श्रीधार्मिकस्तोत्रम्
(वसन्ततिलका वृत्तम्)
श्रीवासुदेव-विमलामृत-धामवासं
नारायणं नरकतारण-नामधेयम् ।
श्यामं सितं द्विभुजमेव चतुर्भुजं च
त्वां भक्तिधर्मतनयं शरणं प्रपद्ये ॥ १॥
शिक्षार्थमत्र निजभक्तिमतां नराणां
एकान्त-धर्ममखिलं परिशीलयन्तम् ।
अष्टाङ्गयोग-कलनाश्च महाव्रतानि
त्वां भक्तिधर्मतनयं शरणं प्रपद्ये ॥ २॥
श्वासेन साक-मनुलोम-विलोमवृत्त्या
स्वान्तर्बहिश्च भगवत्युरुधा निजस्य ।
पूरे गतागत-जलाम्बुधिनोपमेयं
त्वां भक्तिधर्मतनयं शरणं प्रपद्ये ॥ ३॥
बाह्यान्तरिन्द्रियगण-श्वसनाधिदैव-
वृत्युद्भव-स्थितिलयानपि जायमानान् ।
स्थित्वा ततः स्वमहसा पृथगीक्षमाणं
त्वां भक्तिधर्मतनयं शरणं प्रपद्ये ॥ ४॥
मायामया-कृतितमोऽशुभवासनानां
कर्तुं निषेधमुरुधा-भगवत्स्वरूपे ।
निर्बीज-साङ्ख्यमत-योगग-युक्तिभाजं
त्वां भक्तिधर्मतनयं शरणं प्रपद्ये ॥ ५॥
दिव्याकृतित्व-सुमहस् त्वसुवासनानां
सम्यग्विधिं प्रथयितुं च पतौ रमायाः ।
सालम्बसाङ्ख्यपथ-योगसुयुक्तिभाजं
त्वां भक्तिधर्मतनयं शरणं प्रपद्ये ॥ ६॥
कामार्त्त-तस्कर-नटव्यसनि-द्विषन्तः
स्वस्वार्थ-सिद्धिमिव चेतसि नित्यमेव ।
नारायणं परमयैव मुदा स्मरन्तं
त्वां भक्तिधर्मतनयं शरणं प्रपद्ये ॥ ७॥
साध्वी-चकोर-शलभास्तिमि-कालकण्ठ-
कोका निजेष्टविषयेषु यथैव लग्नाः ।
मूर्तौ तथा भगवतोऽत्र मुदातिलग्नं
त्वां भक्तिधर्मतनयं शरणं प्रपद्ये ॥ ८॥
स्नेहातुरस्त्वथ भयातुर आमयावी
यद्वत् क्षुधातुरजनश्च विहाय मानम् ।
दैन्यं भजेयुरिह सत्सु तथा चरन्तं
त्वां भक्तिधर्मतनयं शरणं प्रपद्ये ॥ ९॥
धर्मस्थितै-रुपगतैर्बृहता निजैक्यं
सेव्यो हरिः सितमहःस्थितदिव्यमूर्तिः ।
शब्दाद्यरागिभिरिति स्वमतं वदन्तं
त्वां भक्तिधर्मतनयं शरणं प्रपद्ये ॥ १०॥
सद्ग्रन्थनित्य-पठनश्रवणादि-सक्तं
ब्राह्मीं च सत्सदसि शासतमत्र विद्याम् ।
संसारजाल-पतिताखिल-जीवबन्धो
त्वां भक्तिधर्मतनयं शरणं प्रपद्ये ॥ ११॥
इति श्रीशतानन्दमुनिविरचितं श्रीधार्मिकस्तोत्रं सम्पूर्णम् ।