श्रीसूर्यार्याद्वादशकस्तुतिः
उद्यन्नद्य विवस्वानारोहन्नुत्तरां दिवं देवः ।
हृद्रोगं मम सूर्यो हरिमाणं च नाशयतु मे मित्रः ॥ १॥
ॐ मित्राय नमः ।
निमिषार्धेनैकेन क्रममाणो द्वे शते द्वे सहस्रे च ।
यो योजनानां नमोऽस्तु तस्मै श्रीनलिननाथाय रवये ॥ २॥
ॐ रवये नमः ।
शिवस्वरूपाद् ज्ञानं त्वत्तो मुक्तिं जनार्दनाकारात् ।
शिखिरूपाच्चैश्वर्यं भवतश्चारोग्यमिच्छाम्यहं सूर्य ॥ ३॥
ॐ सूर्याय नमः ।
कर्मज्ञानखदशकं मनश्च जीव इति विश्वसर्गाय ।
यो द्वादशधा चरति द्वादशकलो मुदेऽस्तु मे भानुः ॥ ४॥
ॐ भानवे नमः ।
त्वमृग्यजुस्त्वं त्वं सामाथर्वस्त्वं त्वमागमस्त्वं वषट्कारः ।
त्वं हंसः परमहंसः त्वं प्राज्ञः त्वं महत्त्वं खगोऽसि त्वम् ॥ ५॥
ॐ खगाय नमः ।
त्वचि दोषा दृशि दोषा हृदि दोषा ये निखिलेन्द्रियेषु दोषाः ।
तान्भगवानपनयतु कृपातरङ्गितदृष्ट्या मम पूषा ॥ ६॥
ॐ पूष्णे नमः ।
तिमिरमिव नेत्रतिमिरं पटलमिव रोगपटलं कोशात् ।
काचमिवाधिं निराकुर्यात् कालत्रयार्च्यो हिरण्यगर्भोऽसौ ॥ ७॥
ॐ हिरण्यगर्भाय नमः ।
धर्मार्थकाममोक्षप्रतिघातानुग्रवेगतापकरान् ।
बन्दीकृतेन्द्रियगणान् गदान् चण्डांशुरपनयतु मरीचिः ॥ ८॥
ॐ मरीचये नमः ।
येन विनान्धं तिमिरं जगदेति यस्मिन्सति च सुबोधम् ।
तं च नलिनीभर्तारं हर्तारमापदो नौम्यहमादित्यम् ॥ ९॥
ॐ आदित्याय नमः ।
यस्य सहस्राभीशोरभीशुलेशो हि हिमांशुबिम्बगतः ।
भासयति नक्तमखिलं खिलयतु विपदः सदा सविता ॥ १०॥
ॐ सवित्रे नमः ।
काशाश्मरिदुर्नामत्वग्रोगमहोदर प्रमेहांश्च ।
ग्रहणी भगन्दराद्यान् महारुजस्त्वमर्क हरसि जन्तूनाम् ॥ ११॥
ॐ अर्काय नमः ।
त्वं शरणं त्वं माता त्वं च पिता त्वं धनं त्वमाचार्यः ।
त्वं भर्ता त्वं हर्ता विपदां प्रसीद भास्कर मे सततम् ॥ १२॥
ॐ भास्कराय नमः ।
इत्यार्याद्वादशकं साम्बात्पुरतो नभःस्थलात्पतितम् ।
पठतां भाग्यसमृद्धिः भूयसी समस्तरोगोपशान्तिश्च ॥ १३॥
चाक्षुष्मतीं(१) विद्यां सौरीं जप्त्वाऽऽदावनयाऽऽनम्य मार्ताण्डम् ।
अन्धानां जन्मतो दृष्टिः शीघ्रं गृह्णाति दूरतो विषयान् ॥ १४॥
हेमाम्भोजप्रवालप्रतिमनिजरुचिं चारु खट्वाङ्गपद्मं
चक्रं शक्तिं च पाशं सृणिमतिरुचिरामक्षमालां कपालम् ।
हस्ताम्भोजैर्दधानं त्रिनयनविलसद्वेदवक्त्राभिरामं
मार्ताण्डं वल्लभार्धं मणिमयमकुटं हारदीप्तं भजामः ॥ १५॥
सूर्यं सुन्दरलोकनाथममृतं वेदान्तसारं शिवं
ज्ञानं ब्रह्ममयं सुरेशममलं लोकैकचित्तं स्वयम् ।
