ঋভুগীতা ১ ॥ ঋভু স্তুতি ॥

• হেমাদ্রিং কিল মাতুলুঙ্গফলমিত্যাদায মোদাধিকো
• মৌঢ্যান্নাকনিবাসিনাং ভযপরৈর্বাক্যৈরিব প্রার্থিতঃ ।
• নীলীশাম্বরনীলমম্বরতলং জম্বূফলং ভাবযন্
• তং মুঞ্চন্ গিরিমম্বরং পরিমৃশন্ লম্বোদরঃ পাতু মাম্ ॥ ১॥
• বামং যস্য বপুঃ সমস্তজগতাং মাতা পিতা চেতরত্
• যত্পাদাম্বুজনূপুরোদ্ভবরবঃ শব্দার্থবাক্যাস্পদম্ ।
• যন্নেত্রত্রিতযং সমস্তজগতামালোকহেতুঃ সদা
• পাযাদ্দৈবতসার্বভৌমগিরিজালঙ্কারমূর্তিঃ শিবঃ ॥ ২॥

সূতঃ -

• জৈগীষব্যঃ পুনর্নত্বা ষণ্মুখং শিবসংভবম্ ।
• পপ্রচ্ছ হৃষ্টস্তং তত্র মুনিভির্গণপুঙ্গবৈঃ ॥ ৩॥

জৈগীষব্যঃ -

• করুণাকর সর্বজ্ঞ শরণাগতপালক ।
• অরুণাধিপনেত্রাব্জ চরণস্মরণোন্মুখ ॥ ৪॥
• করুণাবরুণাম্ভোধে তরণিদ্যুতিভাস্কর ।
• দিব্যদ্বাদশলিঙ্গানাং মহিমা সংশ্রুতো মযা ॥ ৫॥
• ত্বত্তোঽন্যত্ শ্রোতুমিচ্ছামি শিবাখ্যানমনুত্তমম্ ।
• ত্বদ্বাক্যকঞ্জপীযূষধারাভিঃ পাবযাশু মাম্ ॥ ৬॥

সূতঃ -

• ইতি তস্য গিরা তুষ্টঃ ষণ্মুখঃ প্রাহ তং মুনিম্ ॥ ৭॥

শ্রীষণ্মুখঃ -

• শৃণু ত্বমগজাকান্তেনোক্তং জ্ঞানমহার্ণবম্ ।
• ঋভবে যত্পুরা প্রাহ কৈলাসে শঙ্করঃ স্বযম্ ॥ ৮॥
• ব্রহ্মসূনুঃ পুরা বিপ্রো গত্বা নত্বা মহেশ্বরম্ ।
• ঋভুর্বিভুং তদা শংভুং তুষ্টাব প্রণতো মুদা ॥ ৯॥

