वेदपुरुषप्रोक्तं शिवतत्त्वोपदेशम्
(शिवरहस्यान्तर्गते उग्राख्ये)
वेदपुरुषः
यो वेदादौ स्वरः प्रोक्तो वेदान्ते च प्रतिष्ठितः ।
तस्य प्रकृतिलीनस्य यः परः स महेश्वरः ॥ ३९९॥
नान्यो महेश्वरो ज्ञेयो रूढ एव स शङ्करः ।
स परः सर्वदेवेषु द्विजा ध्येयः स एव हि ॥ ४००॥
सर्वकर्ता सर्वसाक्षी शिव एव महेश्वरः ।
सत्यमेतत्पुनः सत्यमुद्धृत्य भुजमुच्यते ॥ ४०१॥
सर्वश्रुतिश्रुतो नित्यः साम्ब एव महेश्वरः ।
सत्यमेतत्पुनः सत्यमुद्धृत्य भुजमुच्यते ॥ ४०२॥
सर्वश्रुतिश्रुतो नित्योः रुद्र एव महेश्वरः ।
सत्यमेतत्पुनः सत्यमुद्धृत्य भुजमुच्यते ॥ ४०३॥
सर्वश्रुतिश्रुतो नित्यः सोम एव महेश्वरः ।
सत्यमेतत्पुनः सत्यमुद्धृत्य भुजमुच्यते ॥ ४०४॥
सर्वश्रुतिश्रुतो नित्यस्त्र्यक्ष एव महेश्वरः ।
सत्यमेतत्पुनः सत्यमुद्धृत्य भुजमुच्यते ॥ ४०५
सर्वश्रुतिश्रुतो नित्यः स्थाणुरेव महेश्वरः ।
सत्यमेतत्पुनः सत्यमुद्धृत्य भुजमुच्यते ॥ ४०६॥
सर्वश्रुतिश्रुतो नित्यः शम्भुरेव महेश्वरः ।
सत्यमेतत्पुनः सत्यमुद्धृत्य भुजमुच्यते ॥ ४०७॥
सर्वश्रुतिश्रुतो नित्यः शर्व एव महेश्वरः ।
सत्यमेतत्पुनः सत्यमुद्धृत्य भुजमुच्यते ॥ ४०८॥
सर्वश्रुतिश्रुतो नित्यो भव एव महेश्वरः ।
सत्यमेतत्पुनः सत्यमुद्धृत्य भुजमुच्यते ॥ ४०९॥
सर्वश्रुतिश्रुतो नित्यः उग्र एव महेश्वरः ।
सत्यमेतत्पुनः सत्यमुद्धृत्य भुजमुच्यते ॥ ४१०॥
प्राग्विश्वाधिको रुद्रो विश्वं विष्ण्वादिकं जगत् ।
न रुद्रादधिकः कोऽपि तस्मात्स पर उच्यते ॥ ४११॥
यः सोमोऽजनयद्विष्णुं स विष्णोरधिकस्ततः ।
विष्ण्वादिजनकः सोमः सर्वदेवाधिको ध्रुवम् ॥ ४१२॥
यो वै रुद्रः स भगवानन्यो न भगवान्ध्रुवम् ।
सत्यमेतत्पुनः सत्यमुद्धृत्य भुजमुच्यते ॥ ४१३॥
ध्येयो मुक्त्यर्थिभिर्नित्यं शिव एकः शिवङ्करः ।
सत्यमेतत्पुनः सत्यमुद्धृत्य भुजमुच्यते ॥ ४१४॥
निधनेत्यादिभिः कार्यं शिवलिङ्गार्चनं द्विजैः ।
शिवलिङ्गस्वरूपेण यतस्तिष्ठति शङ्करः ॥ ४१५॥
शिवस्यैवार्चनं कार्यं लिङ्गरूपस्य वैदिकैः ।
अन्यथा नरकं यान्ति सत्यमेवोच्यते मया ॥ ४१६॥
यो वै रुद्रः स भगवान् स विश्वाधिक उच्यते ।
महेश्वरः स एवेति ज्ञात्वा पूज्यो महेश्वरः ॥ ४१७॥
महेश्वरमुमाकान्तमनन्यसदृशं प्रभुम् ।
योऽन्यतुल्यतया वेत्ति स चण्डाल इति स्मृतः ॥ ४१८॥
ईशानः सर्वविद्यानामित्याद्यैर्वचनैर्मया ।
ध्येयः शङ्कर एवेति निश्चितं बहुधा पुरा ॥ ४१९॥
॥ इति शिवरहस्यान्तर्गते वेदपुरुषप्रोक्तं शिवतत्त्वोपदेशं सम्पूर्णम् ॥
- ॥ श्रीशिवरहस्यम् । उग्राख्यः सप्तमांशः । अध्यायः २४। ३९९-४१९॥
- .. shrIshivarahasyam . ugrAkhyaH saptamAMshaH . adhyAyaH 24 . 399-419..
Proofread by Ruma Dewan