ઋભુગીતા ૪૬ . જ્ઞાનોપાય-ભૂત શિવ-વ્રત નિરૂપણમ્ .
નિદાઘઃ -
- એતદ્ગ્રન્થં સદા શ્રુત્વા ચિત્તજાડ્યમકુર્વતઃ .
- યાવદ્દેહં સદા વિત્તૈઃ શુશ્રૂષેત્ પૂજયેદ્ગુરુમ્ . ૧.
- તત્પૂજયૈવ સતતં અહં બ્રહ્મેતિ નિશ્ચિનુ .
- નિત્યં પૂર્ણોઽસ્મિ નિત્યોઽસ્મિ સર્વદા શાન્તવિગ્રહઃ . ૨.
- એતદેવાત્મવિજ્ઞાનં અહં બ્રહ્મેતિ નિર્ણયઃ .
- નિરઙ્કુશસ્વરૂપોઽસ્મિ અતિવર્ણાશ્રમી ભવ . ૩.
- અગ્નિરિત્યાદિભિર્મન્{}ત્રૈઃ સર્વદા ભસ્મધારણમ્ .
- ત્રિયાયુષૈસ્ત્ર્યંબકૈશ્ચ કુર્વન્તિ ચ ત્રિપુણ્ડ્રકમ્ . ૪.
- ત્રિપુણ્ડ્રધારિણામેવ સર્વદા ભસ્મધારણમ્ .
- શિવપ્રસાદસંપત્તિર્ભવિષ્યતિ ન સંશયઃ . ૫.
- શિવપ્રસાદાદેતદ્વૈ જ્ઞાનં સંપ્રાપ્યતે ધ્રુવમ્ .
- શિરોવ્રતમિદં પ્રોક્તં કેવલં ભસ્મધારણમ્ . ૬.
- ભસ્મધારણમાત્રેણ જ્ઞાનમેતદ્ભવિષ્યતિ .
- અહં વત્સરપર્યન્તં કૃત્વા વૈ ભસ્મધારણમ્ . ૭.
- ત્વત્પાદાબ્જં પ્રપન્નોઽસ્મિ ત્વત્તો લબ્ધાત્મ નિર્વૃતિઃ .
- સર્વાધારસ્વરૂપોઽહં સચ્ચિદાનન્દમાત્રકમ્ . ૮.
- બ્રહ્માત્માહં સુલક્ષણ્યો બ્રહ્મલક્ષણપૂર્વકમ્ .
- આનન્દાનુભવં પ્રાપ્તઃ સચ્ચિદાનન્દવિગ્રહઃ . ૯.
- ગુણરૂપાદિમુક્તોઽસ્મિ જીવન્મુક્તો ન સંશયઃ .
- મૈત્ર્યાદિગુણસંપન્નો બ્રહ્મૈવાહં પરો મહાન્ . ૧૦.
- સમાધિમાનહં નિત્યં જીવન્મુક્તેષુ સત્તમઃ .
- અહં બ્રહ્માસ્મિ નિત્યોઽસ્મિ સમાધિરિતિ કથ્યતે . ૧૧.
- પ્રારબ્ધપ્રતિબન્ધશ્ચ જીવન્મુક્તેષુ વિદ્યતે .
- પ્રારબ્ધવશતો યદ્યત્ પ્રાપ્યં ભુઞ્જે સુખં વસ . ૧૨.
- દૂષણં ભૂષણં ચૈવ સદા સર્વત્ર સંભવેત્ .
- સ્વસ્વનિશ્ચયતો બુદ્ધ્યા મુક્તોઽહમિતિ મન્યતે . ૧૩.
- અહમેવ પરં બ્રહ્મ અહમેવ પરા ગતિઃ .
- એવં નિશ્ચયવાન્ નિત્યં જીવન્મુક્તેતિ કથ્યતે . ૧૪.
- એતદ્ભેદં ચ સન્ત્યજ્ય સ્વરૂપે તિષ્ઠતિ પ્રભુઃ .
- ઇન્દ્રિયાર્થવિહીનોઽહમિન્દ્રિયાર્થવિવર્જિતઃ . ૧૫.
- સર્વેન્દ્રિયગુણાતીતઃ સર્વેન્દ્રિયવિવર્જિતઃ .
- સર્વસ્ય પ્રભુરેવાહં સર્વં મય્યેવ તિષ્ઠતિ . ૧૬.
- અહં ચિન્માત્ર એવાસ્મિ સચ્ચિદાન્દવિગ્રહઃ .
- સર્વં ભેદં સદા ત્યક્ત્વા બ્રહ્મભેદમપિ ત્યજેત્ . ૧૭.
- અજસ્રં ભાવયન્ નિત્યં વિદેહો મુક્ત એવ સઃ .
- અહં બ્રહ્મ પરં બ્રહ્મ અહં બ્રહ્મ જગત્પ્રભુઃ . ૧૮.
- અહમેવ ગુણાતીતઃ અહમેવ મનોમયઃ .
- અહં મય્યો મનોમેયઃ પ્રાણમેયઃ સદામયઃ . ૧૯.
- સદૃઙ્મયો બ્રહ્મમયોઽમૃતમયઃ સભૂતોમૃતમેવ હિ .
- અહં સદાનન્દધનોઽવ્યયઃ સદા .
- સ વેદમય્યો પ્રણવોઽહમીશઃ . ૨૦.
- અપાણિપાદો જવનો ગૃહીતા
- અપશ્યઃ પશ્યામ્યાત્મવત્ સર્વમેવ .
- યત્તદ્ભૂતં યચ્ચ ભવ્યોઽહમાત્મા
- સર્વાતીતો વર્તમાનોઽહમેવ . ૨૨.
- . ઇતિ શ્રીશિવરહસ્યે શઙ્કરાખ્યે ષષ્ઠાંશે ઋભુનિદાઘસંવાદે જ્ઞાનોપાયભૂતશિવવ્રતનિરૂપણં નામ ષટ્ચત્વારિંશોઽધ્યાયઃ .
Special Thanks
The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.
Credits
Encoded by Anil Sharma anilandvijaya at gmail.com
Proofread by Sunder Hattangadi and Anil Sharma
https://sanskritdocuments.org
Send corrections to sanskrit at cheerful.com