यजुर्वेदप्रोक्ता शिवस्तुतिः
(शिवरहस्यान्तर्गते उग्राख्ये)
यजुर्वेद उवाच
अणोरणीयान्महतो महीया-
नात्मा गुहायां निहितोऽस्य जन्तोः ।
तमक्रतुं पश्यति वीतशोको
धातुः प्रसादान्महिमानमीशम् ॥ ६१॥
ऋतं सत्यं परं ब्रह्म पुरुषं कृष्णपिङ्गलम् ।
ऊर्ध्वरेतं विरूपाक्षं विश्वरूपं वदाम्यहम् ॥ ६२॥
हिरण्यबाहुमीशानं हिरण्यपतिमव्ययम् ।
भस्म धृत्वा ललाटादौ भजध्वं वृषभध्वजम् ॥ ६३॥
अम्बिकापतिमव्यक्तमुमापतिमनामयम् ।
भस्म धृत्वा ललाटादौ भजध्वं वृषभध्वजम् ॥ ६४॥
रुद्रं पशुपति स्थाणुमाद्यन्तरहितं शिवम् ।
भस्म धृत्वा ललाटादौ भजध्वं वृषभध्वजम् ॥ ६५॥
अनन्तमप्रतीकारमपरावृत्ततेजसम् ।
भस्म धृत्वा ललाटादौ भजध्वं वृषभध्वजम् ॥ ६६॥
आनन्दमयमीशानमद्वैतं निष्कलं प्रभुम् ।
भस्म धृत्वा ललाटादौ भजध्वं वृषभध्वजम् ॥ ६७॥
निर्गुणं निर्मलं शुद्धं निरवद्यं निरञ्जनम् ।
भस्म धृत्वा ललाटादौ भजध्वं वृषभध्वजम् ॥ ६८॥
शान्तं प्रसन्नवदनमुमासंश्लिष्टविग्रहम् ।
भस्म धृत्वा ललाटादौ भजध्वं वृषभध्वजम् ॥ ६९॥
उग्रं भीमं भवं शर्वं भक्तसर्वप्रदं हरम् ।
भस्म धृत्वा ललाटादौ भजध्वं वृषभध्वजम् ॥ ७०॥
महेशं शङ्करं शम्भुं शरणागतवत्सलम् ।
भस्म धृत्वा ललाटादौ भजध्वं वृषभध्वजम् ॥ ७१॥
भगवन्तमुमाकान्तमनन्तमपराजितम् ।
भस्म धृत्वा ललाटादौ भजध्वं वृषभध्वजम् ॥ ७२॥
विश्वेश्वरं महादेवं त्रियम्बकमजं शिवम् ।
भस्म धृत्वा ललाटादौ भजध्वं वृषभध्वजम् ॥ ७३॥
त्रिपुरान्तकमाराध्यमाराधकवरप्रदम् ।
भस्म धृत्वा ललाटादौ भजध्वं वृषभध्वजम् ॥ ७४॥
त्रिकाग्निकालं साकरं निराकारं सुमङ्गलम् ।
भस्म धृत्वा ललाटादौ भजध्वं वृषभध्वजम् ॥ ७५॥
कालाग्निरुद्रं कामारिं कालकूटविषादनम् ।
भस्म धृत्वा ललाटादौ भजध्वं वृषभध्वजम् ॥ ७६॥
नीलकण्ठं भस्मभूषं सर्वेश्वरमकल्मषम् ।
भस्म धृत्वा ललाटादौ भजध्वं वृषभध्वजम् ॥ ७७॥
सदाशिव शिवाकारं महादेवमुमापतिम् ।
भस्म धृत्वा ललाटादौ भजध्वं वृषभध्वजम् ॥ ७८॥
ईशानं सर्वविद्यानां सर्वविद्याप्रदं सदा ।
भस्म धृत्वा ललाटादौ भजध्वं वृषभध्वजम् ॥ ७९॥
ईश्वरं सर्वभूतानां ब्रह्माधिपतिमक्षयम् ।
भस्म धृत्वा ललाटादौ भजध्वं वृषभध्वजम् ॥ ८०॥
ब्रह्मणोऽधिपतिं देव परब्रह्म शिवात्मकम् ।
भस्म धृत्वा ललाटादौ भजध्वं वृषभध्वजम् ॥ ८१॥
विश्वतश्चक्षुषं देवं विश्वतोमुखमव्ययम् ।
भस्म धृत्वा ललाटादौ भजध्वं वृषभध्वजम् ॥ ८२॥
विश्वतो बाहुमव्यक्तं विश्वतः पादमक्षरम् ।
भस्म धृत्वा ललाटादौ भजध्वं वृषभध्वजम् ॥ ८३॥
समस्तहेतुमाशास्यं सोमं सोमार्धशेखरम् ।
भस्म धृत्वा ललाटादौ भजध्वं वृषभध्वजम् ॥ ८४॥
भजध्वं श्रीमहादेवं चतुर्वर्गफलप्रदम् ।
हरिं हरन्तं श्रीरुद्रं विश्वस्येशानमव्ययम् ॥ ८५॥
भजध्वं मुनयो नित्यं त्यक्त्वान्यामरपूजनम् ।
भ्रमं त्यक्त्वा भवन्तस्तु भवानीरमणं प्रभुं ॥ ८६॥
भगवन्तं भवारातिं भजध्वमभयप्रदम् ॥ ८७॥
॥ इति शिवरहस्यान्तर्गते यजुर्वेदप्रोक्ता शिवस्तुतिः सम्पूर्णा ॥
- ॥ श्रीशिवरहस्यम् । उग्राख्यः सप्तमांशः । अध्यायः २२। ६१-८७॥
- .. shrIshivarahasyam . ugrAkhyaH saptamAMshaH . adhyAyaH 22 . 61-87..
Proofread by Ruma Dewan