मुनिप्रोक्तं रुद्रमन्त्रजपोपदेशम्
(शिवरहस्यान्तर्गते भीमाख्ये)
मुनिरुवाच ।
श्रीरुद्रमन्त्रान्प्रजपन्नियतं भस्मधार्यपि ।
रुद्रमन्त्रान् जपन्विप्रो धयायेद्देवमुमापतिम् ॥ १॥
वेदानां मध्यगं(गः) साक्षाद्यजुषां मध्यगं(गः) परम्(रः) ।
शतशाखातं(स्)त्वेतद्रुद्रमन्त्रः शिवप्रियः ॥ २॥
रुद्रप्रियकरं(रः) साक्षाद्रुद्रमन्त्रं(त्रः) श्रुतिःश्रुतम् ।
रुद्राध्यायार्थविज्ञानी पदार्थज्ञानवान्नरः ॥ ३॥
नमोऽन्तेन शिवं ध्यायन्सर्वपापैः प्रमुच्यते ।
नमोऽन्तेन च तद्रूपधारी शिवाय एव हि ॥ ४॥
ध्यायन्महेशं तद्रूपं पतीनां परमेश्वरम् (पतिमीश्वरम्) ।
सर्वेषामप्युमाकान्तं नितान्तं शान्तमव्ययम् ॥ ५॥
रुद्राध्यायगतैर्मन्त्रैर्नमोऽन्तैरुभयैरपि ।
एकद्वित्रिनमस्कारैर्ध्यायेद्देवं पिनाकिनम् ॥ ६॥
सर्वदेवाधिदेवेशं विश्वेशं रुद्रसूक्ततः ।
ध्यायन्मन्त्राञ्जपेद्रुद्रांस्तत्तदर्थावबोधतः ॥ ७॥
श्रीरुद्रमन्त्रं प्रजपेद्भस्मधारणपूर्वकम् ।
भस्मधार्यधिकारी च तथा रुद्राक्षधार्यपि ॥ ८॥
रुद्राध्यायजपे योग्यास्त एव भुवने द्विजाः ।
नान्यपुण्ड्रधराः सर्वे नाधिकारिण एव हि ॥ ९॥
प्रत्युतो रुद्रमन्त्रांश्च प्रजपन् पापभाग्भवेत् ।
(प्रत्युत प्रजपन्नुद्रमन्त्रांश्च पापभाग्भवेत्) ।
यस्तु रुद्राञ्जपेन्नित्यं ध्यायमानो महेश्वरम् ॥ १०॥
सर्वपापविशुद्धात्मा शिवत्वमुपगच्छति ॥ ११॥
स्तेयं कृत्वा ब्रह्महत्यां च कृत्वा
मद्यं पीत्वा गुरुदारांश्च गत्वा ।
भस्मछन्नो भस्मशय्यां शयानो
रुद्रध्यायी मुच्यते सर्वपापैः ॥ १२॥
एकवारं जपन् रुद्रं पापैर्मुक्तो भविष्यति ।
द्विवारं च प्रजप्यैव रुद्रं ध्यायन्महेश्वरम् ॥ १३॥
गाणपत्यमवाप्नोति शिवस्य परमात्मनः ।
तृतीयवारं प्रपञ्छिवे संलीयते सदा ॥ १४॥
एकादशानुवारं यो रुद्रमन्त्रं जपेद्बुधः (द्विजः) ।
शं च मे इत्यादि च जपन् क्रमादेकादशावृतम् ॥ १५॥
जपाल्लिङ्गेऽभिषेको(कात्) वै शम्भोः प्रियतमो मतः ।
वस्त्रपूतेन तोयेन अविच्छिन्नां प्रकल्पयेत् ॥ १६॥
धारां प्रीत्या प्रकल्पेत शिवलिङ्गे द्विजोत्तमः ।
जपादप्युत्तमः सेकः श्रीरुद्राध्यायपूर्वकः ॥ १७॥
जपाद्दशगुणः प्रोक्तो ह्यभिषेको महेशितुः ।
चन्दनैर्बिल्वपत्रैश्च पूजयेदिन्दुशेखरम् ॥ १८॥
रुद्रैः स्तुवीत देवेशं साम्बं संसारभेषजम् ।
स्तुत्वा रुद्रैर्महादेव सन्निधौ गणपो भवेत् ॥ १९॥
रुद्रैर्होमं प्रकुर्वीत चरुणामधुसर्पिषा ।
नामभिर्देवदेवस्य स्वाहान्तैश्च पृथक् पृथक् ॥ २०॥
ग्रहारिष्टे समुत्पन्ने उत्पाते क्ष्मादिकम्पने ।
देशोपसर्गे दुर्भुक्षे राजचोराद्युपद्रवे ॥ २१॥
प्रजापशुमृतौ चापि जपहोमार्चनं चरेत् ।
रुद्रैर्मन्त्रैरयुतशो ध्यायन्देवं पिनाकिनम् ॥ २२॥
ब्राह्मणैः शाम्भवैरेव भस्मरुद्राक्षधारिभिः ।
कारयेद्विधिवद्राजा धनाढ्यो वापि कश्चन ॥ २३॥
गावो भूमिर्हिरण्याद्याः प्रदेयाः शक्तिसारतः ।
