श्रीकृष्णप्रोक्तं पुरुषोत्तमकथावर्णनम्
श्रीकृष्ण उवाच ।
यश्चाऽस्ति दिव्येऽक्षरधाम्नि दिव्यो ह्यनन्तमुक्ताऽभिसुसेव्यमानः ।
परेऽक्षराद्धाम्नि विराजमानः सोऽयं पृथिव्यां समवाततार ॥ २९॥
श्रीकृष्णनारायणनामधेयो ह्यनादिकृष्णः परमेश्वरश्च ।
गोलोकवैकुण्ठनिवासिभिश्च प्रगेऽर्चने वै हृदि चिन्त्यमानः ॥ १.३०॥
सोऽयं कृपाभिः पृथिवीतले कुङ्कुमाख्यवाप्यां हि सुराष्ट्रदेशे ।
श्रीकम्भरालक्ष्मिसतीगृहेऽत्र गोपालकृष्णात्मजतामवाप ॥ ३१॥
यस्मादहं पूर्णतमोऽपि कृष्णो राधापतिश्चाप्यभवं पुराणः ।
लक्ष्मीपतिश्चाप्यभवद्यतो वै वैकुण्ठधामाधिपतिर्महात्मा ॥ ३२॥
कैलासवासोऽपि यतोऽभवच्चामृताधिवासोऽपि यतोऽभवच्च ।
अव्याकृतेशोऽपि यतोऽभवच्च हिरण्यगर्भोऽपि यतोऽभवच्च ॥ ३३॥
श्रीबद्रिकेशोऽपि यतोऽभिजातः क्षीरोदवासी च यतोऽस्ति जातः ।
श्वेताख्यधामेश नरायणोऽपि यतोऽस्ति जातः कमलापतिर्वै ॥ ३४॥
असङ्ख्यधामाधिपरेश्वराश्च यतो भवन्त्येव हरेस्तु राधे ।
तस्यात्मदेवस्य गुणानुकीर्तिं वदामि राधे परमेश्वरस्य ॥ ३६॥
त्वया स्तुतः श्रीपुरुषोत्तमो यः परात्परः कारणकारणं च ।
सर्वावताराधिपतिः पुराणः स्मरामि तं श्रीपुरुषोत्तमेशम् ॥ ३६॥
द्विषट्कयुक्तं कथितं च यत् शतं त्वया परेशस्य तु मुख्ययोषिताम् ।
दिव्याङ्गनानां चरणान्यहं सदा नमामि तासां पतये नमो नमः ॥ ३७॥
अहं पुरोद्भाव्य विलोकितस्त्वया साकं परेशेन निवासनाय वै ।
गोलोकसंज्ञं मम धाम चार्पितं राधे विहारार्थमनेन ते नमः ॥ ३८॥
ततः परं येन नरायणः कृतो लक्ष्म्या सुयुक्तश्च विलोकितश्च सः ।
वैकुण्ठसंज्ञं प्रददौ च धाम यत्तस्मै प्रदात्रे परमात्मने नमः ॥ ३९॥
अथापि रूपं च विधाय शाम्भवं सत्या समं यत्प्रविलोकितं पुनः ।
कैलाससंज्ञं प्रददौ च धाम यत् निवासदात्रे गुणधारिणे नमः ॥ १.४०॥
इति श्रीलक्ष्मीनारायणीयसंहिता । खण्ड २। अध्याय प्रथमाध्यायान्तर्गतं
श्रीकृष्णप्रोक्तं पुरुषोत्तमकथावर्णनम् ।
लक्ष्मीनारायणीयसंहिता । खण्ड २। अध्याय १/२९-४०॥
lakShmInArAyaNIyasaMhitA . khaNDa 2. adhyAya 1/29-40..
Proofread by PSA Easwaran