सुदतिप्रोक्तं शिवार्चनोपदेशम्
(शिवरहस्यान्तर्गते उग्राख्ये)
शिवार्चनं कुरुष्वाद्य शिवस्तुष्टो भविष्यति ।
व्यङ्गापि शिवपूजा सा कालेन फलदा ध्रुवम् ॥ ३९१॥
साङ्गा चेच्छिवपूजा सा सद्यः सर्वफलप्रदा ।
साङ्गं यः कुरुते भक्त्या शिवलिङ्गार्चनं सुत ॥ ३९२॥
स धर्मादिफलाध्यक्षो भवत्येव न संशयः ।
यः पूजयति गौरीशं लिङ्गरूपिणमव्ययम् ॥ ३९३॥
तमेवातिप्रयत्नेन सौभग्यमनुधावति ।
यतः शिवार्चनफलं भुक्तिर्मुक्तिश्च शाश्वती ॥ ३९४॥
सर्वदेवोत्तमः साम्बो भुक्तिमुक्तिफलप्रदः ।
अपारकरुणासिन्धुर्दीनबन्धुस्तमर्चय ॥ ३९५॥
कालत्रयेऽपि दुःखानि न शिवार्पितचेतसाम् ।
अतो विधिवदाराध्यमाराधय महेश्वरम् ॥ ३९६॥
महेश्वरश्च दुःखानि न नाशयति ते सदा (चेत्तव) ।
कः समर्थोऽपरो देवस्तव दुःखनिवारणे ॥ ३९७॥
सर्वेषामपि दुःखानि विनाशयति शङ्करः ।
स किं त्वदीयदुःखानि न नाशयति शङ्करः
(शम्भुर्नोनशयिष्यति) ॥ ३९८॥
शङ्करः शङ्करो यस्मादतः शं ते प्रयच्छ(दास्य)ति ।
शङ्करं सावधानेन समाराधय सादरम् ॥ ३९९॥
विश्वासं कुरु श्रुत्युक्ते शिवलिङ्गार्चने सुत ।
गर्भवासादिदुःखानि यान्यनन्तानि मे सुत ॥ ४००॥
कदापि न भविष्यन्ति श्रीमृत्युञ्जयपूजनात् ।
कुरु विश्वस्य सततं शिवलिङ्गार्चनं मुदा ॥ ४०१॥
विश्वस्य भावितभवाः शम्भुं भक्त्याऽर्चयन्ति ये ।
प्राप्नुवन्ति न ते भूयो योनिचक्रं दुरासदं (सुदुर्भगम्) ॥ ४०२॥
अयं सुत मदुक्तार्थः श्रुत्युक्तार्थो न संशयः ।
शिवलिङ्गार्चने नित्ये स्वेष्टदे श्रुतिचोदिते ॥ ४०३॥
विश्वासो न भवेद्यस्य स महापातकी ध्रुवम् ।
महापातकयुक्तानां पापिनां दुष्टचेतसाम् ॥ ४०४॥
न भविष्यति विश्वासः कृतकर्मानुसारतः ।
यस्य ग्रहा भविष्यन्ति प्रतिकूला दुराग्रहाः ॥ ४०५॥
तस्य नश्यति विश्वासः शिवलिङ्गार्चने ध्रुवम ।
शिवलिङ्गार्चने यस्य विश्वासः श्रुतिचोदिते ॥ ४०६॥
स सर्वशो भुक्ति(क्त)भोगः प्रयाति शिवसन्निधिम् ।
अनुकूला ग्रहा यस्यानुग्रहाद्गिरिजापतेः ॥ ४०७॥
॥ इति शिवरहस्यान्तर्गते सुदतिप्रोक्तं शिवार्चनोपदेशं सम्पूर्णम् ॥
- ॥ श्रीशिवरहस्यम् । उग्राख्यः सप्तमांशः । अध्यायः २८ मध्यार्जुनमहिमानुवर्णनम् । ३९१-४०७॥
- .. shrIshivarahasyam . ugrAkhyaH saptamAMshaH . adhyAyaH 28 madhyArjunamahimAnuvarNanam . 391-407..
Notes:
Sudati सुदति delivers Upadeśa उपदेश to her son about merits of worshiping Śiva शिव.
Proofread by Ruma Dewan