गणेश्वरकृतं सुब्रह्मण्यस्तवः
(शिवरहस्यान्तर्गते ईशाख्ये)
गणेश्वर उवाच ।
श्रीमच्चन्द्रकलाधरात्मजमजं श्रृङ्गारशोभाकृतिं
गौरीपीनघनस्तनामितपयः सारज्ञमज्ञासनम् ।
अम्भोजप्रभवाभिमानजलदोदञ्चत्प्रचण्डानिलं
सुब्रह्मण्यमगण्यपुण्यचरितं वन्दे परं देशिकम् ॥ १७८॥
कारावासनिवासखिन्नविधिहृत्कञ्जात भानुं पुन-
स्तद्वक्त्राब्जचतुष्टयस्तुतिमहाकल्याणशीलं विभुम् ।
क्रौञ्चारिं पितृपादवन्दितपदं षाण्मातुरं शाङ्करिं
सुब्रह्मण्यमगण्यपुण्यचरितं वन्दे परं देशिकम् ॥ १७९॥
ओङ्कारार्थ समर्थनार्थकवचोभूषाविशेषान्वितं
पाथोजाभषडाननं शिखिकुलाधीशोरुतुङ्गध्वजम् ।
स्कन्दं सुन्दरकुन्ददन्तमनघं शम्भोर्गुरुं शाश्वतं
सुब्रह्मण्यमगण्यपुण्यचरितं वन्दे परं देशिकम् ॥ १८०॥
शर्वाणीप्रणवोपदेश चतुरश्रीकण्ठकण्ठीरव-
श्रोतारं रजनीशुभाङ्कविलसत्सिंहामसनस्थं गुहम् ।
वल्लीपीनपयोधरेक्षणपरं स्वर्णाहिराजाकृतिं
सुब्रह्मण्यमगण्यपुण्यचरितं वन्दे परं देशिकम् ॥ १८१॥
ब्रह्माण्डैकसहस्रकाष्टभरणप्राचुर्यधैर्यस्फुर-
त्कोपाटोपदुरापपापघटिताहङ्कारशूरान्तकम् ।
सेनान्यं सुरमान्यमुन्नभुजं चिन्ताब्धिकुम्भोद्भवं
सुब्रह्मण्यमगण्यपुण्यचरितं वन्दे परं देशिकम् ॥ १८२॥
मार्ताण्डायुतभासमानमणिभृल्लावण्यतारुण्यजि-
त्तत्कारुण्यशरण्यपञ्चकमयप्रोद्यत्फणाशालिनम् ।
दिव्याङ्गं भवभङ्गसङ्गतकृपा तुङ्गोत्तरङ्गालयं
सुब्रह्मण्यमगण्यपुण्यचरितं वन्दे परं देशिकम् ॥ १८३॥
सेवातत्परमानवार्पितबृहत्कूश्माण्डपादावनी-
तूलस्थूलमरीचिसर्षपसमग्रोपायनं मायिनम् ।
नानावाद्यमृदङ्गशङ्खपटली घोषाङ्कपूजान्वितं
सुब्रह्मण्यमगण्यपुण्यचरितं वन्दे परं देशिकम् ॥ १८४॥
पुत्रस्नेहविमोहवर्धितशिवावक्षोजकुम्भस्रव-
न्नीरापूरकुमारपूर्वविलसद्धारातटीवासिनम् ।
विष्णुब्रह्मसुरासुरार्चितमणिस्वर्णोज्ज्वलत्पादुकं
सुब्रह्मण्यमगण्यपुण्यचरितं वन्दे परं देशिकम् ॥ १८५॥
देवं शक्तिधरं कुमारमतुलं दिव्यावतारं वटुं
भावातीतमतीतसंसृतिमनः पद्माग्रसद्मप्रियम् ।
भक्त्या ये प्रणमन्ति ते गतभयाः कारुण्यभाजः सदा
भुक्त्वा भोगसुखं त्वदीयकृपया मुक्ता भवन्ति ध्रुवम् ॥ १८६॥
॥ इति शिवरहस्यान्तर्गते गणेश्वरकृतं सुब्रह्मण्यस्तवः सम्पूर्णम् ॥
- ॥ श्रीशिवरहस्यम् । ईशाख्यः द्वादशमांशः । ३८ । १५६-१८६ ॥
- .. shrIshivarahasyam . IshAkhyaH dvAdashamAMshaH . 38 . 156-186 ..
Notes:
Gaṇeśvara गणेश्वर eulogize Subrahmaṇya सुब्रह्मण्य towards the conclusion of the discourse of The ŚivaRahasyam शिवरहस्यम्.
Proofread by Ruma Dewan