Ribhu Gita - Siva Rahasya Purana Amsha 6

ঋভুগীতা ১৬ ॥ চিদেব-ত্বং প্রকরণ নিরূপণম্ ॥

ঋভুঃ -

অত্যন্তং দুর্লভং বক্ষ্যে বেদশাস্ত্রাগমাদিষু ।
শৃণ্বন্তু সাবধানেন অসদেব হি কেবলম্ ॥ ১॥
যত্কিঞ্চিদ্ দৃশ্যতে লোকে যত্কিঞ্চিদ্ভাষতে সদা ।
যত্কিঞ্চিদ্ ভুজ্যতে ক্বাপি তত্সর্বমসদেব হি ॥ ২॥
যদ্যত্ কিঞ্চিজ্জপং বাপি স্নানং বা জলমেব বা ।
আত্মনোঽন্যত্ পরং যদ্যত্ অসত্ সর্বং ন সংশযঃ ॥ ৩॥
চিত্তকার্যং বুদ্ধিকার্যং মাযাকার্যং তথৈব হি ।
আত্মনোঽন্যত্ পরং কিঞ্চিত্ তত্সর্বমসদেব হি ॥ ৪॥
অহন্তাযাঃ পরং রূপং ইদংত্বং সত্যমিত্যপি ।
আত্মনোঽন্যত্ পরং কিঞ্চিত্ তত্সর্বমসদেব হি ॥ ৫॥
নানাত্বমেব রূপত্বং ব্যবহারঃ ক্বচিত্ ক্বচিত্ ।
আত্মীয এব সর্বত্র তত্সর্বমসদেব হি ॥ ৬॥
তত্ত্বভেদং জগদ্ভেদং সর্বভেদমসত্যকম্ ।
ইচ্ছাভেদং জগদ্ভেদং তত্সর্বমসদেব হি ॥ ৭॥
দ্বৈতভেদং চিত্রভেদং জাগ্রদ্ভেদং মনোমযম্ ।
অহংভেদমিদংভেদমসদেব হি কেবলম্ ॥ ৮॥
স্বপ্নভেদং সুপ্তিভেদং তুর্যভেদমভেদকম্ ।
কর্তৃভেদং কার্যভেদং গুণভেদং রসাত্মকম্ ।
লিঙ্গভেদমিদংভেদমসদেব হি কেবলম্ ॥ ৯॥
আত্মভেদমসদ্ভেদং সদ্ভেদমসদণ্বপি ।
অত্যন্তাভাবসদ্ভেদম্ অসদেব হি কেবলম্ ॥ ১০॥
অস্তিভেদং নাস্তিভেদমভেদং ভেদবিভ্রমঃ ।
ভ্রান্তিভেদং ভূতিভেদমসদেব হি কেবলম্ ॥ ১১॥
পুনরন্যত্র সদ্ভেদমিদমন্যত্র বা ভযম্ ।
পুণ্যভেদং পাপভেদং অসদেব হি কেবলম্ ॥ ১২॥
সঙ্কল্পভেদং তদ্ভেদং সদা সর্বত্র ভেদকম্ ।
জ্ঞানাজ্ঞানমযং সর্বং অসদেব হি কেবলম্ ॥ ১৩॥
ব্রহ্মভেদং ক্ষত্রভেদং ভূতভৌতিকভেদকম্ ।
ইদংভেদমহংভেদং অসদেব হি কেবলম্ ॥ ১৪॥
বেদভেদং দেবভেদং লোকানাং ভেদমীদৃশম্ ।
পঞ্চাক্ষরমসন্নিত্যম্ অসদেব হি কেবলম্ ॥ ১৫॥
জ্ঞানেন্দ্রিযমসন্নিত্যং কর্মেন্দ্রিযমসত্সদা ।
অসদেব চ শব্দাখ্যং অসত্যং তত্ফলং তথা ॥ ১৬॥
অসত্যং পঞ্চভূতাখ্যমসত্যং পঞ্চদেবতাঃ ।
অসত্যং পঞ্চকোশাখ্যম্ অসদেব হি কেবলম্ ॥ ১৭॥
অসত্যং ষড্বিকারাদি অসত্যং ষট্কমূর্মিণাম্ ।
অসত্যমরিষড্বর্গমসত্যং ষডৃতুস্তদা ॥ ১৮॥var was তথা
অসত্যং দ্বাদশমাসাঃ অসত্যং বত্সরস্তথা ।
অসত্যং ষডবস্থাখ্যং ষট্কালমসদেব হি ॥ ১৯॥
