प्रातःस्मरणश्लोकानि
कराग्रे वसते लक्ष्मीः करमध्ये सरस्वती ।
करमूले भवे गौरी प्रभाते करदर्शनम् ॥ १॥
समुद्रवसने देवि पर्वतस्तनमण्डिते ।
विष्णुपत्नि नमस्तुभ्यं पादस्पर्शं क्षमस्व मे ॥ २॥
ब्रह्मा मुरारिस्त्रिपुरान्तको वा
भानुश्शशी भूमिसुतो बुधश्च ।
गुरुश्च शुक्रश्शनिराहुकेतवः
कुर्वन्तु सर्वे मम सुप्रभातम् ॥ ३॥
सनत्कुमारस्सनकस्सनन्दनः
सनातनोऽप्यासुरिपिङ्गलौ च ।
सप्तस्वरास्सप्तरसातलानि
कुर्वन्तु सर्वे मम सुप्रभातम् ॥ ४॥
सप्तार्णवास्सप्तकुलाचलाश्च
सप्तर्षयो द्वीपवनानि सप्त ।
भूरादिकृत्वा भुवनानि सप्त
कुर्वन्तु सर्वे मम सुप्रभातम् ॥ ५॥
पृथ्वी सगन्धा सरसास्तथाऽऽपः
स्पर्शी च वायुर्ज्वलनः स तेजाः ।
नभस्सशब्दं महता सहैव
कुर्वन्तु सर्वे मम सुप्रभातम् ॥ ६॥
महेन्द्रो मलयस्सह्यो देवताऽऽत्मा हिमालयः ।
ध्येयो रैवतको विन्ध्यो गिरिश्चारावलिस्तथा ॥ ७॥
गङ्गा सिन्धुश्च कावेरी यमुना च सरस्वती ।
रेवा महानदी गोदा ब्रह्मपुत्रा पुनातु माम् ॥ ८॥
अयोध्या मधुरा माया काशी काञ्ची अवन्तिका ।
पुरी द्वारावती चैव संस्मृता मोक्षदायिकाः ॥ ९॥
प्रयागं पाटलीपुत्रं विजयीनगरं पुरीम् ।
इन्द्रप्रस्थं गयां चैव प्रत्यूषे प्रत्यहं स्मरेत् ॥ १०॥
अरुन्धत्यनसूया च सावित्री जानकी सती ।
तेजस्विनी च पाञ्चाली वन्दनीया निरन्तरम् ॥ ११॥
लक्ष्मीरहल्या चन्नम्मा मीरा दुर्गावती तथा ।
कण्णगी च महासाध्वी शारदा च निवेदिता ॥ १२॥
वैन्यं पृथुं हैहयमर्जुनं च शाकुन्तलेयं भरतं नलं च ।
रामं च वै यः स्मरति प्रभाते तस्यार्थलाभो विजयश्च हस्ते ॥ १३॥
दध्यङ् मनुर्भृगुरसौ हरिपूर्वचन्द्रो
भीष्मार्जुनध्रुववसिष्ठशुकादयश्च ।
प्रह्लादनारदभगीरथविश्वकर्मा
वाल्मीकयोऽत्र चिरचिन्त्यशुभाभिधानाः ॥ १४॥
अश्वत्थामा बलिर्व्यासो हनुमांश्च विभीषणः ।
कृपः परशुरामश्च सप्तैते चिरजीवनः ॥ १५॥
सप्तैतान् संस्मरेन्नित्यं मार्कण्डेयमथाष्टमम् ।
जीवेद्वर्षशतं साग्रमपमृत्युविवर्जितः ॥ १६॥
पुण्यश्लोको नलो राजा पुण्यश्लोको युधिष्ठिरः ।
पुण्यश्लोको विदेहश्च पुण्यश्लोको जनार्दनः ॥ १७॥
बुद्धो जिनेन्द्रो गोरक्षः शङ्करश्च पतञ्जलिः ।
रामानुजोऽथ चैतन्यः कबीरो गुरुनानकः ॥ १८॥
ज्ञानेश्वरस्तुकारामः समरो मध्यवल्लभः ।
सरसिस्तुलसीदासः कम्बः साधुकुलोत्तमाः ॥ १९॥
नायनारालवाराश्च तिरुवल्लुवरस्तथा ।
वितरन्तु सदैवेते दैवीं मे गुणसम्पदम् ॥ २०॥
अगस्त्यः कम्बुकौण्डिन्यो राजेन्द्रश्चोलभूषणः ।
सर्वे दिग्जयिनः ख्याताः शैलेन्द्रो बप्परावलः ॥ २१॥
चाणक्यश्चन्द्रगुप्तश्च विक्रमश्शालिवाहनः ।
अशोकः पुष्यमित्रश्च खारवेलः सुनीतिमान् ॥ २२॥
हूणजेता यशोवर्मः समुद्रो गुप्तवंशजः ।
श्रीकृष्णदेवरायश्च प्रदाता हर्षवर्धनः ॥ २३॥
साधुश्शङ्करदेवश्च तथा सायणमाधवौ ।
प्रतापश्शिवराजश्च । गोविन्दो बसवेश्वरः । २४॥
रामकृष्णो दयानन्दो रवीद्रो राममोहनः ।
रामतीर्थोऽरविन्दश्च विवेकानन्द उद्यशाः ॥ २५॥
तिलको रमणश्चैव सुधीर्नारायणो गुरुः ।
महामना मालवीयो महात्मागान्धिरेव च ॥ २६॥
अनुक्ता ये भक्ता हरिचरणसंसक्तहृदया
अविज्ञाता वीरा अधिसमरमुद्ध्वस्तरिपवः ।
महात्मानस्सन्तो भरतभुवि ये सन्ति च परे
नमस्तेभ्यो भूयादुषसि सकलेभ्यः प्रतिदिनम् ॥ २७॥
रत्नाकराधौतपदां हिमालयकिरीटिनीम् ।
ब्रह्मराजर्षिरत्नाढ्यां वन्दे भारतमातरम् ॥ २८॥
प्रातःस्मरणमेतद्यो विदित्वाऽऽदरतः पठेत् ।
स सम्यग्धर्मनिष्ठः स्यात्संस्मृताखण्डभारतः ॥ २९॥
इति प्रातःस्मरणश्लोकानि समाप्ता ।
Proofread by PSA Easwaran