अपमृत्युहरं श्रीनृसिंहकवचम्
श्रीगणेशाय नमः ।
अथापरं प्रवक्ष्यामि ह्यल्पमृत्यु हरंपरम् ।
उपायं यत्कृतेनाङ्ग शीघ्रं मृत्युर्निवर्तते ॥ १॥
नृसिंहकवचं नाम स्तोत्रं परमदुर्लभम् ।
यस्य धारणया क्षिप्रमल्पमृत्युर्विनश्यति ॥ २॥
अरुण उवाच -
भगवन्देवदेवेश कृपया परयाऽधुना ।
नृसिंहकवचं दिव्यं गुह्यं भक्ताय मे वद ॥ ३॥
सूर्य उवाच -
शृणु पुत्र प्रवक्ष्यामि नृसिंहकवचं शुभम् ।
यस्य विज्ञानमात्रेण नश्यन्ति सकलापदः ॥ ४॥
ग्रहबाधा प्रेतबाधा बाधा या कुलदोषजा ।
कृत्यया जनिता बाधा शत्रुबाधा स्वकर्मजा ॥ ५॥
शीघ्रं नश्यन्ति ताः सर्वाः कवचस्य प्रभावतः ।
असाध्या ये च दुस्साध्या महारोगा भयङ्कराः ॥ ६॥
सद्यो नश्यन्ति पठनात्कवचस्यास्य सारथे ।
जलभीतिश्चाग्निभीतिर्भीतिः शत्रुगणादपि ॥ ७॥
सिंहव्याघ्रादिजा भीतिः शीघ्रं सर्वा विनश्यति ।
सङ्ग्रामे दुर्गमेऽरण्ये सङ्कटे प्राणसंशये ॥ ८॥
पठतो विजयो रक्षा सुखं सौभाग्यसम्पदः ।
पुत्रसौख्यं राजसौख्यं धनसौख्यमृणक्षयः ॥ ९॥
कुटुम्बवृद्धिः कल्याणमारोग्यं विजयः सदा ।
अल्पमृत्युभयं घोरं पाठादस्य विनश्यति ॥ १०॥
अल्पमृत्युहरश्चात उपायो न परः स्मृतः ।
अल्पमृत्युहरं नाम कवचं चेदमुत्तमम् ॥ ११॥
सिंहप्रणादान्मत्तोऽपि गजेन्द्रस्तु पलायते ।
अल्पमृत्युस्तथा चास्य पाठात्सद्यो निरस्यते ॥ १२॥
सहस्रपञ्चकावृतिं पठेद्यः सुसमाहितः ।
अल्पमृत्युभयं तस्य प्रभवेन्नैव कर्हिचित् ॥ १३॥
अथ पाठः -
नृसिंहो मे शिरः पातु पातु भालं नृकेसरी ।
भ्रुवौ नृसिंहो मे पातु नृसिंहो नयनद्वयम् ॥ १४॥
नृसिंहो नासिके पातु कर्णौ पातु नृकेसरी ।
नृसिंहो मे मुखं पातु कपोलौ रक्षताद्धरिः ॥ १५॥
नृसिंहश्चिबुकं रक्षेत्कण्ठं पातु नृकेसरी ।
स्कन्धौ पातु नृसिंहो मे भुजौ पातु नृकेसरी ॥ १६॥
करद्वयं नृसिंहोऽव्यान्नृसिंहो रक्षतादुरः ।
नृसिंहो हृदयं पातु नृसिंहोऽव्यात्तथोदरम् ॥ १७॥
कुक्षिं नरहरिः पातु नाभिं पातु नृकेसरी ।
बस्तिं च गुह्यदेशं च नृसिंहोऽव्यात्सदा मम ॥ १८॥
नृसिंहो जानुनी पातु जङ्घे पातु नृकेसरी ।
पादौ गुल्फौ सदा पातु नृसिंहो मम रक्षकः ॥ १९॥
अग्रतः पृष्ठतो मेऽव्यात्तथा पार्श्वद्वयं सदा ।
नृसिंहः सर्वगात्राणि मम रक्षतु सर्वदा ॥ २०॥
नृसिंहो रक्षतात्पूर्वे वह्निकोणे नृकेसरी ।
