स्नेहलतिकया कृतं पुरुषोत्तमस्तोत्रम् ११
(धनिष्ठकोशश्रेष्ठिनः भार्यया स्नेहलतिकया कृतं पुरुषोत्तमस्तोत्रम्०)
अथाऽस्य पुत्राः पुत्र्यश्च पत्नी साध्वी सधर्मिणी ॥ २७॥
नाम्ना स्नेहलतादेवी शुशोच स्वपतिस्थितिम् ।
महाभागवती पत्नी भजते श्रीहरिं तु माम् ॥ २८॥
प्रार्थयत्येव पूजायां पत्युर्धर्मस्य रक्षणम् ।
अधर्मस्य परित्यागं यशः कीर्तिं सुवंशजाम् ॥ २९॥
बालकृष्ण हरे कृष्ण पुरुषोत्तम माधव ।
तव भक्तस्य चित्ते यच्चाञ्चल्यं तत्प्रशामय ॥ ३०॥
अनादिश्रीकृष्ण नारायण श्रीकान्त केशव ।
मम पत्युर्व्यवायस्य व्यसनं त्वं प्रमोचय ॥ ३१॥
राजाऽपि तव भक्तः स्यात्तथा कृष्ण विधेहि च ।
गणिका अपि भक्ताः स्युर्यथा ते परमात्मनः ॥ ३२॥
प्रजाश्चापि च भक्ताः स्युस्तथा कृष्ण कृपां कुरु ।
व्रतं चाद्यदिनात्तेऽहं वर्षान्तं त्वेकभोजनम् ॥ ३३॥
करिष्ये च तथा साधुसतीसेवा समाहिता ।
प्रत्यहं पूजनं ते च करिष्ये घटिकावधिम् ॥ ३४॥
षोडशैरुपचारैश्च कारयिष्ये तु सूतके ।
प्रेङ्खां स्वर्णमयीं चापि मूर्तिं स्वर्णमयीं च ते ॥ ३५॥
कारयिष्ये श्रिया युक्तां राधया रमया युताम् ।
पद्मावत्या युतां युक्तां माणिक्यया च शोभनाम् ॥ ३६॥
लक्ष्म्या युक्तां तथा रम्यां विभूषाढ्यां सुयौवनाम् ।
शय्यापर्यङ्कमेवापि कारयिष्ये शुभोत्तमाम् ॥ ३७॥
स्वर्णराजतजन्यं च तवोपकरणान्यपि ।
व्यजने चामरे छत्रं पादुके भूषणानि च ॥ ३८॥
कारयिष्ये स्वर्णरत्नमयानि तव तुष्टये ।
नित्यं सुगन्धसारैश्च तैलसारैश्च मर्दनम् ॥ ३९॥
अभ्यञ्जनं द्रवैश्चापि पूजनं तुलसीदलैः ।
नैवेद्यं घृतमिष्टानैः कारयिष्येऽतितुष्टये ॥ ४०॥
तवोत्सवान् कारयिष्ये वार्षिकान् कान्त केशव ।
वणिजं मे पतिं वाराङ्गनाव्यसनान्मोचय ॥ ४१॥
एषा ते शरणं प्राप्ता पतिता तव पादयोः ।
मम पत्युस्तु पापानि प्रज्वालय प्रियं कुरु ॥ ४२॥
इत्युक्त्वा स्नेहलतिका दीपोत्सवीदिने हरेः ।
कृत्वा मे पूजनं चाप्यासंवत्सरं व्रतं व्यधात् ॥ ४३॥
इति श्रीलक्ष्मीनारायणीयसंहितायाः द्वापरयुगसन्तानात्मकस्य तृतीयखण्डे
१९२-अध्यायान्तर्गतं धनिष्ठकोशश्रेष्ठिनः भार्यया
स्नेहलतिकया कृतं पुरुषोत्तमस्तोत्रं सम्पूर्णम् ।
लक्ष्मीनारायणीयसंहिता । खण्ड ३। अध्याय १९२/२७-४३॥
lakShmInArAyaNIyasaMhitA . khaNDa 3. adhyAya 192/27-43..
Proofread by PSA Easwaran