विष्णुप्रोक्तं शिवार्चनोपदेशम् ५
(शिवरहस्यान्तर्गते उग्राख्ये)
विष्णुः (उवाच)
विश्वं च भुवनं चित्ते त-
ज्जातं भूयो जायमानं च भूयः ।
एतत्सर्वं रुद्र एवेति मत्वा
भूयो भूयः पूज्यमानो (पूजनीयो) महेशः ॥ ३८६॥
सर्वं रुद्रं मत्वा सर्वभावेन सर्वं
सर्वाशास्यं निर्गुणं निष्कलं च ।
ससेवन्ते साधवः सर्वथा नो
भूयो भूयः पूजनीयो महेशः ॥ ३८७॥
रुद्रः सर्वं रुद्र एकत्वमाहुः
एको रुद्रो न द्वितीयाय तस्थे ।
नेशादन्यत्किञ्चिदस्तीति नित्यं
भूयो भूयः पूजनीयो महेशः ॥ ३८८॥
यं वेदान्ता नैव जानन्ति सिद्धा
यं योगीन्द्रा नैव जानन्ति विप्राः ।
तं चिद्रूपं ज्ञातुमिच्छत्यतो वा
यो यं ज्ञात्वैवामृतत्वं प्रयाति ॥ ३८९॥
यो निर्लिप्तो निर्गुणोऽपि त्रिणेत्रो
यो निर्बाहुः स्वर्णबाहुः स्वतन्त्रः ।
यो नीरूपः स्वर्णरूपः स एव
भूयो भूयः पूजनीयो महेशः ॥ ३९०॥
निर्गुणोऽपि स्वर्णवर्णो य आसी-
द्योवाऽरूपोऽप्यम्बिकानाथ आसीत् ।
देवाधीशः सोऽयमज्ञेयतत्वो
भूयो भूयः पूजनीयो महेशः ॥ ३९१॥
यस्येच्छातोऽस्माकमुत्पत्तिरासो-
द्यस्येच्छातो जायते रक्षणं च ।
यस्येच्छातो भाविनाशः स नित्यो
भूयो भूयः पूजनीयो महेशः ॥ ३९२॥
यस्माद्भीतो वाति वायुः सदायं
यस्माद्भीतो(त्यो)देति सूर्योऽपि नित्यम् ।
यस्माद्भीतो (वह्निमुख्या) वीतिहोत्रेन्द्रमुख्या
भूयो भूयः पूजनीयो महेशः ॥ ३९३॥
यस्यार्चातो लभ्यते सर्वपृथ्वी
यस्यार्चातो लभ्यते मोक्षलक्ष्मीः ।
यस्यार्चातोऽनेकधर्माद्यसिद्धिः
सोऽयं शम्भुः पूजनीयोऽनिशं च ॥ ३९४॥
॥ इति शिवरहस्यान्तर्गते विष्णुप्रोक्तं शिवार्चनोपदेशं ५ सम्पूर्णम् ॥
- ॥ श्रीशिवरहस्यम् । उग्राख्यः सप्तमांशः । अध्यायः २६ कुम्भघोणमहिमानुवर्णनम् । ३८६-३९७॥
- .. shrIshivarahasyam . ugrAkhyaH saptamAMshaH . adhyAyaH 26 kumbhaghoNamahimAnuvarNanam . 386-397..
Notes:
Viṣṇu विष्णु delivers Upadeśa उपदेश (to Deva-s देवाः) about the OmniPresence of Rudra रुद्र in this Universe and worshiping Maheśa-Śambhu-Śiva महेश-शम्भु-शिव.
Proofread by Ruma Dewan