नैरृत्यां नरसिंहोऽव्यानृसिंहः पातु पश्चिमे ॥ २१॥
नृसिंहो वायुकोणेऽव्यादुत्तरेऽव्यान्नृकेसरी ।
नृसिंहोऽव्यात्तथेशाने ह्यध ऊर्ध्वं समन्ततः ॥ २२॥
जले सदा रक्षतु मां नृसिंहः स्थलेषु मां पातु सदा नृसिंहः ।
नभस्तले भूमितले समन्तानृकेसरी रक्षतु सर्वदा माम् ॥ २३॥
दुर्गाध्वदुर्गभवनेषु च सङ्कटेषु
प्राणप्रयाणभयविघ्नसमुच्चयेषु ।
शीतोष्णवातरिपुरोगभयेषु युद्धे
सङ्कष्टनाशनपरोऽवतु मां नृसिंहः ॥ २४॥
छिनत्तु चक्रेण सदाऽरिवर्गान्सर्वान्नृसिंहो मम मृत्युरूपान् ।
असाध्यदुस्साध्यसमस्तरोगान्भिन्द्यान्नृसिंहः स्वगदाभिघातैः ॥ २५॥
प्रेतान्पिशाचान्सगणान्स्वनेन शङ्खस्य विद्रावयतान्नृसिंहः ।
कूष्माण्डबालग्रहयक्षरक्षः स डाकिनीः शाकिनिकाः समस्ताः ॥ २६॥
खड्गेन मे मृत्युनिसर्गपाशं सञ्छिद्य मां पातु सदा नृसिंहः ।
सदाऽपमृत्योश्च तथाऽल्पमृत्योर्विमोच्य मां रक्षतुनारसिंहः ॥ २७॥
भक्तसंरक्षणार्थाय विदार्यस्तम्भमुद्गतः ।
नृसिंहो रक्षकः सोऽस्तु मृत्युः किं में करिष्यति ॥ २८॥
अट्टाट्टहासतो यस्य सर्वे देवाश्चकम्पिरे ।
नृसिंहो रक्षकः सोऽस्तु मृत्युः किं मे करिष्यति ॥ २९॥
हिरण्यकशिपोर्वक्षो ददारनिशितैर्नखैः ।
नृसिंहो रक्षकः सोऽस्तु मृत्युः किं मे करिष्यति ॥ ३०॥
यस्य भ्रूभङ्गमात्रेण त्रस्तमासीज्जगत्त्रयम् ।
नृसिंहो रक्षकः सोऽस्तु मृत्युः किं मे करिष्यति ॥ ३१॥
उत्क्षिप्तसटया व्यग्रा देवा दैत्या विदुद्रुवुः ।
नृसिंहो रक्षकः सोऽस्तु मृत्युः किं मे करिष्यति ॥ ३२॥
यन्नामस्मरणादेव दह्यन्ते विघ्नराशयः ।
नृसिंहो रक्षकः सोऽस्तु मृत्युः किं मे करिष्यति ॥ ३३॥
यदङ्घ्रिघ्यानतःसद्यो विलीयन्तेऽघराशयः ।
नृसिंहो रक्षकः सोऽस्तु मृत्युः किं मे करिष्यति ॥ ३४॥
माता नृसिंहश्च पिता नृसिंहो भ्राता नृसिंहश्च सखा नृसिंहः ।
बलं नृसिंहो द्रविणं नृसिंहः सर्वं नृसिंहो मम देवदेवः ॥ ३५॥
इति ते कथितं पुत्र नृसिंहकवचं शुभम् ।
अस्य धारणतः पाठादल्पमृत्युः प्रशाम्यति ॥ ३६॥
शतं वाऽथ तदर्धं वा तदर्धं वा सदक्षिणम् ।
विप्रेभ्यः पुस्तकं दद्यादल्पमृत्युप्रशान्तये ॥ ३७॥
इति श्रीसूर्यारुणसंवादे अपमृत्युहरं
नृसिंहकवचं समाप्तम् ॥
॥ ॐ तत्सत्परमात्मनेनमः ॥
Encoded by Ganesh Kandu kanduganesh at gmail.com
Proofread by Ganesh Kandu, NA