श्रीनृसिंहध्यानश्लोकाः
गोखण्डं वारुणाण्डं परि विटि विटित दर्पणाण्डं मृणाण्डम् ।
डीण्डींश्च डीण्डीं डहमपि डह मैः झुम्प्र झुम्प्रैश्च झुम्प्रैः
स्तैल्यास्तैल्यास्तु स्तैल्याः कुकुकुकुकक्कुमां कुङ्कुमां कुङ्कुमाङ्कं
एतत्ते पादपद्मं वहतु गहतु मां पातु मां नारसिंहः ॥
सत्यज्ञानसुखस्वरूपममलं क्षीराब्धिमध्ये स्थितं
योगारूढमतिप्रसन्नवदनं भूषासहस्रोज्ज्वलम् ।
त्र्यक्षं चक्रपिनाकसाभयकरान् बिभ्राणमर्कच्छविं
छत्रीभूतफणीन्द्रमिन्दुधवलं लक्ष्मीनृसिंहं भजे ॥ १॥
उपास्महे नृसिंहाख्यं ब्रह्मवेदान्तगोचरम् ।
भूयोलालितसंसारच्छेदहेतुं जगद्गुरुम् ॥ २॥
कोपादालोलजिह्वं विवृतनिजमुखं सोमसूर्याग्निनेत्रं
पादादानाभिरक्तप्रभमुपरिसितं भिन्नदैत्येन्द्रगात्रम् ।
शङ्खश्चक्रश्च पाशाङ्कुशकुलिशगदादारुणान् युद्धहन्तं
भीमं तीक्ष्णाग्रदंष्ट्रं मणिमयविविधाकल्पमीडे नृसिंहम् ॥ ३॥
गर्जन्तं गर्जयन्तं निजभुजपटलं स्फोटयन्तं हरन्तं
रूप्यन्तं तापयन्तं दिविभुवि दितिजं क्षेपयन्तं शिरोऽन्तम् ।
क्रन्दन्तं रोषयन्तं दिशि दिशि सततं सरभन्तं हरन्तं
वीक्षन्तं घूर्णयन्तं करनिकरशतैर्दिव्यसिंहं नमामि ॥ ४॥
माणिक्यादिसमप्रभं निजरुचा सन्त्रस्तरक्षोगणं
जानुन्यस्तकराम्बुजं त्रिनयनं रत्नोल्लसद्भूषणम् ।
बाहुभ्यां धृतशङ्खचक्रमनिशं दंष्ट्राग्रवक्त्रोल्लस-
ज्ज्वालाजिह्वमुदग्रकेशनिचयं वन्दे नृसिंहं विभुम् ॥ ५॥
क्षीराब्धौ वसुमुख्यदेवनिकरैरग्रादिसंवेष्टितः
शङ्खं चक्रगदाम्बुजं निजकरैर्बिभ्रंस्त्रिनेत्रः सितः
सर्पाधीशफणातपत्रलसितः पीताम्बरालङ्कृतो
लक्ष्म्याश्लिष्टकलेवरो नरहरि स्तन्नीलकण्ठो मुदे ॥ ६॥
उदयरविसहस्रद्योतितं रूक्षवीक्षं
प्रलयजलधिनादं कल्पकृद्वह्निवक्त्रम् ।
सुरपतिरिपुवक्षच्छेदरक्तोक्षिताङ्गं
प्रणतभयहरं तं नारसिंहं नमामि ॥ ७॥
ऊर्ध्वाभ्यामान्त्रमले तदनुदरमरिं खड्गखेटौ वहन्तं
चापं बाणं दधानं मुसलमपि गदां पाशमप्यङ्कुशं च
ऊर्वौ निक्षिप्य दैत्यं तदुदरकुहरं दारयन्तं च दोर्भ्यां
रक्तज्ज्वाला-वमन्तं ज्वरभयसमये चिन्तयेदुग्रसिंहम् ॥ ८॥
लक्ष्मीशोभितवामभागममलं सिंहासने सुन्दरं
सव्ये चक्रधरं च निर्भयकरं वामेन चापं वरम् ।
सर्पाधीशकृतान्तपत्रममलं श्रीवत्सवक्षस्थलं
वन्दे देवमुनीन्द्रवन्दितपदं लक्ष्मीनृसिंहं विभुम् ॥ ९॥
उग्रं तं नारसिंहं विवृतभयमुखं रक्तनेत्राधरोष्ठं
तेजोभिः प्रज्वलन्तं हुतवहसदृशं दुर्निरीक्ष्यं सुरेन्द्रैः ।
भिन्नौ दिव्यैर्नखाग्रैर्गजमदमलिनैर्दानवेन्द्रो हिरण्यः ।
सोऽयं नः पातु नित्यं त्रिभुवनविजयी सिंहरूपेण विष्णुः ॥ १०॥
अरुणकनकवर्णं नीलकण्ठं त्रिनेत्रं
रथचरणपिनाकाभीत्यभीष्टाग्रहस्तम् ।
अमृतलहरिगौरं शेषभोगे शयानं
प्रणमतशशिचूडं योगरूढं नृसिंहम् ॥ ११॥
नमन
नमोऽस्तु नारायण नारसिंह नमोऽस्तु नारायण वीरसिंह ।
नमोऽस्तु नारायण क्रूरसिंह नमोऽस्तु नारायण दिव्यसिंह ॥
नमोऽस्तु नारायण व्याघ्रसिंह नमोऽस्तु नारायण पुच्छसिंह ।
नमोऽस्तु नारायण पूर्णसिंह नमोऽस्तु नारायण रौद्रसिंह ।
नमो नमो भीषण भद्रसिंह नमो नमो विव्ह्वलनेत्रसिंह ।
नमो नमो बृंहितभूतसिंह नमो नमो निर्मलचित्रसिंह ॥
नमो नमो निर्जितकालसिंह नमो नमः कल्पितकल्पसिंह ।
नमो नमः कामद कामसिंह नमो नमस्ते भुवनैकसिंह ।
नमो नमस्ते जयसिंहरूप नमो नमस्ते नरसिंहरूप ।
नमो नमस्ते रणसिंहरूप नमो नमस्ते नरसिंहरूप ।
इति श्रीनृसिंहध्यानश्लोकाः सम्पूर्णा ।
Proofread by M K Barman