ઋભુગીતા ૭ . સ્વાત્મ-નિરૂપણમ્ .

ઋભુઃ -

• અત્યદ્ભુતં પ્રવક્ષ્યામિ સર્વલોકેષુ દુર્લભમ્ .
• વેદશાસ્ત્રમહાસારં દુર્લભં દુર્લભં સદા . ૧.
• અખણ્ડૈકરસો મન્ત્રમખણ્ડૈકરસં ફલમ્ .
• અખણ્ડૈકરસો જીવ અખણ્ડૈકરસા ક્રિયા . ૨.
• અખણ્ડૈકરસા ભૂમિરખણ્ડૈકરસં જલમ્ .
• અખણ્ડૈકરસો ગન્ધ અખણ્ડૈકરસં વિયત્ . ૩.
• અખણ્ડૈકરસં શાસ્ત્રં અખણ્ડૈકરસં શ્રુતિઃ .
• અખણ્ડૈકરસં બ્રહ્મ અખણ્ડૈકરસં વ્રતમ્ . ૪.
• અખણ્ડૈકરસો વિષ્ણુરખણ્ડૈકરસઃ શિવઃ .
• અખણ્ડૈકરસો બ્રહ્મા અખણ્ડૈકરસાઃ સુરાઃ . ૫.
• અખણ્ડૈકરસં સર્વમખણ્ડૈકરસઃ સ્વયમ્ .
• અખણ્ડૈકરસશ્ચાત્મા અખણ્ડૈકરસો ગુરુઃ . ૬.
• અખણ્ડૈકરસં વાચ્યમખણ્ડૈકરસં મહઃ .
• અખણ્ડૈકરસં દેહ અખણ્ડૈકરસં મનઃ . ૭.
• અખણ્ડૈકરસં ચિત્તં અખણ્ડૈકરસં સુખમ્ .
• અખણ્ડૈકરસા વિદ્યા અખણ્ડૈકરસોઽવ્યયઃ . ૮.
• અખણ્ડૈકરસં નિત્યમખણ્ડૈકરસઃ પરઃ .
• અખણ્ડૈકરસાત્ કિઞ્ચિદખણ્ડૈકરસાદહમ્ . ૯.
• અખણ્ડૈકરસં વાસ્તિ અખણ્ડૈકરસં ન હિ .
• અખણ્ડૈકરસાદન્યત્ અખણ્ડૈકરસાત્ પરઃ . ૧૦.
• અખણ્ડૈકરસાત્ સ્થૂલં અખણ્ડૈકરસં જનઃ .
• અખણ્ડૈકરસં સૂક્ષ્મમખણ્ડૈકરસં દ્વયમ્ . ૧૧.
• અખણ્ડૈકરસં નાસ્તિ અખણ્ડૈકરસં બલમ્ .
• અખણ્ડૈકરસાદ્વિષ્ણુરખણ્ડૈકરસાદણુઃ . ૧૨.
• અખણ્ડૈકરસં નાસ્તિ અખણ્ડૈકરસાદ્ભવાન્ .
• અખણ્ડૈકરસો હ્યેવ અખણ્ડૈકરસાદિતમ્ . ૧૩.
• અખણ્ડિતરસાદ્ જ્ઞાનં અખણ્ડિતરસાદ્ સ્થિતમ્ .
• અખણ્ડૈકરસા લીલા અખણ્ડૈકરસઃ પિતા . ૧૪.var was લીના
• અખણ્ડૈકરસા ભક્તા અખણ્ડૈકરસઃ પતિઃ .
• અખણ્ડૈકરસા માતા અખણ્ડૈકરસો વિરાટ્ . ૧૫.
• અખણ્ડૈકરસં ગાત્રં અખણ્ડૈકરસં શિરઃ .
• અખણ્ડૈકરસં ઘ્રાણં અખણ્ડૈકરસં બહિઃ . ૧૬.
• અખણ્ડૈકરસં પૂર્ણમખણ્ડૈકરસામૃતમ્ .
• અખણ્ડૈકરસં શ્રોત્રમખણ્ડૈકરસં ગૃહમ્ . ૧૭.
• અખણ્ડૈકરસં ગોપ્યમખણ્ડૈકરસઃ શિવઃ .
• અખણ્ડૈકરસં નામ અખણ્ડૈકરસો રવિઃ . ૧૮.
• અખણ્ડૈકરસઃ સોમઃ અખણ્ડૈકરસો ગુરુઃ .
• અખણ્ડૈકરસઃ સાક્ષી અખણ્ડૈકરસઃ સુહૃત્ . ૧૯.
• અખણ્ડૈકરસો બન્ધુરખણ્ડૈકરસોઽસ્મ્યહમ્ .
• અખણ્ડૈકરસો રાજા અખણ્ડૈકરસં પુરમ્ . ૨૦.
• અખણ્ડૈકરસૈશ્વર્યં અખણ્ડૈકરસં પ્રભુઃ .
• અખણ્ડૈકરસો મન્ત્ર અખણ્ડૈકરસો જપઃ . ૨૧.
