रामकृष्णभाईरचितं श्रीस्वामिनारायणस्तुतिः
सर्गस्थानलयादिकारणमहो कान्तिच्छटा भास्वरं
भीतिव्रातहरं वरेण्यविभवं कारुण्यपाथोनिधिम् ।
पृथ्वीभारहरं प्रपन्नवरदं तापत्रयोन्मूलकं
वन्दे त्वां पुरुषोत्तमं सुखनिधिं श्री स्वामिनारायणम् ॥ १॥
जीवेशाक्षरमुख्यतत्त्वनिचयादूर्ध्वे व्योमन
मायासंसृतिबन्धानात् परतरे धान्यक्षरे संस्थितम् ।
दिव्ये पीठवरे निजैरनुदिनं मुक्तव्रजैः सेवितं
वन्दे त्वां पुरुषोत्तमं सुखनिधिं श्री स्वामिनारायणम् ॥ २॥
ब्रह्माण्डाधिपतिं मुनीन्द्रविनुतं वन्दारुवृन्दार्चितं
अष्टैश्वर्यविभूषितं वररुचं मुक्तावलीश
अष्टाङ्गाहितयोगिसंस्तुतपदं योगीश्वरं मुक्तिदं
वन्दे त्वां पुरुषोत्तमं सुखनिधिं श्री स्वामिनारायणम् ॥ ३॥
सम्प्रत्यौद्धवमार्गरक्षणपरं श्रीपञ्चदेवात्मजं
भूमानन्दवचोऽमृतैः सकलभूकल्याणदं भूतिदम् ।
सत्सङ्गाश्रितवल्लभं प्रतिदिनं भक्तार्चिताङ्घ्रिद्वयं
वन्दे त्वां पुरुषोत्तमं सुखनिधिं श्री स्वामिनारायणम् ॥ ४॥
संसारोत्थितसर्वभीतिशमनं सौभाग्यवारान्निधिं
माङ्गल्याम्बुधिमन्वहं प्रणमतां सत्सङ्गिनां जीवनम् ।
ध्यातॄणां सुखहेतवे विदधतं नानाविधं चेष्टितं
वन्दे त्वां पुरुषोत्तमं सुखनिधिं श्रीस्वामिनारायणम् ॥ ५॥
चेतः शान्तिकरं मनोमलहरं पापेभपञ्चाननं
भक्तेष्टाभयदं कृपार्द्रहृदयं क्लेशाग्निसंवारकम् ।
आधिव्याधिहरं प्रशान्तललितं ज्ञानप्रकर्षप्रदं
वन्दे त्वां पुरुषोत्तमं सुखनिधिं श्रीस्वामिनारायणम् ॥ ६॥
पद्मस्पर्धिकरं प्रसन्नवदनं पादावधूताम्बुजं
दीनानुग्रहकातरं मधुमयं सद्भक्तसेवाप्रियं
संसारार्णवपारदं परतरं कष्टार्त्यनिष्टापहं
वन्दे त्वां पुरुषोत्तमं सुखनिधिं श्रीस्वामिनारायणम् ॥ ७॥
तमीशं भुवि सेविताङ्घ्रियुगलं सद्भक्तवृन्दैः सदा
नौमीड्यं परमेष्ठिनं गुणनिधिं श्रीनीलकण्ठं प्रभुम् ।
श्रीलं कारणकारणं नरतनुं सौख्यप्रदं स्वामिनं
वन्दे त्वां पुरुषोत्तमं सुखनिधिं श्रीस्वामिनारायणम् ॥ ८॥
इति रामकृष्णभाईरचितं श्रीस्वामिनारायणस्तुतिः समाप्ता ।