कश्यपादितिकृतं विष्णुस्तोत्रम्
कश्यपोऽपि सुतं त्विन्द्रं भ्रष्टराज्यं विलोक्य च ।
आदित्या सह सौराष्ट्रे तपस्तेपे पयोवृतम् ॥ ६४॥
अर्चयामास देवेशं पद्मनाभं जनार्दनम् ।
शरीरे तु तयोस्तत्र पिपीलिकाभिरावृते ॥ ६५॥
तेजो महत्तयोर्व्याप्तं सौराष्ट्रे परितस्तदा ।
लोकास्तु विस्मितास्तेन तौ स्तुवन्ति पुनः पुनः ॥ ६६॥
हरिर्वर्षसहस्रान्ते प्रसन्नस्तपसा तयोः ।
तत्रैवाविरभूत्तस्य देव्या सह सनातनः ॥ ६७॥
तं दृष्ट्वा पुण्डरीकाक्षं शङ्खचक्रगदाधरम् ।
इन्दीवरदलश्यामं सर्वाभरणशोभितम् ॥ ६८॥
किरीटहारकेयूरकुण्डलशृङ्खलान्वितम् ।
पीताम्बरं श्रीवत्साङ्ककौस्तुभहारवक्षसम् ॥ ६९॥
लक्ष्मीयुक्तं गरुडस्थं प्रसन्नं जगदीश्वरम् ।
हर्षनिर्भरहृदयस्तुष्टाव कश्यपो हरिम् ॥ ७०॥
नमो नमस्ते लक्ष्मीश सर्वेश भुवनेश्वर ।
स्वाश्रितानां सुखदात्रे भक्तकार्यकृते नमः ॥ ७१॥
आदिमध्यान्तरहितनित्यरूपाय ते नमः ।
नमः सर्वत्राणकृते वेदवेदाङ्गचक्षुषे ॥ ७२॥
सूक्ष्माय स्थूलरूपाय नारायणाय ते नमः ।
कल्याणगुणपूर्णाय परात्मने च ते नमः ॥ ७३॥
नमस्ते योगिगम्याय भक्तेच्छापूरकाय ते ।
नित्यमुक्तैकभोगाय परधामेश्वराय च ॥ ७४॥
चतुरात्मन्नमस्तुभ्यं व्यूहात्मने च ते नमः ।
पञ्चपञ्चस्वरूपाय पञ्चसंस्कारिणे नमः ॥ ७५॥
नारायणाय कृष्णाय वासुदेवाय ते नमः ।
शार्ङ्गिणे विश्वरूपाय धात्रे त्रात्रे च ते नमः ॥ ७६९॥
विष्णवे जिष्णवे तुभ्यं शुद्धसत्त्वाय ते नमः ।
बलेर्बलं महज्जातं तन्निषूदय माधव ॥ ७७॥
देवास्तदा सुखिनः स्युरिति चाभ्यर्थनाऽस्ति मे ।
यद्यपि बलिराजोऽसौ भक्तोऽस्ति सुरमेलनः ॥ ७८॥
किन्तु सुरातिक्रमणं मास्तु दैत्यस्य माधव ।
तस्मात्त्रिलोकगं राज्यं त्विन्द्रस्यैव सदाऽस्तु वै ॥ ७९॥
बलेस्त्वासुरराज्यं च पातालादौ यथास्तु च ।
तथाऽस्त्यभ्यर्थनीयं मे यथेच्छसि तथा कुरु ॥ ८०॥
उक्त्वा तु कश्यपस्तत्र विरराम हरेः पुरः ।
अदितिः प्राह देवेशं नत्वा स्तुत्वा जगत्प्रभुम् ॥ ८१॥
हे नाथ यदि देवानां शास्तृत्वं चासुरे भवेत् ।
तदाऽस्मत्पुत्रबाहुल्ये नास्ति किञ्चित्प्रयोजनम् ॥ ८२॥
यदि शृगालाः काकाश्च स्युर्देवस्य विभूतयः ।
किं सिंहेन च हंसेन तदा वै महिमा तव ॥ ८३॥
यदि दैत्याः सार्वभौमा भ्रातरस्ते च किङ्कराः ।
अलं तर्हि जीवितेन त्वदित्या रमया श्रिया ॥ ८४॥
यदि भवान्महैश्वर्यो दैत्योऽपि तादृशो भवेत् ।
अलं भगवता तर्हि दैत्यो वै माधवो भवेत् ॥ ८५॥
तस्मात्पात्राधिकारेण देया स्मृद्धिर्हि नाऽन्यथा ।
यदि लौहं गले न्यस्तं शोभते रूपभासुरम् ॥ ८६॥
कृतं तर्हि सुवर्णेन व्यर्थसृष्टं हि हाटकम् ।
यदि दैत्यो भवेदिन्द्रो व्यर्था ह्यप्सरसस्तथा ॥ ८७॥
राजमातरो राक्षस्यश्चेदिन्द्राण्या ह्यलं तदा ।
किम्बहूक्तेन मे नाथ व्यवस्थां कुरु केशव ॥ ८८॥
इति श्रीलक्ष्मीनारायणीयसंहितायां प्रथमे कृतयुगसन्ताने १४४-अध्यायान्तर्गतं
कश्यप-अदितिकृतं विष्णुस्तोत्रं सम्पूर्णम् ।
लक्ष्मीनारायणीयसंहिता । खण्ड १। अध्याय १४४/६४-८८॥
lakShmInArAyaNIyasaMhitA . khaNDa 1. adhyAya 144/64-88..
Proofread by PSA Easwaran