ब्रह्मादिभिः कृतं सूर्यस्तोत्रम् १०
ज्ञात्वा च परमात्मानं सर्व एव पृथक् पृथक् ।
दिव्याभिः स्तुतिभिर्देवः स्तुतोऽऽस्माभिस्तदेश्वरः ॥ ८॥
ब्रह्मादय ऊचुः ।
आदिदेवोऽसि देवानामैश्वर्याच्च त्वमीश्वरः ।
आदिकर्त्ताऽसि भूतानां देवदेवो दिवाकरः ॥ ९॥
जीवनः सर्वभूतानां देवगन्धर्वरक्षसाम् ।
मुनिकिन्नरसिद्धानां तथैवोरगपक्षिणाम् ॥ १०॥
त्वं ब्रह्मा त्वं महादेवस्त्वं विष्णुस्त्वं प्रजापतिः ।
वायुरिन्द्रश्च सोमश्च विवस्वान्वरुणस्तथा ॥ ११॥
त्वं कालः सुष्टिकर्त्ता च हर्ता भर्ता तथा प्रभुः ।
सरितः सागराः शैला विद्युदिन्द्रधनूंषि च ॥ १२॥
प्रलयः प्रभवश्चैव व्यक्ताव्यक्तः सनातनः ।
ईश्वरात्परतो विद्या विद्यायाः परतः शिवः ॥ १३॥
शिवात्परतरो देवस्त्वमेव परमेश्वरः ।
सर्वतः पाणिपादान्तः सर्वतोऽक्षिशिरोमुखः ॥ १४॥
सहस्रांशुः सहस्रास्यः सहस्रचरणेक्षणः ।
भूतादिर्भूर्भुवःस्वश्च महः सत्यं तपो जनः ॥ १५॥
प्रदीप्तं दीपनं दिव्यं सर्वलोकप्रकाशकम् ।
दुर्निरीक्षं सुरेन्द्राणां यद्रूपं तस्य ते नमः ॥ १६॥
सुरसिद्धगणैर्जुष्टं भृग्वत्रिपुलहादिभिः ।
स्तुतं परममव्यक्तं यद्रूपं तस्य ते नमः ॥ १७॥
वेद्यं वेदविदां नित्यं सर्वज्ञानसमन्वितम् ।
सर्वदेवातिदेवस्य यद्रूपं तस्य ते नमः ॥ १८॥
विश्वकृद्विश्वभूतं च वैश्वानरसुरार्चितम् ।
विश्वस्थितमचिन्त्यं च यद्रूपं तस्य ते नमः ॥ १९॥
परं यज्ञात् परं वेदात् परं लोकात् परं दिवः ।
परमात्मेत्यभिख्यातं यद्रूपं तस्य ते नमः ॥ २०॥
अविज्ञेयमनालक्ष्यमध्यानगतमव्ययम् ।
अनादिनिधनं चैव यद्रूपं तस्य ते नमः ॥ २१॥
नमो नमः कारणकारणाय नमो नमः पापविमोचनाय ।
नमो नमस्ते दितिजार्दनाय नमो नमो रोगविमोचनाय ॥ २२॥
नमो नमः सर्ववरप्रदाय नमो नमः सर्वसुखप्रदाय ।
नमो नमः सर्वधनप्रदाय नमो नमः सर्वमतिप्रदाय ॥ २३॥
स्तुतः स भगवानेवं तैजसं रूपमास्थितः ।
उवाच वाचा कल्याण्या को वरो वः प्रदीयताम् ॥ २४॥
इति ब्रह्मपुराणे त्रयस्त्रिंशाध्यायान्तर्गतं
ब्रह्मादिभिः कृतं सूर्यस्तोत्रं समाप्तम् ।
ब्रह्मपुराण । अध्याय ३३/९-२३॥
brahmapurANa . adhyAya 33/9-23..
Proofread by PSA Easwaran