Shri Varadanarayana Prarthana

 श्रीवरदनारायण प्रार्थना 
पद्मासनाय मणिकुण्डल शोभिताय
      भास्वज्जटामुकुटमण्डितमस्तकाय ।
लक्ष्मीवराय जनपालन तत्पराय
      नारायणाय बदरीपतये नमोऽस्तु ॥ १॥

ध्यानस्थिताय सरसीरुहलोचनाय
      विद्युत्प्रभायुतपयोधरसन्निभाय ।
मन्दस्मितेन्दुवदनाय चतुर्भुजाय
      नारायणाय बदरीपतये नमोऽस्तु ॥ २॥

सर्वाय तापशमनाय नतप्रियाय
      भव्याय भूतजनकाय सुरोत्तमाय ।
शर्वाय सर्वदमनाय मनोहराय
      नारायणाय बदरीपतये नमोऽस्तु ॥ ३॥

व्यासोद्धवादिवरदाय दयामयाय
      ब्रह्मात्मजप्रमुखसन्मुनिसंस्तुताय ।
श्रीशङ्करेण पुनराहितविग्रहाय
      नारायणाय बदरीपतये नमोऽस्तु ॥ ४॥

लक्ष्मीसुपर्णधनदार्जुनसेविताय
      सूर्यार्चिताय मरुतात्मजवन्दिताय ।
भक्तार्चिषे नरसखाय सुखप्रदाय
      नारायणाय बदरीपतये नमोऽस्तु ॥ ५॥

नन्दप्रियाय कपिलाय सनातनाय
      दक्षाय नैकसुखदाय गदाग्रजाय ।
श्रीविठ्ठलाय हिमशैलवरे स्थिताय
      नारायणाय बदरीपतये नमोऽस्तु ॥ ६॥

गोविन्द माधव मुकुन्द नितान्तकान्त-
      नामप्रियाय सुलभाय कृपाघनाय ।
सत्याय भक्तहितबोधपरायणाय
      नारायणाय बदरीपतये नमोऽस्तु ॥ ७॥

नित्याय सर्वगतये जगदीश्वराय
      मूर्ताय यज्ञपतये निरुपाधिकाय ।
देवाय वेदमतयेऽमितविक्रमाय
      नारायणाय बदरीपतये नमोऽस्तु ॥ ८॥

गोपाय वीरविजयाय धराधराय
      बीजाय सुव्रतकराय महाधनाय ।
ईज्याय लोकगुरवे गरुडध्वजाय
      नारायणाय बदरीपतये नमोऽस्तु ॥ ९॥

कौमोदकीदरसुदर्शननन्दकादि-
      दिव्यायुधप्रहरणाय महाक्रमाय ।
त्रैलोक्यमङ्गलकराय रमेश्वराय
      नारायणाय बदरीपतये नमोऽस्तु ॥ १०॥

रामाय सत्यतरधर्मविदुत्तमाय
      प्राणाय बुद्धिकरणाय शुभेक्षणाय ।
शुद्धात्मने करणकार्यकृतेऽव्ययाय
      नारायणाय बदरीपतये नमोऽस्तु ॥ ११॥

प्रेम्णास्वभक्तजनवाञ्छितपूरणाय
      सन्दर्शितात्मवपुषे नतवत्सलाय ।
स्निग्धप्रसन्नहसिताय हितोत्तमाय
      नारायणाय बदरीपतये नमोऽस्तु ॥ १२॥

स्पर्शेन दिव्यमृदुना करनीरजस्य
      संवर्धकाय चरणानतभाग्यराशेः ।
सञ्जीवकाय जनकाय च पालकाय
      नारायणाय बदरीपतये नमोऽस्तु ॥ १३॥

तेजोमयाय करुणामृतसागराय
      निष्कारणाय वरदाय च निस्तुलाय ।
कल्पद्रुमाय सुखदाय निरामयाय
      नारायणाय बदरीपतये नमोऽस्तु ॥ १४॥

भोः पाहि पाहि भगवन् शरणागतं माम्
      बुद्धिं स्थिरां कुरु सदैव मनः प्रसन्नम् ।
नित्यं मदीय रसनाग्ररसाङ्गणेऽस्मिन्
      नारायणाय बदरीपतये नमोऽस्तु ॥ १५॥

इति स्वामी वरदानन्दभारतीविरचितं श्रीवरदनारायण प्रार्थना सम्पूर्णा ।

ॐ श्रीः स्वस्ति ।

भावार्चना (प्राचार्य अ. दा. आठवले)


https://www.santkavidasganu.org, https://www.youtube.com/@varad-vani1496


Eन्चोदेद् अन्द् प्रूफ़्रेअद् ब्य् Pरीति Bहन्दरे