ઋભુગીતા ૪૪ . નિદાધાનુભવ વર્ણન પ્રકરણમ્ .

નિદાઘઃ -

• શૃણુશ્વ સદ્ગુરો બ્રહ્મન્ ત્વત્પ્રસાદાન્વિનિશ્ચિતમ્ .
• અહમેવ હિ તદ્બ્રહ્મ અહમેવ હિ કેવલમ્ . ૧.
• અહમેવ હિ નિત્યાત્મા અહમેવ સદાઽજરઃ .
• અહમેવ હિ શાન્તાત્મા અહમેવ હિ નિષ્કલઃ . ૨.
• અહમેવ હિ નિશ્ચિન્તઃ અહમેવ સુખાત્મકઃ .
• અહમેવ ગુરુસ્ત્વં હિ અહં શિષ્યોઽસ્મિ કેવલમ્ . ૩.
• અહમાનન્દ એવાત્મા અહમેવ નિરઞ્જનઃ .
• અહં તુર્યાતિગો હ્યાત્મા અહમેવ ગુણોજ્ઝિતઃ . ૪.
• અહં વિદેહ એવાત્મા અહમેવ હિ શઙ્કરઃ .
• અહં વૈ પરિપૂર્ણાત્મા અહમેવેશ્વરઃ પરઃ . ૫.
• અહમેવ હિ લક્ષ્યાત્મા અહમેવ મનોમયઃ .
• અહમેવ હિ સર્વાત્મા અહમેવ સદાશિવઃ . ૬.
• અહં વિષ્ણુરહં બ્રહ્મા અહમિન્દ્રસ્ત્વહં સુરાઃ .
• અહં વૈ યક્ષરક્ષાંસિ પિશાચા ગુહ્યકાસ્તથા . ૭.
• અહં સમુદ્રાઃ સરિત અહમેવ હિ પર્વતાઃ .
• અહં વનાનિ ભુવનં અહમેવેદમેવ હિ . ૮.
• નિત્યતૃપ્તો હ્યહં શુદ્ધબુદ્ધોઽહં પ્રકૃતેઃ પરઃ .
• અહમેવ હિ સર્વત્ર અહમેવ હિ સર્વગઃ . ૯.
• અહમેવ મહાનાત્મા સર્વમઙ્ગલવિગ્રહઃ .
• અહમેવ હિ મુક્તોઽસ્મિ શુદ્ધોઽસ્મિ પરમઃ શિવઃ . ૧૦.
• અહં ભૂમિરહં વાયુરહં તેજો હ્યહં નભઃ .
• અહં જલમહં સૂર્યશ્ચન્દ્રમા ભગણા હ્યહમ્ . ૧૧.
• અહં લોકા અલોકાશ્ચ અહં લોક્યા અહં સદા .
• અહમાત્મા પારદૃશ્ય અહં પ્રજ્ઞાનવિગ્રહઃ . ૧૨.
• અહં શૂન્યો અશૂન્યોઽહં સર્વાનન્દમયોઽસ્મ્યહમ્ .
• શુભાશુભફલાતીતો હ્યહમેવ હિ કેવલમ્ . ૧૩.
• અહમેવ ઋતં સત્યમહં સચ્ચિત્સુખાત્મકઃ .
• અહમાનન્દ એવાત્મા બહુધા ચૈકધા સ્થિતઃ . ૧૪.
• અહં ભૂતભવિષ્યં ચ વર્તમાનમહં સદા .
• અહમેકો દ્વિધાહં ચ બહુધા ચાહમેવ હિ . ૧૫.
• અહમેવ પરં બ્રહ્મ અહમેવ પ્રજાપતિઃ .
• સ્વરાટ્ સમ્રાડ્ જગદ્યોનિરહમેવ હિ સર્વદા . ૧૬.
• અહં વિશ્વસ્તૈજસશ્ચ પ્રાજ્ઞોઽહં તુર્ય એવ હિ .
• અહં પ્રાણો મનશ્ચાહમહમિદ્રિયવર્ગકઃ . ૧૭.
• અહં વિશ્વં હિ ભુવનં ગગનાત્માહમેવ હિ .
• અનુપાધિ ઉપાધ્યં યત્તત્સર્વમહમેવ હિ . ૧૮.
• ઉપાધિરહિતશ્ચાહં નિત્યાનન્દોઽહમેવ હિ .
• એવં નિશ્ચયવાનન્તઃ સર્વદા સુખમશ્નુતે .
• એવં યઃ શૃણુયાન્નિત્યં સર્વપાપૈઃ પ્રમુચ્યતે . ૧૯.
• નિત્યોઽહં નિર્વિકલ્પો જનવનભુવને પાવનોઽહં મનીષી
• વિશ્વો વિશ્વાતિગોઽહં પ્રકૃતિવિનિકૃતો એકધા સંસ્થિતોઽહમ્ .
• નાનાકારવિનાશજન્મરહિતસ્વજ્ઞાનકાર્યોજ્ઝિતૈઃ
• ભૂમાનન્દઘનોઽસ્મ્યહં પરશિવઃ સત્યસ્વરૂપોઽસ્મ્યહમ્ . ૨૦.

• . ઇતિ શ્રીશિવરહસ્યે શઙ્કરાખ્યે ષષ્ઠાંશે ઋભુનિદાઘસંવાદે નિદાઘાનુભવવર્ણનં નામ ચતુશ્ચત્વારિંશોઽધ્યાયઃ .

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com