शेषसंहितान्तर्गता रामोपासना
रामजयन्ती
शेषः -
त्रेतायां चैत्रमासे तु नवम्यां तु पुनर्वसौ ।
रामावतारमकरोल्लग्नेऽभिजिति यो हरिः ॥
नारसिंहविधानोक्तमण्डपादीन् प्रकल्पयेत् ।
बिम्बयन्त्रादिहोमं च कुम्भं च परिकल्पयेत् ॥
सम्यक् तत्प्रतिमादानं राममन्त्रेण मन्त्रवित् ।
लक्ष्मणः तद्दिने लग्ने अनन्तोऽभूत्स्वयं प्रभुः ॥
ततो भरतशत्रुघ्नौ शङ्खचक्रे च तौ स्वयम् ।
अभूतां तद्दिने लग्ने धर्मसंस्थापनाय च ॥
तद्युगे मासि कन्याया मश्विन्यां शुक्रवासरे ।
स्वयं भूमिश्च सीताऽभूद्यज्ञधर्मार्थसिद्धये ॥
रङ्कारं हतसंयुक्तं रामाय नम इत्यपि ।
जपेन्मन्त्रमिमं ब्रह्मन् सर्वसिद्धिप्रदायकम् ॥
श्रीं बीजं सम्यगुद्धृत्य सीतायै पदमुद्धरेत् ।
जपेत्तद्वह्निजायान्तं सर्वैश्वर्यप्रदायकम् ॥
लकारं बिन्दुसंयुक्तं लक्ष्मणाय नमस्तथा ।
प्रीत्यै श्रीरामचन्द्रस्य सर्वसिद्ध्यै जपेन्मनुम् ॥
ऋषिर्ब्रह्मास्य मन्त्रस्य गायत्री छन्द उच्यते ।
श्रीरामो देवता प्रोक्तो रां बीजं कमलासन ॥
नं शक्तिर्लं कीलकं स्वं कवचं रमस्त्रकम् ।
श्यामवर्णमिदं प्रोक्तं कुर्यान्मन्त्रपदैर्बुधः ॥
षडङ्गन्तु प्रकुर्वीत सीताराममनुं जपेत् ।
ध्यानं -
वामे भूमिसुता पुरस्तु हनुमान् पश्चात्सुमित्रासुतः
शत्रुघ्नो भरतश्च पार्श्वदलयोरग्न्यादिकोणेषु च ।
सुग्रीवश्च विर्भाषणश्च युवराट् तारासुतो जाम्बवान्
मध्ये नीलसरोजकोमलरुचिं रामं भजे श्यामलम् ॥
अष्टोत्तरसहस्रं तु तज्जयन्त्यां जपेद्बुधः ।
तत्सङ्ख्ययां प्रत्यहं तु अष्टोत्तरशतं तु वा ॥
राममन्त्रजपध्यानपरो यो वत्सस्त्रयम् ।
तस्य सिद्ध्यन्ति भोग्यानि धनधान्यादिकं सदा ॥
तस्य मुक्तिं प्रदास्यामि ब्रह्मत्वं चाथ वाञ्छितम् ।
रामानुष्टुभमन्त्रेण तज्जयन्त्यां तु तर्पयेत् ॥
अष्टोत्तरशतं वापि अष्टाविंशतिमेव चा ।
रामगायत्रिया चार्घ्यं दद्यात् ध्यायन्विचक्षणः ॥
शत्रून् रावणवत् ध्यात्वा स्वदेहे राममुत्तमम् ।
कुर्याज्जपे तथा होमे सम कर्मसु तर्पणे ॥
एवमुक्तप्रकारेण यः कुर्याद्वत्सरत्रयम् ।
स रामवदिह स्थित्वा विष्णुसायुज्यमाप्नुयात् ॥
इति श्रीपाञ्चरात्रे शेषसंहितायां नवमोऽध्यायः ।
(४१)
श्रीरामबीजम्
शेषः -
श्रीरामैकाक्षरं वक्ष्ये बलरामविधानतः ।
कृष्णबीजं ततः पश्चात् मोहदेवादिलक्षणम् ॥
यान्तवृत्तसमायुक्तं बिन्दुनादविभूषितम् ।
कालानलसमप्रख्यं रामबीजमिति स्मृतन् ॥
ऋषिर्ब्रह्मास्य मन्त्रस्य छन्दोनुष्टुभमेव च ।
देवता रघुवीरश्च रं बीजं शक्तिश्रीं तथा ॥
