ब्रह्माप्रोक्तं शमाप्तुं शङ्करार्चनोपदेशम्
(शिवरहस्यान्तर्गते उग्राख्ये)
- ब्रह्मा इन्द्र संवादे -
ब्रह्मोवाच
इन्द्राद्य न त्वया सम्यक् पूजितः पार्वतीपतिः ।
तेनैव व्याकुलं जातं तव चित्तमनाकुलम् ॥ १३५॥
येन न क्रियते नित्यं यथाविधि शिवार्चनम् ।
तेन दुःखानि सर्वाणि प्राप्यन्ते नात्र संशयः ॥ १३६॥
दुःखालया भवन्त्येव सर्वे त्यक्त शिवार्चनाः ।
त्यक्तेशपूजनैरेव प्राप्यते दुःखमन्वहम् ॥ १३७॥
शङ्करं शङ्करं नित्यं यो नार्चयति सादरम् ।
न तस्य सुखलेशोऽपि सत्यं सत्यं न संशयः ॥ १३८॥
यथा दुःखवशं यान्ति शङ्करेतरपूजकाः ।
तथा दुःखवशं यन्ति त्यक्तशङ्करपूजनाः ॥ १३९॥
शङ्करं सम्यगाराध्य प्राप्नुवन्तीशमन्वहम् ।
शङ्कराराधने त्यक्ते कथं शमुपलभ्यते ॥ १४०॥
शङ्करार्चनमेवैकं परमानन्दसाधनम् ।
तदन्यन्न श्रुतं वज्रिन्परमानन्दसाधनम् ॥ १४१॥
देवेष्वन्येषु वा वज्रिन् शङ्करान्यो न शङ्करः ।
ततः शमाप्तुं कुर्वन्ति शङ्कराराधनं द्विजाः ॥ १४२॥
शमाप्तुं यतते यस्तु विना शङ्करपूजनम् ।
स मूर्ख इति विज्ञेयो नेतरो मूर्ख उच्यते ॥ १४३॥
कायेन मनसा वाचा ये शङ्करमुपासते ।
ते पण्डिता इति ज्ञेयाः पूज्यास्ते धनिभिर्धनैः ॥ १४४॥
शङ्करासक्तचित्तानां न दूरे शं ततः सदा ।
शङ्कराराधनं कार्यं शमर्थिभिरहनिशम् ॥ १४५॥
स्वर्गापवर्गफलदं शङ्करं लोकशङ्करम् ।
ये पूजयन्ति सततं धन्यास्ते नात्र संशयः ॥ १४६॥
भगवान्पार्वतीनाथः सर्वाभीष्टफलप्रदः ।
स एव पूज्यते नित्यं तस्य दुःखं न सर्वथा ॥ १४७॥
बहवो मुनयः पूर्वमुमाकान्तस्य पूजया ।
दुःखपाशविनिर्मुक्ताः शङ्करं समुपाययुः ॥ १४८॥
॥ इति शिवरहस्यान्तर्गते ब्रह्माप्रोक्तं शमाप्तुं शङ्करार्चनोपदेशं सम्पूर्णम् ॥
- ॥ श्रीशिवरहस्यम् । उग्राख्यः सप्तमांशः । अध्यायः २५। १३५-१४८॥
- .. shrIshivarahasyam . ugrAkhyaH saptamAMshaH . adhyAyaH 25 . 135-148..
Proofread by Ruma Dewan