकः ॥ २२॥
यस्य पुत्रोऽहमेवाद्य साक्षाज्ज्ञानात्मको मुने ।
यस्य नन्द्यादयो विप्रगणः शाङ्करपुङ्गवाः ॥ २३॥
यस्य धर्मो महाबाहो युगपादोऽमितद्युतिः ।
यस्याष्टमूर्तिभिर्व्याप्तं जगदेतच्चराचरम् ॥ २४॥
यस्य लिङ्गं सदा कालं पूजयन्ति मरुद्गणाः ।
बलप्रमथनं साम्बं भक्तसंसारमोचकम् ॥ २५॥
कारणं जगतामीशमानन्दघनमद्वयम् ।
यो वै रुद्रो महादेवः शङ्करः शशिशेखरः ॥ २६॥
यो वै रुद्रो महादेवः भूतं भव्यं भवज्जगत् ।
विश्वं भूतं च भवनं विचित्रं स हि शङ्करः ॥ २७॥
भीमो रुद्रो महेशानो गीतश्रुतिषु स स्थिरः ।
सर्वाभयप्रदो विप्रो विश्वाधिक उमासखः ॥ २८॥
पतित्वेन स्तुतो वेदैः सर्वेषामेव शङ्करः ।
भयापहोऽयं भक्तेषु शाम्भवेषु महात्मसु ॥ २९॥
सर्वोपास्यो ह्यमेयात्मा सर्वेषां हृदयान्तरः ।
सर्वभूतगुहावासो वासिताजगतां त्रये ॥ ३०॥
ईशावास्यमिदं सर्वं जगत् त्रिभुवनात्मकम् ।
यस्य रूपं च पृथिवी सूर्यचन्द्रमसौ मुने ॥ ३१॥
पृथिवीदेवताः सर्वा न विदन्ति महेश्वरम् ।
प्रियोऽयं सर्वभूतेषु नास्त्यस्माज्जगदेव हि ॥ ३२॥
॥ इति शिवरहस्यान्तर्गते स्कन्दप्रोक्तं शिवमहिमावर्णनं १ सम्पूर्णम् ॥
- ॥ श्रीशिवरहस्यम् । भीमाख्यः अष्टमांशः । अध्यायः ३ । १०-३२॥
- .. shrIshivarahasyam . bhImAkhyaH aShTamAMshaH . adhyAyaH 3 . 10-32..
Notes:
Skanda स्कन्द expresses about ŚivaMahimā शिवमहिमा while speaking to Jaigīṣavya जैगीषव्य.
Proofread by Ruma Dewan