• અખણ્ડૈકરસં ધ્યાનમખણ્ડૈકરસં પદમ્ .
• અખણ્ડૈકરસં ગ્રાહ્યમખણ્ડૈકરસં મહાન્ . ૨૨.
• અખણ્ડૈકરસં જ્યોતિરખણ્ડૈકરસં પરમ્ .
• અખણ્ડૈકરસં ભોજ્યમખણ્ડૈકરસં હવિઃ . ૨૩.
• અખણ્ડૈકરસો હોમઃ અખણ્ડૈકરસો જયઃ .
• અખણ્ડૈકરસઃ સ્વર્ગઃ અખણ્ડૈકરસઃ સ્વયમ્ . ૨૪.
• અખણ્ડૈકરસાકારાદન્યન્નાસ્તિ નહિ ક્વચિત્ .
• શૃણુ ભૂયો મહાશ્ચર્યં નિત્યાનુભવસંપદમ્ . ૨૫.
• દુર્લભં દુર્લભં લોકે સર્વલોકેષુ દુર્લભમ્ .
• અહમસ્મિ પરં ચાસ્મિ પ્રભાસ્મિ પ્રભવોઽસ્મ્યહમ્ . ૨૬.
• સર્વરૂપગુરુશ્ચાસ્મિ સર્વરૂપોઽસ્મિ સોઽસ્મ્યહમ્ .
• અહમેવાસ્મિ શુદ્ધોઽસ્મિ ઋદ્ધોઽસ્મિ પરમોઽસ્મ્યહમ્ . ૨૭.
• અહમસ્મિ સદા જ્ઞોઽસ્મિ સત્યોઽસ્મિ વિમલોઽસ્મ્યહમ્ .
• વિજ્ઞાનોઽસ્મિ વિશેષોઽસ્મિ સામ્યોઽસ્મિ સકલોઽસ્મ્યહમ્ . ૨૮.
• શુદ્ધોઽસ્મિ શોકહીનોઽસ્મિ ચૈતન્યોઽસ્મિ સમોઽસ્મ્યહમ્ .
• માનાવમાનહીનોઽસ્મિ નિર્ગુણોઽસ્મિ શિવોઽસ્મ્યહમ્ . ૨૯.
• દ્વૈતાદ્વૈતવિહીનોઽસ્મિ દ્વન્દ્વહીનોઽસ્મિ સોઽસ્મ્યહમ્ .
• ભાવાભાવવિહીનોઽસ્મિ ભાષાહીનોઽસ્મિ સોઽસ્મ્યહમ્ . ૩૦.
• શૂન્યાશૂન્યપ્રભાવોઽસ્મિ શોભનોઽસ્મિ મનોઽસ્મ્યહમ્ .
• તુલ્યાતુલ્યવિહીનોઽસ્મિ તુચ્છભાવોઽસ્મિ નાસ્મ્યહમ્ . ૩૧.
• સદા સર્વવિહીનોઽસ્મિ સાત્વિકોઽસ્મિ સદાસ્મ્યહમ્ .
• એકસંખ્યાવિહીનોઽસ્મિ દ્વિસંખ્યા નાસ્તિ નાસ્મ્યહમ્ . ૩૨.
• સદસદ્ભેદહીનોઽસ્મિ સંકલ્પરહિતોઽસ્મ્યહમ્ .
• નાનાત્મભેદહીનોઽસ્મિ યત્ કિઞ્ચિન્નાસ્તિ સોઽસ્મ્યહમ્ . ૩૩.
• નાહમસ્મિ ન ચાન્યોઽસ્મિ દેહાદિરહિતોઽસ્મ્યહમ્ .
• આશ્રયાશ્રયહીનોઽસ્મિ આધારરહિતોઽસ્મ્યહમ્ . ૩૪.
• બન્ધમોક્ષાદિહીનોઽસ્મિ શુદ્ધબ્રહ્માદિ સોઽસ્મ્યહમ્ .
• ચિત્તાદિસર્વહીનોઽસ્મિ પરમોઽસ્મિ પરોઽસ્મ્યહમ્ . ૩૫.
• સદા વિચારરૂપોઽસ્મિ નિર્વિચારોઽસ્મિ સોઽસ્મ્યહમ્ .
• આકારાદિસ્વરૂપોઽસ્મિ ઉકારોઽસ્મિ મુદોઽસ્મ્યહમ્ . ૩૬.
• ધ્યાનાધ્યાનવિહીનોઽસ્મિ ધ્યેયહીનોઽસ્મિ સોઽસ્મ્યહમ્ .
• પૂર્ણાત્ પૂર્ણોઽસ્મિ પૂર્ણોઽસ્મિ સર્વપૂર્ણોઽસ્મિ સોઽસ્મ્યહમ્ . ૩૭.
• સર્વાતીતસ્વરૂપોઽસ્મિ પરં બ્રહ્માસ્મિ સોઽસ્મ્યહમ્ .