ह्रीं कीलकं ऐं कवचं यमस्त्रं रक्तवर्णकम् ।
षडङ्गं षट्स्वरैर्न्यस्य तद्बीजेन यथाविधि ॥
व्याप्यं तद्व्यापकं चैव कुर्यात्तन्मन्त्रविच्छुचिः ।
आकर्णमाकृष्टधनुर्गुणोद्यद्ब्रह्मास्त्रलक्षीकृतराक्षसेन्द्रम् ।
रथाधिरूढं रणरङ्गधीरं रामं भजे रक्तसरोरुहाक्षम् ॥
श्रीरामैकाक्षरेणैव रुद्रश्च सततं पुरा ।
सदाशिवत्वं प्राप्याथ गुरुत्वं चक्रधारणात् ॥
गौतमाद्यास्तथा देवाः पार्वती च सरस्वती ।
तत्तत्स्थलमवाप्याथ सिद्धानाहुर्विशारदाः ॥
श्रीरामैकाक्षरजपात् रुद्रः पूज्योऽभवत्सदा ।
तारकब्रह्ममित्युक्तं श्रीरामैकाक्षरं परम् ॥
श्रीसीतेति च तत् ज्ञात्वा जपेद्राममनुं सदा ।
धर्मकामार्थमोक्षार्थी जपेद्रामं चतुर्मुख ॥
जपहोमफलं सर्वं नृसिंहैकाक्षरं यथा ।
श्रीरामाङ्गप्रतिष्ठादि रामबीजेन कारयेत् ॥
(१३६)
राममन्त्रः
शेषः -
अथ वक्ष्येविधानेन श्रीराममनुमुत्तमम् ।
न्यासयन्त्रादिसहितं अङ्गाङ्गादिसमन्वितम् ॥
अग्निबीजं समुद्धृत्य रामाय नम इत्यपि ।
मनुमुद्धारयेन्मन्त्री तारकं ब्राह्ममुत्तमम् ॥
ऋषिर्ब्रह्मास्य मन्त्रस्य गायत्री छन्द उच्यते ।
श्रीरामो देवता ब्रह्मन् रम्बीजं शक्तिमं तथा ॥
श्रीं कीलकं ह्रीं कवचं लंअस्त्रं श्यामवर्णकम् ।
तद्बीजेन करन्यासं तन्मन्त्रस्य पदत्रयैः ॥
षडङ्गं कारयेन्मन्त्री ध्यानकर्मादियोगतः ।
व्याप्यं तद्व्यापकं चैव तन्मन्त्रणैव कारयेत् ॥
परात्परं विभुं दवं वैशेषपरमात्मकम् ।
चापबाणधरं धीरं रामं सीतापतिं भजे ॥
चातुरङ्गविधानेन तर्पयेच्चन्दनाम्भसा ।
श्वेतपद्मैर्बिल्वपत्रैः करवीरैस्तु चाम्पकैः ॥
नन्द्यावर्तैरशोकैश्च पूजयेद्राममादरात् ।
राज्यार्थी जुहुयात्पद्मैः कन्यार्थी लाजकैर्यजेत् ॥
यजेत्कुन्दैः खादिरैस्तु निम्बकाष्ठैस्तु सर्षपैः ।
वश्याकृष्यादिमोहे च त्रिमधुं गुग्गुलं स्थितम् ॥
तिलपायससंयुक्तं यजेन्मण्डलभेदतः ।
तत्तद्दव्यस्य हवनात् तत्तत्फलमवाप्नुयात् ॥
(२१२)
यन्त्रः
जपकर्मादि सिद्ध्यर्थं वक्ष्ये तद्यन्त्रमुत्तमम् ।
षट्कोणं पूर्वमालिख्य तन्मध्ये साध्यसंयुतम् ॥
तद्बीजन्तु श्रिया ब्रह्मन् कर्मनाम लिखेत्तथा ।
तत्कोणेषु लिखेन्मन्त्री श्रीरामस्य षडक्षरम् ॥
सीतारामं च तत्सन्धौ तद्बीजेनैव वेष्टयेत् ।
बहिरष्टदलं लिख्य तद्बीजं तु नमोन्तकम् ॥
रामचन्द्राय विलिखेत् तद्दलेषु सुमन्त्रवित् ।
तत्सन्धौ रं लमुद्धृत्य लक्ष्मणाय नमो लिखेत् ॥
क्रोडबीजेन संवेष्ट्य तद्बहिर्द्वादशं दलम् ।
