शतानन्दमुनिकृता श्रीहरिस्तुतिः
(शार्दूलविक्रीडितम्)
नीलेन्दीवरलोचनं शशिमुखं सन्दीप्तरूपार्चितं
श्रीमत्केसरचन्दनार्चितमथो हारावलीभूषितम् ।
सद्दिव्याक्षरधामसंस्थितममुं मन्दस्मितं राजितं
वन्देऽहं पुरुषोत्तमं प्रभुवरं श्रीस्वामिनारायणम् ॥ १॥
शिक्षापत्रिविचारमौक्तिकप्रभासर्वात्मतासाधकं
दिव्याभैर्वचनामृतोत्थरणितैः सन्ध्वस्तजाड्यावलिम् ।
श्रीशाल्युद्धवमार्गचालकमहो धर्मात्मजं श्रीहरिं
वन्देऽहं पुरुषोत्तमं प्रभुवरं श्रीस्वामिनारायणम् ॥ २॥
प्रोद्दामप्रसरत्प्रशस्यमहिम श्रीधीधृतिप्रार्चितं
त्रैलोक्येष्टविधानगौरवचणप्रज्ञाविभालङ्कृतम् ।
सर्वानन्दकरप्रचारुचरितं वन्दारुसंवन्दितं
वन्देऽहं पुरुषोत्तमं प्रभुवरं श्रीस्वामिनारायणम् ॥ ३॥
अष्टैश्वर्यविभूषितञ्च सहजानन्दप्रपावर्षिणं
सर्वप्रार्थितदिव्यभव्यविभवोद्दीप्तप्रभावं ध्रुवम् ।
भक्ताभीष्टततिप्रदाननिपुणं कारुण्यरत्नाकरं
वन्देऽहं पुरुषोत्तमं प्रभुवरं श्रीस्वामिनारायणम् ॥ ४॥
नव्योत्सर्पिरुचिप्रभावनिबिडप्रोल्लासिशर्म्मप्रदं
स्कन्धालम्बितदिव्यकुण्डलधरं मन्दोन्नतभ्रूलतम् ।
सर्वं स्थावरजङ्गमं जगदिदं सञ्चालयन्तं सदा
वन्देऽहं पुरुषोत्तमं प्रभुवरं श्रीस्वामिनारायणम् ॥ ५॥
यन्नामश्रवणेन केवलमहो पापोच्चयो नश्यति
यन्नामप्रजपेन जायत अहो संवित्प्रभासञ्चितिः ।
यन्मूर्तिप्रविलोकनेन सहसा बोभोति मुक्तिर्नृणां
वन्देऽहं पुरुषोत्तमं प्रभुवरं श्रीस्वामिनारायणम् ॥ ६॥
भर्तारं हरिकृष्णदेवमनघं कार्तान्तकृन्तनं
चेतोध्वान्तहरं समस्तजगतामेकान्तरक्षाकरम् ।
दिव्यौदार्यसमञ्चितं शुभकरं मुक्तिप्रदं सौख्यदं
वन्देऽहं पुरुषोत्तमं प्रभुवरं श्रीस्वामिनारायणम् ॥ ७॥
आनन्दैकरसप्रवाहसरसं देवाधिदेवं विभुं
योगक्षेमवितानकर्म्मलसितं सत्कर्मचुञ्चप्रियम् ।
श्रेयः सर्वजनीनमाशुविमलं विस्तारयन्तं भुवि
वन्देऽहं पुरुषोत्तमं प्रभुवरं श्रीस्वामिनारायणम् ॥ ८॥
इति श्रीस्वामिनारायणबापाचरित्रामृतसागरे चतुर्थप्रवाहे
चतुर्थतरङ्गे शतानन्दमुनिकृता श्रीहरिस्तुतिः सम्पूर्णा ।