श्रीहयग्रीवपञ्जरम् १
(श्रीहयग्रीव मूलमंत्रस्तुतिः)
अस्य कल्पं प्रवक्ष्यामि हयग्रीवस्य पञ्जरम् ।
यस्य विज्ञानमात्रेण वाणी गङ्गेव निःसरेत् ॥ १॥
शुद्धस्फटिकसङ्काशं तुषाराचलसन्निभम् ।
श्वेतपर्वतसङ्काशचन्द्रमण्डलमध्यगम् ॥ २॥
चतुर्भुजमुदाराङ्गं पुण्डरीकायतेक्षणम् ।
शङ्खचक्रधरं देवं किरीटमकुटोज्ज्वलम् ॥ ३॥
कौस्तुभोद्भासितोरस्कं वनमालाविराजितम् ।
पीताम्बरधरं देवं श्रीवत्साङ्कितवक्षसम् ॥ ४॥
मुख्यहस्तद्वयेनैव ज्ञानमुद्राक्षपुस्तकम् ।
धारयन्तं हयग्रीवं ध्यायेदिष्टार्थसिद्धये ॥ ५॥
(नमस्तुभ्यं जगन्नाथ! लक्ष्मीकान्त! परात्पर!।
नमोवाचं पुरश्चक्रे विद्याराजाय विष्णवे॥)
ओङ्काराद्गीथरूपाय ऋग्यजुस्साममूर्तये ।
नमोऽस्तु देवदेवाय वाञ्छितार्थप्रदायिने ॥ ६॥
अज्ञानतिमिरं छिन्धि ज्ञानं चाशु प्रयच्छ मे ।
देहि मे देवदेवेश हयशीर्ष नमोऽस्तु ते ॥ ७॥
भूतप्रेतपिशाचादीन् छिन्धि देव जनार्दन ।
ज्वरादीन्निखिलान् रोगान् नाशयाऽऽशु रमापते ॥ ८॥
दारिद्र्यं सकलं छिन्धि कुरु सौभाग्यभाजनम् ।
शत्रून्नाशय मे देव हयशीर्ष नमोऽस्तु ते ॥ ९॥
मेधां प्रज्ञां बलं विद्यां सम्पदं पुत्रपौत्रकम् ।
देहि मे देवदेवेश हयशीर्ष नमोऽस्तु ते ॥ १०॥
कार्कोटकमुखान्सर्पान् विषादीन्विलयं नय ।
अमृतं कुरु मे देव हयशीर्ष नमोऽस्तुते ॥ ११॥
स्त्रीवश्यं जनवश्यं च राजवश्यं परात्परम् ।
कुरु देवाङ्गनावृन्दसेव्यमानपदाम्बुज ॥ १२
हंसायपरमेशायचन्द्रमण्डलवासिने ।
नमो हयोत्तमाङ्गाय वाञ्छितार्थप्रदायिने ॥ १३॥
ऋग्यजुस्सामरूपाय ऋताय महते नमः ।
ऋक्षेशबिन्दुमध्यस्थराजीवासनभाजिने ॥ १४॥
वेदवेदान्तवेद्याय वेदाहरणकर्मणे ।
सत्त्वासत्त्वमहामोहभेदिने ब्रह्मणे नमः ॥ १५॥
प्रज्ञानदायिने नित्यं भजतां भावितात्मनाम् ।
प्रणवोद्गीथवपुषे प्रणतिं प्रतिपादये ॥ १६॥
मन्दारकुन्दस्फटिकमहनीयोरुवर्चसे ।
मनीषाप्रददेवाय महाश्वशिरसे नमः ॥ १७॥
इतिद्वादशमन्त्रेण नमस्कुर्याज्जनार्दनम् ।
प्रातःप्रसन्नवदनं पूर्वाचार्याभिवन्दितम् ॥ १८॥
(प्राची सन्ध्या काचिदन्तर्निशायाः
प्रज्ञादृष्टे रञ्जनश्रीरपूर्वा ।
वक्त्री वेदान्भातु मे वाजिवक्त्रा
वागीशाख्या वासुदेवस्य मूर्तिः ॥
निर्मलज्ञानसन्दोहं ध्वान्तध्वंसनकर्मठम् ।
नमामि तुरगग्रीवं हरिं सारस्वतप्रदम् ॥)
इति हय्ग्रीवपञ्जरम् १ सम्पूर्णम् ।
Proofread by PSA Easwaran