ब्रह्माशिवदेवादिभिः कृतं विष्णुस्तोत्रम्
(ब्रह्मा-शिव-देवादय ऊचुः)
महत्तमा मूर्तिमयी तवाजा तदास्य पूर्वाज्जनितोहऽमादौ ।
मया ततं विश्वमिदं सदैव यतो नमस्तत्पुरुषोत्तमाय ॥ १९॥
अजस्य याम्याज्जनितोऽहमादौ विष्णुर्महाकल्पकरोऽधिकारी ।
स्वकीयनाम्ना तु मया ततं तद्विश्वे सदैवं च नमो नमस्ते ॥ २०॥
अव्यक्तपाश्चात्यमुखात्सुजन्मा शिवोऽहमादौ सुरतत्त्वकारी ।
मया महाकल्पकरस्तृतीया त्वदाज्ञया देव नमो नमस्ते ॥ २१॥
प्रधानवक्त्रोत्तरतोऽहमादौ जातो गणेशः किल कल्पकर्ता ।
मया ततं विश्वमिदं सदैव तस्मै नमः कारुणिकोत्तमाय ॥ २२॥
अजार्द्धवक्त्राज्जनितोऽहमादौ मरुन्महाकल्पकरो महेन्द्रः ।
मया ततं विश्वमिदं स्वकल्पे यदाज्ञया देव नमो नमस्ते ॥ २३॥
प्रथानभालाक्षिसमुद्भवोऽहं वह्नेर्महाकल्पकरो गुहाख्यः ।
विनिर्मितं विश्वमिदं मया तद्यदाज्ञया नाथ नमो नमस्ते ॥ २४॥
अजामुखात्पूर्वगताच्च जातश्चादौ महाकल्पकरोऽहमग्निः ।
ब्रह्माण्डमेतच्च मया ततं वै ब्रह्माण्डकल्पाय नमो नमस्ते ॥ २५॥
अजाभुजाद्दक्षिणतोऽहमादौ जातो महाकल्पकरः सधर्मः ।
मया सदेवै रचितं समग्रं लिङ्गाख्यकल्पाय नमो नमस्ते ॥ २६॥
अजाभुजात्पश्चिमतोऽहमादौ जातो महाकल्पकरः स यज्ञः ।
मया ततं विश्वमिदं समग्रं मत्स्याख्यकल्पाय नमो नमस्ते ॥ २७॥
प्रधानबाहूत्तरतोऽहमादौ जातो महाकल्पकरः प्रचेताः ।
मया ततं नाथ तवाज्ञयेदं कर्माख्यकल्पाय नमो नमस्ते ॥ २८॥
ब्रह्माण्डतमसो जातस्त्वद्दासोऽहं विभीषणः ।
मया ततं त्रिलोकं च नमस्ते मनुरूपिणे ॥ २९॥
ब्रह्माण्डसद्गुणाज्जातश्चित्तोऽहं मनुकारकः ।
मया ततं च त्रैलोक्यं स्वायम्भुव नमोऽस्तु ते ॥ ३०॥
ब्रह्माण्डरजसो जातो वायुर्मन्वन्तरं ततम् ।
मया स्वारोचिषं स्वामिन्नमस्ते मनुरूपिणे ॥ ३१॥
ब्रह्माण्डमनसो जातो ध्रुवोऽहं मनुकारकः ।
मयोत्तमं च रचितं नमस्तेऽस्तु तवाज्ञया ॥ ३२॥
ब्रह्माण्डश्रवणाज्जातो विश्वकर्माहमीश्वरः ।
मया ततं रैवतं च नमो देव तवाज्ञया ॥ ३३॥
ब्रह्माण्डदेहतो जातस्सूर्योऽहं चाक्षुषप्रदः ।
तवाज्ञया ततं विश्वं मनुरूपाय ते नमः ॥ ३४॥
ब्रह्माण्डनेत्रतो जातः सोमोऽहं तु मया ततम् ।
वैवस्वतान्तरं रम्यं नमस्ते मनुरूपिणे ॥ ३५॥
ब्रह्माण्डरसनाज्जातो मोहोऽहं मनुकारकः ।
नमस्ते मनुरूपाय मया सावर्णिकं ततम् ॥ ३६॥
ब्रह्माण्डघ्राणतो जातो बुधोऽहं नाथ किङ्करः ।
निर्मितं ब्रह्मसावर्णं मया तात नमो नमः ॥ ३७॥
ब्रह्माण्डवक्त्रतो जातो जीवोऽहं मनुकारकः ।
मया वै दक्षसावर्णं ततं तत्ते नमो नमः ॥ ३८॥
ब्रह्माण्डकरतो जातः शुक्रोहं तव किङ्करः ।
निर्मितं रुद्रसावर्णं मया तुभ्यं नमो नमः ॥ ३९॥
ब्रह्माण्डपदतो जातो मन्दोऽहं नाथ तेऽनुगः ।
ततं वै धर्मसावर्णं प्रभातेऽस्मै नमो नमः ॥ ४०॥
ब्रह्माण्डलिङ्गतो जातो राहुश्चाहं तव प्रियः ।
मया भौमं कृतं नाथ नमस्ते मनुरूपिणे ॥ ४१॥
ब्रह्माण्डगुह्यतो जातः केतुश्चाहं तवानुगः ।
भौतं मन्वतरं सृष्टं तस्मै देवाय ते नमः ॥ ४२॥
इति भविष्यपुराणे प्रतिस्गपर्वे चतुर्थखण्डे पञ्चविंशाध्यायान्तर्गतं
ब्रह्मा-शिव-देवादिभिः कृतं विष्णुस्तोत्रं समाप्तम् ।
भविष्यपुराण । प्रतिसर्गपर्व । चतुर्थखण्ड । अध्याय २५/१९-४२॥
bhaviShyapurANa . pratisargaparva . chaturthakhaNDa . adhyAya 25/19-42..
Proofread by PSA Easwaran