ঋভুঃ -

• দিবামণিনিশাপতিস্ফুটকৃপীটযোনিস্ফুর-
• ল্ললাটভসিতোল্লসদ্বরত্রিপুণ্ড্রভাগোজ্বলম্ ।var was ত্রিপুণ্ট্র
• ভজামি ভুজগাঙ্গদং বিধৃতসামিসোমপ্রভা-
• বিরাজিতকপর্দকং করটিকৃত্তিভূষ্যত্কটিম্ ॥ ১০॥
• ফালাক্ষাধ্বরদক্ষশিক্ষকবলক্ষোক্ষেশবাহোত্তম-
• ত্র্যক্ষাক্ষয্য ফলপ্রদাবভসিতালঙ্কাররুদ্রাক্ষধৃক্ ।
• চক্ষুঃশ্রোত্রবরাঙ্গহারসুমহাবক্ষঃস্থলাধ্যক্ষ মাং
• ভক্ষ্যীভূতগরপ্রভক্ষ ভগবন্ ভিক্ষ্বর্চ্যপাদাম্বুজ ॥ ১১॥
• গঙ্গাচন্দ্রকলাললাম ভগবন্ ভূভৃত্কুমারীসখ
• স্বামিংস্তে পদপদ্মভাবমতুলং কষ্টাপহং দেহি মে ।
• তুষ্টোঽহং শিপিবিষ্টহৃষ্টমনসা ভ্রষ্টান্ন মন্যে হরি-
• ব্রহ্মেন্দ্রানমরান্ ত্রিবিষ্টপগতান্ নিষ্ঠা হি মে তাদৃশী ॥ ১২॥
• নৃত্তাডংবরসজ্জটাপটলিকাভ্রাম্যন্মহোডুচ্ছটা
• ত্রুট্যত্সোমকলাললামকলিকা শম্যাকমৌলীনতম্ ।
• উগ্রানুগ্রভবোগ্রদুর্গজগদুদ্ধারাগ্রপাদাম্বুজং
• রক্ষোবক্ষকুঠারভূতমুমযা বীক্ষে সুকামপ্রদম্ ॥ ১৩॥
• ফালং মে ভসিতত্রিপুণ্ড্ররচিতং ত্বত্পাদপদ্মানতং ??
• পাহীশান দযানিধান ভগবন্ ফালানলাক্ষ প্রভো ।
• কণ্ঠো মে শিতিকণ্ঠনাম ভবতো রুদ্রাক্ষধৃক্ পাহি মাং
• কর্ণৌ মে ভুজগাধিপোরুসুমহাকর্ণ প্রভো পাহি মাম্ ॥ ১৪॥
• নিত্যং শঙ্করনামবোধিতকথাসারাদরং শঙ্করং
• বাচং রুদ্রজপাদরাং সুমহতীং পঞ্চাক্ষরীমিন্দুধৃক্ ।
• বাহূ মে শশিভূষণোত্তম মহালিঙ্গার্চনাযোদ্যতৌ
• পাহি প্রেমরসার্দ্রযাঽদ্য সুদৃশা শম্ভো হিরণ্যপ্রভ ॥ ১৫॥
• ভাস্বদ্বাহুচতুষ্টযোজ্জ্বল সদা নেত্রে ত্রিনেত্রে প্রভো
• ত্বল্লিঙ্গোত্তমদর্শনেন সুতরাং তৃপ্তৈঃ সদা পাহি মে ।
• পাদৌ মে হরিনেত্রপূজিতপদদ্বন্দ্বাব নিত্যং প্রভো
• ত্বল্লিঙ্গালযপ্রক্রমপ্রণতিভির্মান্যৌ চ ধন্যৌ বিভো ॥ ১৬॥
• ধন্যস্ত্বল্লিঙ্গসঙ্গেপ্যনুদিনগলিতানঙ্গসঙ্গান্তরঙ্গঃ
• পুংসামর্থৈকশক্ত্যা যমনিযমবরৈর্বিশ্ববন্দ্য প্রভো যঃ ।
• দত্বা বিল্বদলং সদম্বুজবরং কিঞ্চিজ্জলং বা মুহুঃ
• প্রাপ্নোতীশ্বরপাদপঙ্কজমুমানাথাদ্য মুক্তিপ্রদম্ ॥ ১৭॥
• উমারমণ শঙ্কর ত্রিদশবন্দ্য বেদেড্য হৃত্
• ত্বদীযপরভাবতো মম সদৈব নির্বাণকৃত্ ।
• ভবার্ণবনিবাসিনাং কিমু ভবত্পদাম্ভোরুহ-
• প্রভাবভজনাদরং ভবতি মানসং মুক্তিদম্ ॥ ১৮॥