लिखेद्दलेषु ॐ श्रीं च जानकीवल्लभाय च ॥
स्वाहा लिखेच्च तत्सन्धौ वासुदेवमनुं लिखेत् ।
तद्वहिष्षोडशदलं तद्दलेषु लिखेत्क्रमात् ॥
रां नमो भगवते रामभद्राय हुं फट् स्वाहा ।
तत्सन्धौ तु स्वरान् लिख्य लक्ष्मीबीजेन वेष्टयेत् ॥
चतुर्विंशद्दलं लिख्य तद्बहिर्मन्त्रवित्तमः ।
तद्दलेषु क्रमाद्ब्रह्मन् गायत्रं रामकं लिखेत् ॥
तत्सन्धौ सौरगायत्रीं लिखेल्लक्ष्म्या च वेष्टयेत् ।
द्वात्रिंशद्दलमालिख्य तद्दलेषु लिखेत्क्रमात् ॥
श्रीरामानुष्टुभं लिख्य तत्सन्धौ सौरमालिखेत् ।
एतद्यन्त्रसमं नास्ति सत्यमेतच्चतुर्मुख ॥
इति श्रीपाञ्चरात्रे श्रीशेषसंहितायां त्रिपञ्चाशोऽध्यायः ।
(२१३)
रामाङ्गमन्त्रः १
शेषः -
वक्ष्ये रामाङ्गमन्त्राणि राममन्त्रार्थसिद्धये ।
रहस्यं सर्वशास्त्राणां दुर्लभं साम्यमुत्तम् ॥
स्वाहान्तं तु श्रियादौ तु सीतायै मनुरुत्तमः ।
श्रीरामस्यार्धाङ्गमन्त्रस्सर्वसिद्धिप्रदायकः ॥
लं लक्ष्मणायेति तथा मनुं तद्वज्जपेद्बुधः ।
वराहैकाक्षरं तद्वत् नारसिंहं सुदर्शनम् ॥
हयग्रीवं मूलमन्त्रं मन्त्ररत्नं जपेत्सदा ।
श्रीराममन्त्रसिद्ध्यर्थं जपेदङ्गानि तत्तथा ॥
इति श्रीपाञ्चरात्रे श्रीशेषसंहितायां चतुःपञ्चाशोऽध्यायः ।
(२१५)
रामाङ्गमन्त्रः २
शेषः -
वक्ष्ये श्रीराममन्त्रस्य अङ्गाङ्गानि तथैवच ।
तत्तन्मन्त्रैः तदङ्गानि जपेत्पूर्वोक्तसङ्ख्यया ॥
भं भरतायेति तथा मनुरिष्टार्थदायकः ।
शं शत्रुघ्नायेति मनुः सर्वाभीष्टप्रदायकः ॥
मं मर्कटायेति मनुः तथा काम्यार्थदायकः ।
पक्षिराज जपेन्मन्त्री तदङ्गानि च तज्जपेत् ॥
इति श्रीपाञ्चरात्रे शेषसंहितायां पञ्चपञ्चाशोऽध्यायः ।
(२१५)
हनुमद्बीजम्
शेषः -
सम्यग्वक्ष्ये विधानेन हनुमद्बीजमुत्तमम् ।
अन्नाधिपं कार्तवीर्यं हयग्रीवं नृकेसरिम् ॥
भान्तं यान्तसमायुक्तं हालाहलसमप्रभम् ।
मर्कटेशस्य बीजं स्यात् सर्वसंहारकारकम् ॥
ऋषी रुद्रोऽस्य मन्त्रस्य जगती छन्द उच्यते ।
देवता मर्कटेशश्च स्यं बीजं शक्तिः यं तथा ॥
लं कीलकं यं कवचं रं अस्त्रं रक्तवर्णकम् ।
षडङ्गं षट्स्वरैर्न्यस्य व्याप्यादीन् पूर्ववत्तथा ॥
दंष्ट्राकरालमत्युग्रं पिङ्गाक्षं मुष्टिधारिणम् ।
उदाराङ्गं त्रिनेत्रं तं वन्दे लङ्काभयङ्करम् ॥
चातुरङ्गफलं सम्यक् वामनैकाक्षरादिवत् ।
(१४७)
Being a compilation, the page numbers
of Sheshsamhita book for each section
are given in parenthesis.
Encoded and proofread by Mrityunjay Pandey