श्रीपरशुरामस्तोत्रम्
श्रीपरशुराममन्त्रो यथा मन्त्रमहार्णवे प्रतिपादितः -
``ॐ राँ राँ ॐ राँ राँ ॐ परशुहस्ताय नमः'' इति मूलमन्त्रः ।
अथ परशुरामगायत्रीमन्त्रस्तत्रैव यथा-
``ॐ जामदग्न्याय विद्महे महावीराय धीमहि ।
तन्नः परशुराम प्रचोदयात्'' इति ।
अथ अङ्गन्यासः ।
ॐ जामदग्न्याय हृदयाय नमः ।
ॐ विद्महे शिरसे स्वाहा ।
ॐ महावीराय शिखायै वषट् ।
ॐ धीमहि कवचाय हुं ।
ॐ तन्नः परशुरामो नेत्रत्रयाय वौषट् ।
ॐ प्रचोदयादस्त्राय फट् ।
इति षडङ्गन्यासः ॥
अथ करन्यासः ।
ॐ जामदग्न्याय अङ्गुष्ठाभ्यां नमः ।
ॐ विद्महे तर्जनीभ्यां नमः ।
ॐ महावीराय मध्यमाभ्यां नमः ।
ॐ धीमहि अनामिकाभ्यां नमः ।
ॐ तन्नः परशुरामो कनिष्ठिकाभ्यां नमः ।
ॐ प्रचोदयात् करतलकरपृष्ठाभ्यां नमः ॥
ध्यानम् -
सम्पूर्णा विलसन्ति सोपनिषदो वेदोपवेदो पुरः
पृष्ठे मार्गणपूर्णतूणविलसत्कोदण्डदण्डो महान् ।
बर्हिष्टोमकमण्डलू च परशु पाण्योर्वहन् शास्त्रवित्
शापे शास्त्रवरे च पेषलकरः श्रीभार्गवो भ्राजते ॥ १॥
मत्तक्षत्रियकृत्तकण्ठविगलद्रक्तौघसम्प्लावितं
भक्ताऽनुग्रहणं कठोरपरशुं धृत्वाऽवतीर्याऽधुना ।
दृप्तोद्दण्डदुरीहदुष्टदमनो दीनाऽऽवलीपालको
धर्मोद्धारधुरन्धरो भृगुवरो रामः समुज्जृम्भताम् ॥ २॥
श्रीमद्रेणुकया धृतं स्वजठरे भूभारनाशाय यत्
श्रीमद्भार्गवजामदग्न्यमतुलं रामाभिधानं महः ।
दृप्यत्पार्थिववृन्दकाननललज्ज्वालाढ्यवैश्वानर-
श्चण्डीप्राणपतिप्रियस्य परशोरादायि तत्संस्तुमः ॥ ३॥
लक्ष्मीपतेरुरसि रोषकषायिताक्षः
पादप्रहारमकरोन्मुनिपुङ्गवो यः ।
ब्रह्मर्षिवृन्दपरिचुम्बितपादपद्मः
स श्रीभृगुर्जयति विप्रकुलप्रकाशः ॥ ४॥
श्रीमानुदारचरितो जयतादजस्रं
ब्रह्मर्षिसोमजमदग्निरिति प्रसिद्धः ।
दृप्यन्नृपान्तकरणं तनयं प्रसूय
येनाऽखिलं जगदिदं परितो व्यरक्षि ॥ ५॥
सम्पूर्णभूमिगतवीरमहीगताना
मन्यायमाश्रितवतां प्रमदोद्धतानाम् ।
सा कालरात्रिरिव नाशकरी समन्तात्
श्रीरेणुका भगवती विजयाय भूयात् ॥ ६॥
देवेन येन ततमस्ति समस्तमेत-
द्विश्वं स्वशक्तिखचितं स्वविलासरूपम् ।
तं त्वां महर्षिगणपूजितपादपद्मं
सर्वात्मना भृगुवरं शरणं भजामः ॥ ७॥
धर्मद्विषां नियमनाय गृहीतदीक्षम्
श्रीरेणुकाभगवतीजठरात्प्रसूतम् ।
