प्रातःस्मरणम्
अथ प्रातःस्मरणं -
ॐ श्री गं नमः ।
प्रा॒तर॒ग्निं प्रा॒तरिन्द्रं॑ हवामहे प्रा॒तर्मि॒त्रावरु॑णा प्रा॒तर॒श्विना॑ ।
प्रा॒तर्भगं॑ पू॒षणं॒ ब्रह्म॑ण॒स्पतिं॑ प्रा॒तः सोम॑मु॒त रु॒द्रं हु॑वेम ॥ ऋग्वेद ७.०४१.०१
प्रातरग्निं प्रातरिन्द्रं हवामहे प्रातर्मित्रावरुणा प्रातरश्विना ।
प्रातर्भगं पूषणं ब्रह्मणस्पतिं प्रातः सोममुत रुद्रं हुवेम ॥ १॥
प्रातःस्मरामि भवभीतिमहार्तिशान्त्यै
नारायणं गरुडवाहनमब्जनाभम् ।
ग्राहाभिभूत-वर-वारण-मुक्तिहेतुं
चक्रायुधं तरुण-वारिज-पत्रनेत्रम् ॥ २॥
प्रातः स्मरामि गणनाथमनाथबन्धुं
सिन्दूरपूर्ण-परिशोभित-गण्डयुग्मम् ।
उद्दण्ड-विघ्न-परिखण्डनचण्डदण्ड-
माखण्डलादि-सुरनायक-वृन्दवन्द्यम् ॥ ३॥
प्रातः स्मरामि खलु तत्सवितुर्वरेण्यं
रूपं हि मण्डलमृचोऽथ तनुर्यजूंषि ।
सामानि यस्य किरणाः प्रभवादिहेतुं
ब्रह्मा हरात्मकमलक्ष्यमचिन्त्यरूपम् ॥ ४॥
प्रातः स्मरामि भवभीतिहरं सुरेशं
गङ्गाधरं वृषभवाहनमम्बिकेशम् ।
खट्वाङ्ग-शूल-वरदाभय-हस्तमीशं
संसाररोगहरमौषधमद्वितीयम् ॥ ५॥
प्रातः स्मरामि शरदिन्दुकरोज्ज्वलाभां
सद्रत्नवन्मकरकुण्डलहारशोभाम् ।
दिव्यायुधार्जितसुनीलसहस्रहस्तां
रक्तोत्पलाभचरणां भवतीं परेशाम् ॥ ६॥
त्रैलोक्य-चैतन्य-मयादिदेव !
श्रीनाथ ! विष्णो ! भवदाज्ञयैव ।
प्रातः समुत्त्थाय तव प्रियार्थं
संसारयात्रामनुवर्तयिष्ये ॥ ७॥
जानामि धर्मं न च मे प्रवृत्ति\-
र्जानाम्यधर्मं न च मे निवृत्तिः ।
त्वया हृषीकेश ! हृदि स्थितेन
यथा नियुक्तोऽस्मि तथा करोमि ॥ ८॥
सुप्तः प्रबोधितो विष्णो हृषीकेशेन यत्त्वया ।
यद्यत्कारयसे कर्म तत्करोमि तवाज्ञया ॥ ९॥
अज्ञानतिमिरान्धस्य ज्ञानाञ्जन-शलाकया ।
चक्षुरुन्मीलितं येन तस्मै श्रीगुरवे नमः ॥ १०॥
ब्रह्मा मुरारिस्त्रिपुरान्तकारी
भानुः शशी भूमिसुतो बुधश्च ।
गुरुश्च शुक्रः शनिराहुकेतवः
कुर्वन्तु सर्वे मम सुप्रभातम् ॥ ११॥
वैन्यं पृथु हैहयमर्जुनञ्च
शाकुन्तलेयं भरतं नलञ्च ।
रामञ्च यो वै स्मरति प्रभाते
तस्यार्थलाभो विजयश्च हस्ते ॥ १२॥
शङ्करं शङ्कराचार्यं केशवं बादरायणम् ।
सूत्रभाष्यकृतौ वन्दे भगवन्तौ पुनः पुनः ॥ १३॥
मातृपितृसहस्राणि पुत्रदारशतानि च ।
संसारेष्वनुभूतानि यानि यास्यन्ति चापरे ॥ १४॥
हर्षस्थानसहस्राणि भयस्थानशतानि च ।
दिवसे दिवसे मूढमाविशन्ति न पण्डितम् ॥ १५॥
ऊर्ध्वबाहुर्विरौम्येष न च कश्चिच्छृणोति मे ।
धर्मादर्थश्च कामश्च स किमर्थं न सेव्यते ॥ १६॥
न जातु कामान्न भयान्न लोभा\-
द्धर्मं त्यजेज्जीवितस्यापि हेतोः ।
धर्मो नित्यः सुखदुःखे त्वनित्ये
जीवो नित्यो हेतुरस्य त्वनित्यः ॥ १७॥
इमां भारतसावित्रीं प्रातरुत्थाय यः पठेत् ।
स भारतफलं प्राप्य परं ब्रह्माधिगच्छति ॥ १८॥
कार्तवीर्यार्जुनो नाम राजा बाहुसहस्रवान् ।
योऽस्य सङ्कीर्तयेन्नाम कल्य उत्थाय मानवः ॥ १९॥
न तस्य वित्तनाशः स्यान्नष्टञ्च लभते पुनः ॥
इत्यादिपौराणमन्त्रान् पठित्वा
ॐ समुद्रवसने देवि पर्वतस्तनमण्डिते ।
विष्णुपत्नि नमस्तुभ्यं पादस्पर्शं क्षमस्व मे ॥ ( म. पा. )
इति प्रार्थ्योत्त्थाय हस्तेन स्पृष्ट्वा श्वासानुसारेण
च भूमौ पादं दत्त्वा गवादिमङ्गलानि पश्येत् ।
श्रोत्रियं सुभगां गाञ्च अग्निमग्निचितं तथा ।
प्रातरुत्त्थाय यः पश्येदापद्भ्यः स प्रमुच्यते ॥ ( ना. दे. )॥
Encoded and proofread by Paresh Panditrao