शाम्भवेभ्यः सदा रोगतापपापैः प्रमुच्यते ॥ २४॥
रुद्रमन्त्रजपे योग्याः शाम्भवा एव केवलम् ।
अतिरुद्रविधानं वा महारुद्रमथापि वा ॥ २५॥
कुर्यात्सर्वोपसर्गेभ्यो न भयं जायते क्वचित् ।
घृतधारां पातयेताविच्छिन्नां रुद्रमन्त्रतः ॥ २६॥
वह्नौ कुण्डे शिवं ध्यात्वा शाम्भवाष्टोत्तरैः शतैः ।
एकादशानुवृत्त्यैवं मण्डलं धनधान्यवान् ॥ २७॥
मुक्तः शिवमयो भूयादकामः कामवान् यदि ।
सर्वकामानवाप्नोति वत्सरान्ते न संशयः ॥ २८॥
गोष्ठे वापि नदीरीते रुद्रक्षेत्रे शतोत्तरम् ।
जप्यैव कर्म कृत्वापि फलं विन्देद्दशोत्तरम् ॥ २९॥
क्षीराभिषेकं लिङ्गे तु रुद्रमन्त्रैः समाचरेत् ।
न भूयस्स्तन्यपो मातुर्भविष्यति न संशयः ॥ ३०॥
यो रुद्रे वा नमस्कारं प्रदक्षिणमथापि वा ।
कुर्याच्छिवालये शम्भोः सन्निधौ स तु मुक्तिभाक् ॥ ३१॥
रुद्रमन्त्रैः शूलिनं यः स्तुवन्नर्तनमाचरेत् ।
स शम्भोर्गणपो भूयाद्वत्सरेण न संशयः ॥ ३२॥
अविमुक्ते शिवक्षेत्रेष्वन्येष्वपि यथा बलम् ।
रुद्रं जपन्प्रमुच्येत पापेभ्यो नात्र संशयः ॥ ३३॥
यो बिल्वमूले रुद्रांश्च जपेद्ध्यायन्महेश्वरम् ।
स कोटिरुद्रसाम्यस्य फलं लब्ध्वा विमुच्यते ॥ ३४॥
जाबाला आमनन्त्येव महिमां रुद्रजापिनः ।
किं जप्येनामृतमिति रुद्रैरेवेति सा श्रुतिः ॥ ३५॥
यतिश्च प्रजपेन्नित्यं वने वर्णी गृही तथा ।
यावन्नमोऽन्तं तु यतेरन्ये तु गृहमेधिनः ॥ ३६॥
यत्र स्थितो रुद्रजापी तत्र शम्भुः स्थितः सदा ।
तस्मै दत्तं शाम्भवाय दत्तं तच्छम्भवे सदा ॥ ३७॥
गां भूमिमथ वासो वा धनं धान्यं हिरण्यकम् ।
दत्वा शिवप्रसादस्य पात्रं श्रीरुद्रजापिने ॥ ३८॥
एकवारं जपन्रुद्रं तद्ग्रामे शान्तिमृच्छति ।
ग्रामे अस्मिन्ननातुरमिति मन्त्रार्थपारगः ॥ ३९॥
शतवारं तु नगरे पुरेऽयुतजपाद्भवेत् ।
तत्रस्थानां शुभं भूयाद्यत्र रुद्रजपो भवेत् ॥ ४०॥
कुम्भं संस्पृश्य यो रुद्रं सोदकं प्रजपन् द्विजः ।
स्नापयेच्चापि रोगार्त्तं रोगी रोगैः प्रमुच्यते ॥ ४१॥
वन्ध्या कुमारं सूते चातीव प्रेमास्पदं स्थिरम् ।
एवं रहस्यमनघं शतरुद्रमन्त्र-
जाप्याभिषेकनियमैः शिवपूजनेन ।
तस्मै प्रसीदति सदा शशिखण्डमौलि-
राखण्डलाजहरिवन्दितपादपीठः ॥ ४३॥
रुद्राध्यायजपानुरक्तहृदया रुद्राक्षभस्मादरा
जप्त्वा वाप्यषिच्य वा शशिमहाचूडोरुलिङ्गं सदा ।
मूढो वाप्यथपण्डितो यतिवरो भूयाच्छिवाग्रेसरो
विष्णुब्रह्ममरुद्गणार्चितपदो नन्दीशतुल्यो गणः ॥ ४४॥
॥ इति शिवरहस्यान्तर्गते ऋषिकश्यपप्रोक्तं रुद्राक्षमहिमावर्णनं सम्पूर्णम् ॥
- ॥ श्रीशिवरहस्यम् । भीमाख्यः अष्टमांशः । अध्यायः १२ । १-४४॥
- .. shrIshivarahasyam . bhImAkhyaH aShTamAMshaH . adhyAyaH 12 . 1-44..
Notes:
Muni मुनि delivers Upadeśa उपदेश about the merits of Rudra Mantra Japa रुद्र मन्त्र जप, especially Rudrādhyāya Japa रुद्राध्याय जप.
Proofread by Ruma Dewan