Shrimad Annavara Satyanarayana Suprabhata Stotram

 श्रीमदन्नवरसत्यनारायणसुप्रभातस्तोत्रम् 
श्रीरस्तु ।
उत्तिष्ठान्नवराधीश उत्तिष्ठ व्रतमोदित ।
उत्तिष्ठोत्तिष्ठ विश्वेश सत्यदेव दयानिधे ॥ १॥

ब्राह्मे मुहूर्त उत्थाय करिष्यन्ति तव व्रतम् ।
सत्यव्रतानुमोदार्थं उत्तिष्ठोत्तिष्ठ सत्वरम् ॥ २॥

उत्तिष्ठ निर्गुणाकार भक्तानां पालनं कुरु ।
उत्तिष्ठोत्तिष्ठ शुद्धात्मन् रत्नाद्रिवसतिप्रिय ॥ ३॥

उत्तिष्ठ कमलाकान्त उत्तिष्ठ पुरुषोत्तम ।
उत्तिष्ठानन्तपालेश त्रैलोक्यं परिपालय ॥ ४॥

विना सत्यदेवं कलौ नास्ति मुक्तिः
     सदा सत्यदेवं स्मरामि स्मरामि ।
करोमीश सत्यव्रतं दीनबन्धो
     न चान्यं स्मरामो न चान्यं भजामः ॥ ५॥

भजामि त्वदङ्घ्रिं न याचेऽन्यदेवं
     सदा देव याचे कृपालो भवन्तम् ।
प्रभो दीनबन्धो विभो लोकरक्षिन्
     शरण्यस्त्वमेवास्य दीनस्य नाथ ॥ ६॥

न जानामि धर्मं न जानामि चान्यं
     त्वमेकश्शरण्यो गतिस्त्वं त्वमेकः ।
अनाथं दरिद्रं जरारोगयुक्तं
     कृपापात्रमेनं कुरु श्रीनिवास ॥ ७॥

न तातो न माता न बन्धुर्न दाता
     गतिस्त्वं त्वमेकश्शरण्यस्त्वमेकः ।
हरीशं हरेशं सुरेशं गिरीशं
     भजेऽहं सदाहं न जानामि चान्यम् ॥ ८॥

प्रातः स्मरामि बलसत्यपदाब्जयुग्मं
     शीर्षोपरिस्थितगुरोरपरस्वरूपम् ।
वेदान्तवेद्यमभयं धृतदेवरूपं
     सत्यावतारजगतीतलपावनं च । ९॥

प्रातर्नमामि वरसत्यविभुं पवित्रं
     रक्षोगणाय भयदं वरदं जनेभ्यः ।
सत्यावतीसहितवीरवरस्वरूपं
     दीनानुपालनरतं परमादिदेवम् ॥ १०॥

प्रातर्भजामि वरसत्यपदारविन्दं
     पद्माङ्कुशादिशुभलाञ्छनरञ्जितं तत् ।
योगीन्द्रमानसमधुव्रतसेव्यमानं
     पापापहं सकलदीनजनावलम्बम् ॥ ११॥

प्रातर्वदामि वचसा वरसत्यनाम
     वाग्दोषहारिसकलाघनिवारणं च ।
सत्यव्रताचरणपावनभक्तजाल
     वाञ्छाप्रदातृसकलादृतभव्यतेजः । १२॥

प्रातः करोमि कलिकल्मषनाशकर्म
     तद्धर्मदं भवतु भक्तिकरं परं मे ।
अन्तःस्थितेन शुभभानुचिदात्मकेन
     सत्येन लोकगुरुणा मम सिद्धिरस्तु ॥ १३॥

लक्ष्मीसमेत जगतां सुखदानशील
     पद्मायतेक्षण मनोहरदिव्यमूर्ते ।
लोकेश्वर श्रितजनप्रिय सत्यदेव
     श्रीरत्नपर्वतनिकेतन सुप्रभातम् ॥ १४॥

पापापहार कलिदोषहरातिदक्ष
     श्रीमन्नगालय मनोहरसत्यमूर्ते ।
कारुण्यवीक्षण महामहिमाढ्य देव
     नित्यं प्रभातसमये तव सुप्रभातम् ॥ १५॥

तापत्रयापहर सत्यवतीप्रसन्न
     दामोदरामरपते कमलासुसेव्य ।
उत्तिष्ठ पालय दरिद्रजनालिबन्धो
     सत्यव्रतप्रिय विभो तव सुप्रभातम् ॥ १६॥

श्रीपद्मनाभ पुरुषोत्तम सत्यदेव
     पम्पानदीतटनिवास समस्तरूप ।
संसारबन्धनविमोचन दीनबन्धो
     श्रीकृष्ण पालक विभो तव सुप्रभातम् ॥ १७॥

श्रीराम एव भवदीय दयाविशेषात्
     सेतुं बबन्ध जितरावणराक्षसौघः ।
सत्यव्रतस्य महिमा गदितुं न शक्या
     सत्यव्रतप्रियपते तव सुप्रभातम् ॥ १८॥

सत्यव्रतस्य फलदानवशानुबद्ध
     सन्तानलाभकर हे प्रभुसत्यदेव ।
सक्तालिरिच्छति तव व्रतसाधनं भोः
     उत्तिष्ठ साधय विभो तव सुप्रभातम् ॥ १९॥

संसेव्य साधुहृदि संस्फुरदात्मतत्त्वं
     सच्चित्सुखं परमनन्तमतीन्द्रियं च ।
प्राप्नोति भक्त इह मुक्तिपदं स्थिरं च
     मां रक्ष नित्यकृपया तव सुप्रभातम् ॥ २०॥

सत्यप्रभुस्तु मनसो वचसामगम्यः
     वाचो विभान्ति निखिला यदनुग्रहेण ।
यस्य व्रताचरणभाग्यमहं स्मरामि
     नारायणाच्युत विभो तव सुप्रभातम् ॥ २१॥

साम्बेन युक्तवरसत्यविभुस्वरूपः
     सेव्यः सदा हरिहरात्मकदिव्यमूर्तिः ।
एतादृशः स्थितिरगम्यमहाविचित्रः
     त्वं देव पालय विभो तव सुप्रभातम् ॥ २२॥

श्रीमन्नभीष्टवरदाखिललोकबन्धो
     श्री श्रीनिवास जनतापह वीरवर्य ।
श्री भ्राजदन्नवरवास सुसत्यमूर्ते
     मां पाहि पाहि वरदाच्युत सुप्रभातम् ॥ २३॥

इति श्रीसत्यनारायण सुप्रभातं समाप्तम् ।

Proofread by PSA Easwaran