मार्कण्डेयप्रोक्तं हरिहराभिन्नतावर्णनस्तोत्रम्
मार्कण्डेय उवाच ।
शिवाय विष्णुरूपाय विष्णवे शिवरूपिणे ।
यथान्तरं न पश्यामि तेन तौ दिशतः शिवम् ॥ १॥
अनादिमध्यनिधनमेतदक्षरमव्ययम् ।
तदेव ते प्रवक्ष्यामि रूपं हरिहरात्मकम् ॥ २॥
यो वै विष्णुः स वै रुद्रो यो रुद्रः स पितामहः ।
एका मूर्तिस्त्रयो देवा रुद्रविष्णुपितामहाः ॥ ३॥
वरदा लोककर्तारो लोकनाथाः स्वयंभुवः ।
अर्धनारीश्वरास्ते तु व्रतं तीव्रं समाश्रिताः ॥ ४॥
यथा जले जलं क्षिप्तं जलमेव तु तद्भवेत् ।
रुद्रं विष्णुः प्रविष्टस्तु तथा रुद्रमयो भवेत् ॥ ५॥
अग्निमग्निः प्रविष्टस्तु अग्निरेव यथा भवेत् ।
तथा विष्णुं प्रविष्तस्तु रुद्रो विष्णुमयो भवेत् ॥ ६॥
रुद्रमग्निमयं विद्याद्विष्णुः सोमात्मकः स्मृतः ।
अग्निष्टोमात्मकं चैव जगत्स्थावरजंगमम् ॥ ७॥
कर्तारौ चापहर्तारौ स्थावरस्य चरस्य च ।
जगतः शुभकर्तारौ प्रभू विष्णुमहेश्वरौ ॥ ८॥
कर्तृकारणकर्तारौ कर्तृकारणकारकौ ।
भूतभव्यभवौ देवौ नारायणमहेश्वरौ ॥ ९॥
एतौ तौ च प्रवक्तारावेतौ तौ च प्रभामयौ ।
जगतः पालकावेतावेतौ स्षृटिकरौ स्मृतौ ॥ १०॥
एते चैव प्रवर्षन्ति भान्ति वान्ति सृजन्ति च ।
एतत्परतरं गुह्यं कथितं ते पितामह ॥ ११॥
यश्चैनं पठते नित्यं यश्चैनं शृणुयान्नरः ।
प्राप्नोति परमं स्थानं विष्णुरुद्रप्रसादजम् ॥ १२॥
देवौ हरिहरौ स्तोष्ये ब्रह्मणा सह संगतौ ।
एतौ च परमौ देवौ जगतः प्रभवाप्यायौ ॥ १३॥
रुद्रस्य परमो विष्णुर्विष्णोश्च परमः शिवः ।
एक एव द्विधा भूतो लोके चरति नित्यशः ॥ १४॥
न विना शंकरं विष्णुर्न विना केशवं शिवः ।
तस्मादेकत्वमयातौ रुद्रोपेन्द्रौ तु तौ पुरा ॥ १५॥
नमो रुद्राय कृष्णाय नमः संहतचारिणे ।
नमः षडर्धनेत्राय द्विनेत्राय च वै नमः ॥ १६॥
नमः पिङ्गलनेत्राय पद्मनेत्राय वै नमः ।
नमः कुमारगुरवे प्रद्युम्नगुरवे नमः ॥ १७॥
नमो धरणीधराय गङ्गाधराय वै नमः ।
नमो मयूरपिच्छाय नमः केयूरधारिणे ॥ १८॥
नमः कपालमालाय वनमालाय वै नमः ।
नमस्त्रिशूलहस्ताय चक्रहस्ताय वै नमः ॥ १९॥
नमः कनकदण्डाय नमस्ते व्रतदण्डिने ।
नमश्चर्मनिवासाय नमस्ते पीतवाससे ॥ २०॥
नमोऽस्तु लक्ष्मीपतये उमायाः पतये नमः ।
नमः खट्वाङ्गधाराय नमो मुसलधारिणे ॥ २१॥
नमो भस्माङ्गरागाय नमः कृष्णाङ्गधारिणे ।
नमः श्मशानवासाय नमोऽस्त्वाश्रमवासिने ॥ २२॥
नमो वृषभवाहाय नमो गरुडवाहिने ।
नमोऽस्त्वनेकरूपाय बहुरूपाय वै नमः ॥ २३॥
नमः प्रलयकर्त्रे च नमः सृष्टिकराय च ।
नमोऽस्तु बहुरूपाय नमो भैरवरूपिणे ॥ २४॥
विरूपाक्षाय देवाय नमः सौम्येक्षणाय च ।
दक्षयज्ञविनाशाय बलेर्नियमनाय च ॥ २५॥
नमः पर्वतवासाय नमः सागरवासिने ।
नमः सुररिपुघ्नाय त्रिपुरघ्नाय वै नमः ॥ २६॥
नमोऽस्तु नरकघ्नाय नमः कामाङ्गनाशिने ।
पुष्पदन्तविनाशाय नमो मधुविघातिने ॥ २७॥
नमोऽस्त्वन्धकनाशाय नमः कैटभघातिने ।
नमः सहस्रहस्ताय नमोऽसंख्येयबाहवे ॥ २८॥
नमः सहस्रशीर्षाय बहुशीर्षाय वै नमः ।
दामोदराय देवाय मुञ्जमेखलिने नमः ॥ २९॥
नमस्ते भगवन् विष्णो नमस्ते भगवन् शिव ।
नमस्ते भगवन् देव नमस्ते देवपूजित ॥ ३०॥
नमस्ते सामभिर्गीत नमस्ते यजुर्भिः सह ।
नमस्ते सुरशत्रुघ्न नमस्तेऽसुरपूजित ॥ ३१॥
नमस्ते कर्मिणां कर्म नमोऽमितपराक्रम ।
हृषीकेश नमस्तेऽस्तु स्वर्णकेश नमोऽस्तु ते ॥ ३२॥
इमं स्तवं यो रुद्रस्य विष्णोश्चैव महात्मनः ।
समेत्य ऋषिभिः सर्वैः स्तुतौ तौ सुमहात्मभिः ॥ ३३॥
व्यासेन देवविदुषा नारदेन च धीमता ।
भारद्वाजेन गार्ग्येण विश्वामित्रेण वै तथा ॥ ३४॥
विश्वामित्रेण वात्स्येन तथा चैव सुमन्तुना ।
अगस्त्येन पुलस्त्येन धौम्येन च महात्मना ॥ ३५॥
यश्चेदं पठते स्तोत्रं नित्यं हरिहरात्मकम् ।
अरोगो बलवांश्चैव जायते नात्र संशयः ॥ ३६॥
श्रियं च लभते नित्यं न च स्वर्गान्निवर्तते ।
अपुत्रो लभते पुत्रं कन्या विन्दति सत्पतिम् ॥ ३७॥
गुर्विणी शृणुते या तु वरं पुत्रं प्रसूयते ।
राक्षसाश्च पिशाचाश्च भूतानि च विनायकाः ।
भयं तत्र न कुर्वन्ति यत्रायं पठ्यते स्तवः ॥ ३८॥
इति हरिवंशान्तर्गतं मार्कण्डेयप्रोक्तं हरि-हराभिन्नतावर्णनस्तोत्रं सम्पूर्णम् ।
हरिवंश । अनुबन्ध - परिशिष्ट । अध्याय अ३७/४०-११३॥
harivaMsha . anubandha - parishiShTa . adhyAya a37/40-113..
Proofread by PSA Easwaran