इन्द्रादित्य नराधिपं सुरगुरुं त्रैलोक्य चूडामणिं
विष्णुब्रह्म शिवस्वरूपमनिशं वन्दे सदा भास्करम् ॥ १६॥
भानो भास्कर मार्ताण्ड चण्डरश्मे दिवाकर ।
आयुरारोग्यमैश्वर्यं विद्यां देहि नमोऽस्तुते ॥ १७॥
१ चक्षुष्मती विद्या-चाक्षुषोपनिषदि-अस्याः चाक्षुषी विद्यायाः अहिर्बुध्न्य
ऋषिः । गायत्री छन्दः । सूर्यो देवता । चक्षुरोगनिवृत्तये जपे विनियोगः ।
(मन्त्रः) ॐ चक्षुः चक्षुः चक्षुः तेजः स्थिरो भव । मां पाहि पाहि ।
त्वरितं चक्षुरोगान् शमय शमय । मम जातरूपं तेजो दर्शय दर्शय ।
यथाऽहमन्धो न स्यां तथा कल्पय कल्पय कल्याणं कुरु कुरु । यानि मम
पूर्वजन्मोपार्जितानिःचक्षुःप्रतिरोधकदुष्कृत्यानि सर्वाणि निर्मूलय
निर्मूलय । ॐ नमश्चक्षुस्तेजोदात्रे दिव्याय भास्कराय । ॐ नमः
करुणाकरायामृताय । ॐ नमः सूर्याय । ॐ नमो भगवते सूर्यायाक्षितेजसे
नमः । खेचराय नमः । महते नमः । रजसे नमः । तमसे नमः । असतो मा
सद्गमय । तमसो मा ज्योतिर्गमय । मृत्योर्मा अमृतं गमय । उष्णो
भगवाञ्छुचिरूपः । हंसो भगवान् शुचिरप्रतिरूपः । य इमां चक्षुष्मतीविद्यां
ब्राह्मणो नित्यमधीते न तस्याक्षिरोगो भवति । न तस्य कुले अन्धो भवति ।
अष्टौ ब्राह्मणान् ग्राहयित्वा विद्यासिद्धिर्भवति । ॐ विश्वरूपं घृणिनं
जातवेदसं हिरण्मयं पुरुषं ज्योतिरूपं तपन्तम् । विश्वस्य योनिं प्रतपन्तमुग्रं
पुरः प्रजानामुदयत्येष सूर्यः । ॐ नमो भगवते आदित्याय
अहोवाहिन्यहो वाहिनि स्वाहा । ॐ वयः सुपर्णा उपसेदुरिन्द्रं प्रियमेधा
ऋषयो नाधमानाः । अपध्वान्तमूर्णुहि पूर्द्धि चक्षुर्मुमुग्ध्यस्मान्निधयेव
बद्धान् । पुण्डरीकाक्षाय नमः । पुष्करेक्षणाय नमः । अमलेक्षणाय
नमः । कमलेक्षणाय नमः । विश्वरूपाय नमः । महाविष्णवे नमः ।
चाक्षुष्मती विद्या -अक्ष्युपनिषदि-
ॐ नमो भगवते सूर्यायाक्षितेजसे नमः । ॐ खेचराय नमः ।
ॐ महासेनाय नमः । ॐ तमसे नमः । ॐ रजसे नमः । ॐ सत्त्वाय नमः ।
असतो मा सद्गमय । तमसो मा ज्योतिर्गमय । मृत्योर्मा अमृतं गमय । उष्णो
भगवान् शुचिरूपः । हंसो भगवान् शुचिरप्रतिरूपः । विश्वरूपं घृणिनं
जातवेदसं इरामयं ज्योतीरूपं तपन्तम् । सहस्ररश्मिः शतधा वर्तमानः
प्राणः प्रजानामुदयत्येष सूर्यः । ॐ नमो भगवते श्रीसूर्यायाक्षितेजसेऽहो
वाहिनि वाहिनि स्वाहा ॥
इति श्रीसूर्यार्याद्वादशकस्तुतिः समाप्ता ।
(This is similar to sUryastutI dvAdashAryA sAmbakRita)
Proofread by Aruna Narayanan