विष्णुप्रोक्तं शिवार्चनोपदेशम् १
(शिवरहस्यान्तर्गते उग्राख्ये)
- ब्रह्माविष्णुसंवादे -
शिवपूजां विना नान्यद्विहितं मोक्षकारणम् ।
धर्मार्थकाममोक्षाणां साधनं शिवपूजनम् ॥ ४७॥
यः शं करोति सर्वेषां स्मृतः सम्पूजितः प्रभुः ।
स शङ्करः पूजनीयो नियमेनान्वहं मुदा ॥ ४८॥
य शिवो मङ्गलाजानिः विधत्ते मङ्गलं नृणाम् ।
स एव शङ्करस्तस्मात्तस्यैवाभ्यर्चनं वरम् ॥ ४९॥
शङ्करं योऽर्चयेन्नित्यं त्रिकालं सर्वसाधनैः ।
शङ्करः शं करोत्येव प्रीतस्तन्नियमात्प्रभुः ॥ ५०॥
संसारसागरं तर्तुं तरिर्नामैव शाङ्करम् ।
नान्यनाम तथाऽसारघोरसंसारतारकम् ॥ ५१॥
शाङ्करं नाम विमलमिष्टार्थफलदं विधे ।
तन्नाम मुक्तिदं भव्यं संसारभयनाशकम् ॥ ५२॥
शङ्करस्मरणं नित्यं तथा शङ्करपूजनम् ।
इहामुत्रार्थलाभाय कर्तव्यं नित्यकर्मवत् ॥ ५३॥
तत्त्यागे तु भवत्येव प्रवेशो निरये नृणाम् ।
कृताद्येषु च सर्वेषु युगेषु भवमुक्तये ॥ ५४॥
पूजनीयो महादेवो ब्राह्मणैश्च सुरासुरैः ।
हरः स्मरहरो ब्रह्मन्घोरसंसारतारकः ॥ ५५॥
हृतः स्मरो महेशेन स संसारप्रवर्तकः ।
परं त्वव्यभिचारेण भक्तिः कार्या महेश्वरे ॥ ५६॥
सा नाशयति संसारं भक्तिरव्यभिचारिणी ।
यथा पतिव्रता शुद्धा नान्यं कामयते तथा ॥ ५७॥
शाङ्करः शङ्करादन्यं नार्चयत्येव सर्वथा । ५८.१
॥ इति शिवरहस्यान्तर्गते विष्णुप्रोक्तं शिवार्चनोपदेशं १ सम्पूर्णम् ॥
- ॥ श्रीशिवरहस्यम् । उग्राख्यः सप्तमांशः । अध्यायः २०। ४७-५८.१॥
- .. shrIshivarahasyam . ugrAkhyaH saptamAMshaH . adhyAyaH 20 . 47-58.1..
Notes:
Viṣṇu विष्णु gives Upadeśa उपदेश to Brahmā ब्रह्मा about several merits of worshiping Śiva शिव, especially Mokṣa मोक्ष.
Proofread by Ruma Dewan