श्रीधन्वन्तरि ध्यानम्
शङ्खं चक्रमुपर्यधश्च करयोर्दिव्यौषधं दक्षिणे
वामेनान्यकरेण सम्भृतसुधाकुम्भं जलौकावलिम् ।
बिभ्राणः करुणाकरः शुभकरः सर्वामयध्वंसकः
क्षिप्रं नो दुरितं छिनत्तु भगवान्धन्वन्तरिः पातु नः ॥
श्रीमान् कलयतु शश्वत्क्षेमं धन्वन्तरिः सतां देवः ।
कामं सुरवरतत्यै कामितदानाय दुग्धवार्धिभवः ॥ १॥
करधृतदिव्यसुधावरकलशः परिपूर्णषड्गुणः श्रीशः ।
परिहृतभक्तक्लेशः सुरुचिरतरकान्तवरवेषः ॥ २॥
हृतवति करधृतकलशे दितिसुतमुख्यैः प्रतिक्रियां तेषाम् ।
व्यतनुत निर्जरतत्यै योषिद्रूपो विभज्य पीयूषम् ॥ ३॥
विश्रुतविलसत्कीर्तिः भक्तानन्दप्रदानवरमूर्तिः ।
निस्तुलकरुणाशक्तिः भात्येष श्रीहरिः स्वयं जगति ॥ ४॥
आनतसज्जनपाता मौनिप्रवरार्तिजातसंहर्ता ।
ज्ञानिप्रवरनिरन्तरगानार्हात्मीयनित्यसद्वृत्तः ॥ ५॥
आयुर्वेदाब्धिसारं निखिलमुनिजनस्तोमभूत्यै विवृण्वन्
भूयः पद्मासनाद्यैरुरुतरवचसा संस्तुतस्सोऽवतान्नः ।
प्रेयान्क्षीराब्धिजायाः सुतरुमणिसुधेन्द्वात्मनैकोऽखिलेभ्यः
भक्तेभ्यो दातुमीष्टे भुवि शमिह गदापायदः संस्मृतो यः ॥ ६॥
क्षीराब्धेर्मथ्यमानादमृतमभिलषद्बुद्धिभिर्वै बुधौघैः
उत्तीर्णः पीतवासा घनरुचिररुचिर्विश्वसन्त्राणहेतोः ।
दोर्भिर्बिभ्रच्चतुर्भिर्जलभवमभयं चामृतं शस्त्रयन्त्रं
योऽसौ धन्वन्तरिर्नः सकलगदभयादादिदेवः सदाऽव्यात् ॥ ७॥
तरुणाम्बुदसुन्दरस्तदा त्वं ननु धन्वन्तरिरुत्थितोऽम्बुराशेः ।
अमृतं कलशे वहन्कराभ्यामखिलार्तिं हर मारुतालयेश ॥ ८॥
पृष्ठे कूर्मतया चतुर्भुजतया दोर्मण्डले मन्दरं
रुध्वा क्षीरसमुद्रमोषधिभृतं निर्मथ्य निष्पादितैः ।
आनीतैरमृतैर्भिषक्तमतया योषित्तया पायितैः
देवानामजरामरत्वमकरोत्तस्मै नमो विष्णवे ॥ ९॥
क्षीराब्धेरुदगाः - धृतवानमृतघटं आयुष्यं जगते वितरीतुं
श्रीसहज धन्वन्तरिरूप - जय जगदीश हरे ॥ १०॥
इति श्रीधन्वन्तरिध्यानं सम्पूर्णम् ।
Proofread by PSA Easwaran psaeaswaran at gmail.com