श्री तोताद्रिनाथ मङ्गलाशासनम्
श्रीः ।
श्रीमते रामानुजाय नमः ।
श्रीमद् वरवर मुनये नमः ।
श्रीमद् वानमहाचल गुरुभ्यो नमः ।
अथ श्रीतोताद्रिनाथमङ्गलाशासनम् ।
विष्णुचित्त मुनीन्द्रस्य विमलाङ्घ्रियुगे नतिम् ।
विधाय देवदेवस्य विदधे मङ्गलावळिम् ॥ १॥
श्रीदेवि भूमिसेव्याय दिनकृच्चन्द्रभासिने ।
देवीयुग्मोपवीज्याय देवदेवाय मङ्गलम् ॥ २॥
मार्कण्डेयेन भृगुणा सेनान्या च गरुत्मता ।
वन्द्याय सततं वानमहाशैलाय मङ्गलम् ॥ ३॥
शेषतल्पपनिषण्णाय शेषभूतखिलात्मने ।
शेषिताश्रितदोषाय शेषिणे मम मङ्गलम् ॥ ४॥
श्रीवैकुण्ठविमानाग्र्ये श्रीपङ्काब्जसरस्तटे ।
स्वयं व्यक्ताय मेदिन्यां सुरनाथाय मङ्गलम् ॥ ५॥
प्रयोगचक्रहस्ताय प्रणताभयदायिने ।
प्रसन्नवदनाब्जाय प्रफुल्लाक्षाय मङ्गलम् ॥ ६॥
अङ्कविन्यस्तसव्यश्री हस्तेनाश्रयणोन्मुखान् ।
आरोपयितुमुत्सङ्गं आदृतायेव मङ्गलम् ॥ ७॥
प्रीतिपुष्करिणीरूप लक्ष्मीकौस्तुभवक्षसे ।
प्रलम्बकुण्डलानृष्ट वनमालाय मङ्गलम् ॥ ८॥
प्रकाशाय प्रथमतः प्रियरोमशयोगिनः ।
प्रमग्नोद्धरणाद् भूमेः प्रियकाराय मङ्गलम् ॥ ९॥
नैमिशारण्यवासानां व्रतिनां प्रीतिहेतवे ।
भौमदेवसुतार्तिघ्ने भव्यरूपाय मङ्गलम् ॥ १०॥
पङ्कपद्मसरस्नातां सङ्कल्पफलयिष्णवे ।
किङ्करीकृतलोकाय पङ्कजाक्षाय मङ्गलम् ॥ ११॥
वैनतेयानुरोधेन वैखानसमुनिं गुरुम् ।
नियुज्य निजपूजायां नित्यहृष्टाय मङ्गलम् ॥ १२॥
गुणशीलस्य राजर्षेः शुनो रूपेण शोचतः ।
विनोदिताग्रयशापाय व्योमाद्रीशाय मङ्गलम् ॥ १३॥
पद्मतीर्थतटीतप्यत् पद्मापाणिगृहीतये ।
पद्मजन्मप्रगीताय पद्मनाभाय मङ्गलम् ॥ १४॥
शठकोपशरण्याय सर्वदेवान्तरात्मने ।
सहस्रगीतिसाराय सुपर्वेशाय मङ्गलम् ॥ १५॥
वानाद्रियोगिना नित्यं वरमङ्कारमामुदे ।
ननोपचारसेव्याय मानातीताय मङ्गलम् ॥ १६॥
सर्वोत्सवसमाजेषु शताधिकसुवैष्णवैः ।
चतुस्सहश्रीगाधाभिः शम्स्यमानाय मङ्गलम् ॥ १७॥
फाल्गुनोत्तरफल्गुन्योश्चैत्रे चाहनि रौहिणे ।
तीर्थान्तादि महद्वन्द्व सेवनीयाय मङ्गलम् ॥ १८॥
भट्टनाथयतीन्द्रेण भक्तिभावितगोरथे ।
भव्यदेन्दिरया साकं भासमानाय मङ्गलम् ॥ १९॥
स्वर्णशैलसमानाभे पुण्यकोटिविमानके ।
कलिजिद्योगिन्सङ्कॢप्ते कान्ताहृष्टाय मङ्गलम् ॥ २०॥
सहकारवनाभोगे सह देव्या विहारिणे ।
वसन्तऋतुयात्रायां वानाद्रीशाय मङ्गलम् ॥ २१॥
व्याख्यातोभयवेदान्ते वानाचलमठे मुदा ।
वैष्णवाराधनान्नित्यं वर्धमानाय मङ्गलम् ॥ २२॥
श्रीभूमिगोदादेवीभिः साकं श्रिवरमङ्कया ।
दिव्यसिम्हासनस्थाय देवनाथाय मङ्गलम् ॥ २३॥
तोदाद्रिनाथसान्निध्ये गोपालार्यनिवेदितम् ।
मङ्गलं पठितॄणां श्रीवरमङ्का प्रसीदतु ॥ २४॥
॥ इति श्रीगोपाल अय्य्ंगारविरचितं तोदाद्रिनाथमङ्गलाशासनं सम्पूर्णम् ॥