• લક્ષ્યલક્ષણહીનોઽસ્મિ લયહીનોઽસ્મિ સોઽસ્મ્યહમ્ . ૩૮.
• માતૃમાનવિહીનોઽસ્મિ મેયહીનોઽસ્મિ સોઽસ્મ્યહમ્ .
• અગત્ સર્વં ચ દ્રષ્ટાસ્મિ નેત્રાદિરહિતોઽસ્મ્યહમ્ . ૩૯.
• પ્રવૃદ્ધોઽસ્મિ પ્રબુદ્ધોઽસ્મિ પ્રસન્નોઽસ્મિ પરોઽસ્મ્યહમ્ .
• સર્વેન્દ્રિયવિહીનોઽસ્મિ સર્વકર્મહિતોઽસ્મ્યહમ્ . ૪૦.
• સર્વવેદાન્તતૃપ્તોઽસ્મિ સર્વદા સુલભોઽસ્મ્યહમ્ .
• મુદા મુદિતશૂન્યોઽસ્મિ સર્વમૌનફલોઽસ્મ્યહમ્ . ૪૧.
• નિત્યચિન્માત્રરૂપોઽસ્મિ સદસચ્ચિન્મયોઽસ્મ્યહમ્ .
• યત્ કિઞ્ચિદપિ હીનોઽસ્મિ સ્વલ્પમપ્યતિ નાહિતમ્ . ૪૨.
• હૃદયગ્રન્થિહીનોઽસ્મિ હૃદયાદ્વ્યાપકોઽસ્મ્યહમ્ .
• ષડ્વિકારવિહીનોઽસ્મિ ષટ્કોશરહિતોઽસ્મ્યહમ્ . ૪૩.
• અરિષડ્વર્ગમુક્તોઽસ્મિ અન્તરાદન્તરોઽસ્મ્યહમ્ .
• દેશકાલવિહીનોઽસ્મિ દિગમ્બરમુખોઽસ્મ્યહમ્ . ૪૪.
• નાસ્તિ હાસ્તિ વિમુક્તોઽસ્મિ નકારરહિતોઽસ્મ્યહમ્ .
• સર્વચિન્માત્રરૂપોઽસ્મિ સચ્ચિદાનન્દમસ્મ્યહમ્ . ૪૫.
• અખણ્ડાકારરૂપોઽસ્મિ અખણ્ડાકારમસ્મ્યહમ્ .
• પ્રપઞ્ચચિત્તરૂપોઽસ્મિ પ્રપઞ્ચરહિતોઽસ્મ્યહમ્ . ૪૬.
• સર્વપ્રકારરૂપોઽસ્મિ સદ્ભાવાવર્જિતોઽસ્મ્યહમ્ .
• કાલત્રયવિહીનોઽસ્મિ કામાદિરહિતોઽસ્મ્યહમ્ . ૪૭.
• કાયકાયિવિમુક્તોઽસ્મિ નિર્ગુણપ્રભવોઽસ્મ્યહમ્ .
• મુક્તિહીનોઽસ્મિ મુક્તોઽસ્મિ મોક્ષહીનોઽસ્મ્યહં સદા . ૪૮.
• સત્યાસત્યવિહીનોઽસ્મિ સદા સન્માત્રમસ્મ્યહમ્ .
• ગન્તવ્યદેશહીનોઽસ્મિ ગમનારહિતોઽસ્મ્યહમ્ . ૪૯.
• સર્વદા સ્મરરૂપોઽસ્મિ શાન્તોઽસ્મિ સુહિતોઽસ્મ્યહમ્ .
• એવં સ્વાનુભવં પ્રોક્તં એતત્ પ્રકરણં મહત્ . ૫૦.
• યઃ શૃણોતિ સકૃદ્વાપિ બ્રહ્મૈવ ભવતિ સ્વયમ્ .
• પિણ્ડાણ્ડસંભવજગદ્ગતખણ્ડનોદ્ય-
• દ્વેતણ્ડશુણ્ડનિભપીવરબાહુદણ્ડ .
• બ્રહ્મોરુમુણ્ડકલિતાણ્ડજવાહબાણ
• કોદણ્ડભૂધરધરં ભજતામખણ્ડમ્ . ૫૧.
• વિશ્વાત્મન્યદ્વિતીયે ભગવતિ ગિરિજાનાયકે કાશરૂપે
• નીરૂપે વિશ્વરૂપે ગતદુરિતધિયઃ પ્રાપ્નુવન્ત્યાત્મભાવમ્ .
• અન્યે ભેદધિયઃ શ્રુતિપ્રકથિતૈર્વર્ણાશ્રમોત્થશ્રમૈઃ
• તાન્તાઃ શાન્તિવિવર્જિતા વિષયિણો દુઃખં ભજન્ત્યન્વહમ્ . ૫૨.

• . ઇતિ શ્રીશિવરહસ્યે શઙ્કરાખ્યે ષષ્ઠાંશે ઋભુનિદાઘસંવાદે સ્વાત્મનિરૂપણં નામ સપ્તમોઽધ્યાયઃ .

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com