• সংসারার্গলপাদবদ্ধজনতাসংমোচনং ভর্গ তে
• পাদদ্বন্দ্বমুমাসনাথ ভজতাং সংসারসংভর্জকম্ ।
• ত্বন্নামোত্তমগর্জনাদঘকুলং সন্তর্জিতং বৈ ভবেদ্
• দুঃখানাং পরিমার্জকং তবকৃপাবীক্ষাবতাং জাযতে ॥ ১৯॥
• বিধিমুণ্ডকরোত্তমোরুমেরুকোদণ্ডখণ্ডিতপুরাণ্ডজবাহবাণ
• পাহি ক্ষমারথবিকর্ষসুবেদবাজিহেষান্তহর্ষিতপদাম্বুজ বিশ্বনাথ ॥ ২০॥
• বিভূতীনামন্তো ন হি খলু ভবানীরমণ তে
• ভবে ভাবং কশ্চিত্ ত্বযি ভবহ ভাগ্যেন লভতে ।
• অভাবং চাজ্ঞানং ভবতি জননাদ্যৈশ্চ রহিতঃ
• উমাকান্ত স্বান্তে ভবদভযপাদং কলযতঃ ॥ ২১॥
• বরং শংভো ভাবৈর্ভবভজনভাবেন নিতরাং
• ভবাম্ভোধির্নিত্যং ভবতি বিততঃ পাংসুবহুলঃ ।
• বিমুক্তিং ভুক্তিং চ শ্রুতিকথিতভস্মাক্ষবরধৃক্
• ভবে ভর্তুঃ সর্বো ভবতি চ সদানন্দমধুরঃ ॥ ২২॥
• সোমসামজসুকৃত্তিমৌলিধৃক্ সামসীমশিরসি স্তুতপাদ ।
• সামিকাযগিরিজেশ্বর শম্ভো পাহি মামখিলদুঃখসমূহাত্ ॥ ২৩॥
• ভস্মাঙ্গরাগ ভুজগাঙ্গ মহোক্ষসঙ্গ
• গঙ্গাম্বুসঙ্গ সুজটা নিটিল স্ফুলিঙ্গ ।
• লিঙ্গাঙ্গ ভঙ্গিতমনঙ্গ বিহঙ্গবাহ-
• সম্পূজ্যপাদ সদসঙ্গ জনান্তরঙ্গ ॥ ২৪॥
• বাত্সল্যং মযি তাদৃশং তবনচেচ্চন্দ্রার্ধ চূডামণে
• ধিক্কৃত্যাপি বিমুচ্য বা ত্বযি যতো ধন্যো ধরণ্যামহম্ ।
• সক্ষারং লবণার্ণবস্য সলিলং ধারা ধরেণ ক্ষণাত্
• আদাযোজ্ঝিতমাক্ষিতৌ হি জগতাং আস্বাদনীযাং দৃশাম্ ॥ ২৫॥
• ত্বত্ কৈলাসবরে বিশোকহৃদযাঃ ক্রোধোজ্ঝিতাচ্চাণ্ডজাঃ
• তস্মান্মামপি ভেদবুদ্ধিরহিতং কুর্বীশ তেঽনুগ্রহাত্ ।
• ত্বদ্বক্ত্রামল নির্জরোজ্ঝিত মহাসংসার সংতাপহং
• বিজ্ঞানং করুণাঽদিশাদ্য ভগবন্ লোকাবনায প্রভো ॥ ২৬॥
• সারঙ্গী সিংহশাবং স্পৃশতি সুতধিযা নন্দিনী ব্যাঘ্রপোতং
• মার্জারী হংসবালং প্রণযপরবশা কেকিকান্তা ভুজঙ্গম্ ।
• বৈরাণ্যাজন্মজাতান্যপি গলিতমদা জন্তবোঽন্যে ত্যজন্তি
• ভক্তাস্ত্বত্পাদপদ্মে কিমু ভজনবতঃ সর্বসিদ্ধিং লভন্তে ॥ ২৭॥

স্কন্দঃ -

• ইত্থং ঋভুস্তুতিমুমাবরজানিরীশঃ
• শ্রুত্বা তমাহ গণনাথবরো মহেশঃ ।
• জ্ঞানং ভবামযবিনাশকরং তদেব
• তস্মৈ তদেব কথযে শৃণু পাশমুক্ত্যৈ ॥ ২৮॥

• ॥ ইতি শ্রীশিবরহস্যে শংকরাখ্যে ষষ্ঠাংশে ঋভুস্তুতির্নাম প্রথমোঽধ্যাযঃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com