अगस्त्यद्वादशनामावलिः
अगस्त्यनामावलिः
काश्यपः --
शिवशर्मन् महाभाग श्रुणु ते कथयाम्यहम् ।
यस्य विज्ञानमात्रेण स्वयमायान्ति सम्पदः ॥ ४॥
अश्रोत्रियेषु पापेषु वेदमार्गविरोधिषु ।
न दातव्यमिदं स्तोत्रं मन्त्रराजं महामते ॥ ५॥
ऋषिरिन्द्रस्तथानुष्टुप् छन्दो देवो घटोद्भवः ।
सर्वाभीष्टस्य सिध्यर्थे जपोऽयं विनियोजितः ॥ ६॥
पाटीरशैलकोटीरमणिपीठाय वेधसे ।
मुनये कुम्भजायोद्यदनुकम्पाब्धये नमः ॥ ७॥
लोपामुद्रासमायुक्तं महायोगासनस्थितम् ।
प्रसन्नं तपसां राशिं प्रणुमः कुम्भसम्भवम् ॥ ८॥
इति ध्यात्वा नमस्कृत्य जपेन्नामावलिं मनुम् ।
अगस्त्यः कुम्भसम्भूतो मैत्रावरुणिरब्धिपः ॥ ९॥
लोपामुद्रापतिश्श्रीमान् वातापील्वलभक्षणः ।
विन्ध्याद्रिमथनो योगी महामलयकेतनः ॥ १०॥
सर्वतीर्थात्मकपदो भक्ताभीष्टफलप्रदः ।
लोपामुद्राभुजाश्लेषहर्षरोमाञ्चमूर्तिमान् ॥ ११॥
नाम्नां द्वादशकं पुण्यमगस्त्यस्य महात्मनः ।
पठन्त्यपि च शृण्वन्ति ते वै सुकृतिनः परम् ॥ १२॥
तेषामभीष्टदानाय भगवान् कुम्भसम्भवः ।
अद्याभ्युद्यत्कराम्भोजो नात्र कार्या विचारणा ॥ १३॥
यशस्यं धन्यमायुष्यं ज्ञानदं भुक्तिमुक्तिदम् ।
नाम्नां स्तोत्रं पठेद्विद्वान् पुरुषार्थाः करे स्थिताः ॥ १४॥
विमलहृदयमुच्चैर्वेदवेदान्तवेद्यं
विधिमुखसुरपूज्यं भूतिरुद्राक्षभाजम् ।
मुनिवरममलाङ्ग्या धर्मपत्न्याऽऽप्तभागं
कलशजमभिरामं नौमि कारुण्यमूर्तिम् ॥ १५॥
इत्येतत्परमं गुह्यं मन्त्रं सर्वार्थसाधकम् ।
यतीश्वरादनुप्राप्य प्राप्तवान् परमं सुखम् ॥ १६॥
नित्यप्रमोदभूयिष्ठं प्रमोदः प्राप्तसौभगः ।
उपर्युपरि धर्मस्य प्राप्तभूतो न संशयः ॥ १७॥
चन्दनाद्रिसमुद्भूते सत्ये शङ्करलालिते ।
त्वयि स्नास्ये सुप्रसन्ने पाहि मां भवसागरात् ॥ १८॥
इति मन्त्रं समुच्चार्य स्नात्वा ताम्रानदीजले ।
पितॄन् देवान् ऋषीन् तर्प्य नाभिदघ्नजले स्थितः ॥ १९॥
जपेन्मन्त्रमिदं मन्त्री त्रिवारं विजितेन्द्रियः ।
षण्मासादेव सुप्रीतस्तस्य भूयाद्घटोद्भवः ॥ २०॥
शिवशर्मन् त्वया जप्यं प्रत्यहं प्रीतिमिच्छता ।
इति तेन समाख्यातां कथां कलिमलापहाम् ॥ २१॥
इति ताम्रपर्णीमाहात्म्ये एकत्रिंशाध्यायान्तर्गतं
अगस्त्यद्वादशनामावलिः
ताम्रपर्णीमाहात्म्य । अध्याय ३१/४-२१॥
tAmraparNImAhAtmya . adhyAya 31/4-21..
Proofread by PSA Easwaran