श्रीभार्गवस्य जमदग्निमुनेः सुपुत्रं
रामं लसत्परशुपाणितलं नमामः ॥ ८॥
स्फूर्जन्मदोद्धतनृपावलिकाननाऽऽली-
र्दग्ध्वा महीसुरगणान्परिरक्ष्य बन्धून् ।
त्रातं भुवस्तलमिदं भवता समस्तं
सम्प्राप्य खण्डपरशोः परशुं प्रसन्नात् ॥ ९॥
लोकत्रयाऽतुलपराक्रमजन्मभूमेः
शीर्षं निकृत्य कृतवीर्यसुताऽर्जुनस्य ।
त्रिःसप्तवारमकरोर्वसुधां समस्तां
निःक्षत्रियां स्वपितृतर्पणकामनायाः ॥ १०॥
दुर्नीतपार्थिवकदम्बनिकृत्तशीर्ष-
ग्रावद्रवद्रुधिरसिद्धधुनीजलौघैः ।
आकण्ठतो निजपितॄन्परितर्प्य पश्चात्
प्रादाद् धरां वसुमतीं किल कश्यपाय ॥ ११॥
पाणौ विलोक्य परशुं भगवंस्त्वदीये
स्त्रीवेषभाग्दशरथोऽपि पलायितोऽभूत् ।
यः स्वासनार्धमुपवेश्य पुरन्दरेण
सम्मानितोऽभवदमोघबलेन शश्वत् ॥ १२॥
श्रीराम ! भार्गव ! भवच्चरणारविन्द-
मूलं शरण्यमधुना वयमागताः स्मः ।
कारुण्यपूर्णसुदृशा किल नोऽनुगृह्य
शक्तिं निजामनयनाशकरीं प्रदेहि ॥ १३॥
वाक्चातुरी चलति नो चतुराननस्य
यच्छिक्तवर्णनविधौ खलु तत्र केयम् ।
अस्माकमल्पविदुषां नृगिरा वराकी
शक्ता भवेत्तदपि नाथ! वरं प्रदेहि ॥ १४॥
वीरश्रीजामदग्न्यस्य पुण्यं स्तोत्रमिदं नराः ।
पठन्त्यनन्यमनसो येऽर्थबोधपुरस्सरम् ॥ १५॥
दुःशासनान्तकरणी भीमा धर्मप्रबोधिनी ।
तेषां करगता शक्तिश्चकास्त्येव न संशयः ॥ १६॥
अङ्काष्टनन्दपृथिवीमितवैक्रमाब्दे
वैशाख शुक्ल गिरिजादिवसे ग्रहेशे ।
मार्तण्डतीर्थभवने जमदग्निपुत्र-
स्तोत्रं व्यधायि विदुषाऽमृत्वाग्भवेन ॥ १७॥
इति श्रीसर्वतन्त्रस्वतन्त्र महामहिम आचार्य
श्रीमदमृतवाग्भवप्रणीतं श्री परशुरामस्तोत्रं सम्पूर्णम् ।
विधिन्यासपूर्वकजपाद् ब्रह्मतेजप्राप्तिर्भवतीति मे मतिः ।
तन्त्रोक्त चमत्कारिक मन्त्र ध्यानम् -
सात्विकं श्वेतवर्णं च भस्मोद्धूलितविग्रहं
अग्रिहोत्रस्थलासीनं नानामुनिगणावृतम् ।
कम्बासनमारूढं स्वर्णतारकुशाङ्गुलिं
श्वेतवस्त्रद्वयोपेतं जुह्वन्तं राममाश्रये ॥
ॐ अस्य मन्त्रस्य भारद्वाज ऋषिः, गायत्री छन्दः,
श्रीपरशुरामो देवता मनोकामना प्राप्तये जपे विनियोगः ।
मन्त्रः -
ॐ ब्रह्मक्षेत्राय विद्महे क्षत्रियान्ताय धिमहि तन्नो रामः प्रचोदयात् ।
(इति)
Encoded and proofread by Bageshri Sathe