विष्णुप्रोक्तं शिवार्चनोपदेशम् ३
(शिवरहस्यान्तर्गते उग्राख्ये)
विष्णुरुवाच
सर्ववेदश्रुतं पुण्यं ज्ञानवैराग्यदं नृणाम् ।
शिवलिङ्गार्चनं कार्यं मुक्त्यर्थं भस्मभूषणैः ॥ ११॥
महादेवार्चनं ब्रह्मन् चतुर्वर्गफलप्रदम् ।
तत्फलं प्राप्यते सर्वैः शङ्करस्यैव पूजया ॥ १२॥
शङ्कराराधनं येन न कृतं सावधानतः ।
स दुर्भगो दुराचारो दुर्बुद्धिश्च न संशयः ॥ १३॥
यावन्तो दुभङ्गाः सन्ति दरिद्राश्च कुरूपिणः ॥
ते त्यक्तशाङ्कराचाराः सम्त्यक्तशिवपूजनाः ॥ १४॥
न येन पूज्यते देवः शङ्करः प्रत्यहं मुदा ।
तेन सम्प्राप्यते दुःखं यातना च तनुव्यये ॥ १५॥
भूतं भव्यं भविष्यच्च भाग्यं यस्य भविष्यति ।
तस्यैव मुक्तिर्भवति भवानीप्राणवल्लभे ॥ १६॥
भगवान् भगविध्वंसी भवानि प्राणवल्लभे ।
भूरिभाग्यप्रभावेण भाव्यते भुवि भावुकैः ॥ १७॥
अशैवकृतकर्माणि वेदोक्तान्यपि पद्मज ।
वृथा भवन्ति सर्वाणि पातकं प्रत्युताधिकम् ॥ १८॥
अशैवैर्वेदिकं कर्म न कर्तव्यं कदाचन ।
अशैवानां वैदिकेषु न कर्मस्वधिकारिता ॥ १९॥
अशैवो यत्कुले जातः तत्तु दुष्कर्मसङ्कुलम् ।
सम्पादनीया यत्नेन शिवभक्तिस्तपोबलात् ॥ २०॥
शैवभक्तिर्मुक्तिदात्री या भक्तिः स्यादनन्यगा ।
किमश्वमेधयागाद्यैः विसृष्टान्नैः सुदक्षिणैः ॥ २१॥
यदि न स्यान्महादेवे भक्तिरव्यभिचारिणी ।
किमत्युत्तमगोदानेर्बहुभिर्भूरिदक्षिणैः ॥ २२॥
यदि न स्यान्महादेवे भक्तिरव्यभिचारिणी ।
किमन्नदानैः किं तीर्थैः किं तपोभिरनुत्तमैः ॥ २३॥
यदि न स्यान्महादेवे भक्तिरव्यभिचारिणी ।
येन ध्यातो महादेवः क्षणं वा सावधानतः ॥ २४॥
तेन धर्माः कृतास्सर्वे सर्वदा सावधानतः ।
स भाग्यवान् स पुण्यात्मा स तपोनिधिरात्मवान् ॥ २५॥
योऽनन्यशरणो नित्यं पूजयेत्पार्वतीपतिम् ।
स कुलीनः स विद्यावान् स सर्वगुणसंश्रयः ॥ २६॥
योऽनन्यशरणो नित्यं पूजयेत्पार्वतीपतिम् ।
स सर्वयोगनिरतः स समाधियुतः सदा ॥ २७॥
योऽनन्यशरणो नित्यं पूजयेत्पार्वतीपतिम् ।
स सर्वज्ञः स पूतात्मा स तत्वज्ञः स धर्मवित् ॥ २८॥
योऽनन्यशरणो नित्यं पूजयेत्पार्वतीपतिम् ।
स बुद्धिमान स नीतिज्ञः स विद्वान् पण्डितोत्तमः ॥ २९॥
योऽनन्यशरणो नित्यं अर्चयेत् पार्वतीपतिम् ।
कृतानि भूरि दानानि ग्रहणे चन्द्रसूर्ययोः ॥ ३०॥
तस्यैवानन्यगा भक्तिर्भवति श्रीमहेश्वरे ।
ये सन्ततं भविष्यन्ति दग्धसंसारवासनाः ॥ ३१॥
तेषामनन्यगा शुद्धा शिवे भक्तिः प्रजायते । ३२.१
॥ इति शिवरहस्यान्तर्गते विष्णुप्रोक्तं शिवार्चनोपदेशं ३ सम्पूर्णम् ॥
- ॥ श्रीशिवरहस्यम् । उग्राख्यः सप्तमांशः । अध्यायः २६ कुम्भघोणमहिमानुवर्णनम् । ११-३२.१॥
- .. shrIshivarahasyam . ugrAkhyaH saptamAMshaH . adhyAyaH 26 kumbhaghoNamahimAnuvarNanam . 11-32.1..
Proofread by Ruma Dewan