श्रीजनमङ्गलस्तोत्रम्
श्री हरये नमः ।
नमोनमः श्रीहरये बुद्धिदाय दयावते ।
भक्तिधर्माङ्गजाताय भक्तकल्पद्रुमाय च ॥ १॥
सुगन्धपुष्पहाराद्यैर्विविधैरुपहारकैः ।
सम्पूजिताय भक्तौघैः सिताम्बरधराय च ॥ २॥
नाम्नामष्टोत्तरशतं चतुर्वर्गमभीप्सताम् ।
सद्यः फलप्रदं नॄणां तस्य वक्ष्यामि सत्पतेः ॥ ३॥
अस्य श्रीजनमङ्गलाख्यस्य श्रीहर्यष्टोत्तरशत-
नामस्तोत्रमन्त्रस्य शतानन्द ऋषिः ।
अनुष्टुप् छन्दः ।
धर्मनन्दनः श्रीहरिर्देवता । धार्मिक इति
बीजम् । बृहद्व्रतधर इति शक्तिः । भक्तिनन्दन
इति कीलकम् । चतुर्वर्गसिद्ध्यर्थे जपे विनियोगः ।
अथ ध्यानम् ।
वर्णिवेषरमणीयदर्शनं मन्दहासरुचिराननाम्बुजम् ।
पूजितं सुरनरोत्तमैर्मुदा धर्मनन्दनमहं विचिन्तये ॥ ४॥
श्रीकृष्णः श्रीवासुदेवो नरनारायणः प्रभुः ।
भक्तिधर्मात्मजोजन्मा कृष्णो नारायणो हरिः ॥ ५॥
हरिकृष्णो घनश्यामो धार्मिको भक्तिनन्दनः ।
बृहद्व्रतधरः शुद्धो राधाकृष्णेष्टदैवतः ॥ ६॥
मरुत्सुतप्रियः कालीभैरवाद्यतिभीषणः ।
जितेन्द्रियो जिताहारस्तीव्रवैराग्य आस्तिकः ॥ ७॥
योगेश्वरो योगकलाप्रवृत्तिरतिधैर्यवान् ।
ज्ञानी परमहंसश्च तीर्थकृत्तैर्थिकार्चितः ॥ ८॥
क्षमानिधिः सदोन्निद्रो ध्याननिष्ठस्तपः प्रियः ।
सिद्धेश्वरः स्वतन्त्रश्च ब्रह्मविद्याप्रवर्तकः ॥ ९॥
पाषण्डोछेदनपटुः स्वस्वरूपाचलस्थितिः ।
प्रशान्तमूर्तिर्निर्दोषोऽसुरगुर्वादिमोहनः ॥ १०॥
अतिकारुण्यनयन उद्धवाध्वप्रवर्तकः ।
महाव्रतः साधुशीलः साधुविप्रप्रपूजकः ॥ ११॥
अहिंसयज्ञप्रस्तोता साकारब्रह्मवर्णनः ।
स्वामिनारायणः स्वामी कालदोषनिवारकः ॥ १२॥
सच्छास्त्रव्यसनः सद्यःसमाधिस्थितिकारकः ।
कृष्णार्चास्थापनकरः कौलद्विट् कलितारकः ॥ १३॥
प्रकाशरूपो निर्दम्भः सर्वजीवहितावहः ।
भक्तिसम्पोषको वाग्मी चतुर्वर्गफलप्रदः ॥ १४॥
निर्मत्सरो भक्तवर्मा बुद्धिदाताऽतिपावनः ।
अबुद्धिहृद्ब्रह्मधामदर्शकश्चापराजितः ॥ १५॥
आसमुद्रान्त सत्कीर्तिः श्रितसंसृतिमोचनः ।
उदारः सहजानन्दः साध्वीधर्मप्रवर्तकः ॥ १६॥
कन्दर्पदर्पदलनो वैष्णवक्रतुकारकः ।
पञ्चायतनसम्मानो नैष्ठिकव्रतपोषकः ॥ १७॥
प्रगल्भो निःस्पृहः सत्यप्रतिज्ञो भक्तवत्सलः ।
अरोषणो दीर्घदर्शी षडूर्मिविजयक्षमः ॥ १८॥
निरहङ्कृतिरद्रोह ऋजुः सर्वोपकारकः ।
नियामकश्चोपशमस्थितिर्विनयवान् गुरुः ॥ १९॥
अजातवैरी निर्लोभो महापुरुष आत्मदः ।
अखण्डितार्षमर्यादो व्याससिद्धान्तबोधकः ॥ २०॥
मनोनिग्रहयुक्तिज्ञो यमदूतविमोचकः ।
पूर्णकामः सत्यवादी गुणग्राही गतस्मयः ॥ २१॥
सदाचारप्रियतरः पुण्यश्रवणकीर्तनः ।
सर्वमङ्गलसद्रूपनानागुणविचेष्टितः ॥ २२॥
इत्येतत्परमं स्तोत्रं जनमङ्गलसंज्ञितम् ।
यः पठेत्तेन पठितं भवेद्वै सर्वमङ्गलम् ॥ २३॥
यः पठेच्छृणुयाद्भक्त्या त्रिकालं श्रावयेच्च वा ।
एतत्तस्य तु पापानि नश्येयुः किल सर्वशः ॥ २४॥
एतत्संसेवमानानां पुरुषार्थचतुष्टये ।
दुर्लभं नास्ति किमपि हरिकृष्णप्रसादतः ॥ २५॥
भूतप्रेतपिशाचानां डाकिनीब्रह्मराक्षसाम् ।
योगिनीनां तथा बालग्रहादीनामुपद्रवः ॥ २६॥
अभिचारो रिपुकृतो रोगश्चान्योऽप्युपद्रवः ।
अयुतावर्तनादस्य नश्यत्येव न संशयः ॥ २७॥
दशावृत्या प्रतिदिनमस्याभीष्टं सुखं भवेत् ।
गृहिभिस्त्यागिभिश्चापि पठनीयमिदं ततः ॥ २८॥
इति श्रीशतानन्दमुनिविरचितं श्रीजनमङ्गलाख्यं
श्रीहर्यष्टोत्तरशतनामस्तोत्रं सम्पूर्णम् ॥
श्रीजनमङ्गलस्तोत्रम्