অসত্যমেব ষট্শাস্ত্রং অসদেব হি কেবলম্ ।
অসদেব সদা জ্ঞানং অসদেব হি কেবলম্ ॥ ২০॥
অনুক্তমুক্তং নোক্তং চ অসদেব হি কেবলম্ ।
অসত্প্রকরণং প্রোক্তং সর্ববেদেষু দুর্লভম্ ॥ ২১॥
ভূযঃ শৃণু ত্বং যোগীন্দ্র সাক্ষান্মোক্ষং ব্রবীম্যহম্ ।
সন্মাত্রমহমেবাত্মা সচ্চিদানন্দ কেবলম্ ॥ ২২॥
সন্মযানন্দভূতাত্মা চিন্মযানন্দসদ্ঘনঃ ।
চিন্মযানন্দসন্দোহচিদানন্দো হি কেবলম্ ॥ ২৩॥
চিন্মাত্রজ্যোতিরান্দশ্চিন্মাত্রজ্যোতিবিগ্রহঃ ।
চিন্মাত্রজ্যোতিরীশানঃ সর্বদানন্দকেবলম্ ॥ ২৪॥
চিন্মাত্রজ্যোতিরখিলং চিন্মাত্রজ্যোতিরস্ম্যহম্ ।
চিন্মাত্রং সর্বমেবাহং সর্বং চিন্মাত্রমেব হি ॥ ২৫॥
চিন্মাত্রমেব চিত্তং চ চিন্মাত্রং মোক্ষ এব চ ।
চিন্মাত্রমেব মননং চিন্মাত্রং শ্রবণং তথা ॥ ২৬॥
চিন্মাত্রমহমেবাস্মি সর্বং চিন্মাত্রমেব হি ।
চিন্মাত্রং নির্গুণং ব্রহ্ম চিন্মাত্রং সগুণং পরম্ ॥ ২৭॥
চিন্মাত্রমহমেব ত্বং সর্বং চিন্মাত্রমেব হি ।
চিন্মাত্রমেব হৃদযং চিন্মাত্রং চিন্মযং সদা ॥ ২৮॥
চিদেব ত্বং চিদেবাহং সর্বং চিন্মাত্রমেব হি ।
চিন্মাত্রমেব শান্তত্বং চিন্মাত্রং শান্তিলক্ষণম্ ॥ ২৯॥
চিন্মাত্রমেব বিজ্ঞানং চিন্মাত্রং ব্রহ্ম কেবলম্ ।
চিন্মাত্রমেব সংকল্পং চিন্মাত্রং ভুবনত্রযম্ ॥ ৩০॥
চিন্মাত্রমেব সর্বত্র চিন্মাত্রং ব্যাপকো গুরুঃ ।
চিন্মাত্রমেব শুদ্ধত্বং চিন্মাত্রং ব্রহ্ম কেবলম্ ॥ ৩১॥
চিন্মাত্রমেব চৈতন্যং চিন্মাত্রং ভাস্করাদিকম্ ।
চিন্মাত্রমেব সন্মাত্রং চিন্মাত্রং জগদেব হি ॥ ৩২॥
চিন্মাত্রমেব সত্কর্ম চিন্মাত্রং নিত্যমঙ্গলম্ ।
চিন্মাত্রমেব হি ব্রহ্ম চিন্মাত্রং হরিরেব হি ॥ ৩৩॥
চিন্মাত্রমেব মৌনাত্মা চিন্মাত্রং সিদ্ধিরেব হি ।
চিন্মাত্রমেব জনিতং চিন্মাত্রং সুখমেব হি ॥ ৩৪॥
চিন্মাত্রমেব গগনং চিন্মাত্রং পর্বতং জলম্ ।
চিন্মাত্রমেব নক্ষত্রং চিন্মাত্রং মেঘমেব হি ॥ ৩৫॥
চিদেব দেবতাকারং চিদেব শিবপূজনম্ ।
চিন্মাত্রমেব কাঠিন্যং চিন্মাত্রং শীতলং জলম্ ॥ ৩৬॥
চিন্মাত্রমেব মন্তব্যং চিন্মাত্রং দৃশ্যভাবনম্ ।
চিন্মাত্রমেব সকলং চিন্মাত্রং ভুবনং পিতা ॥ ৩৭॥
চিন্মাত্রমেব জননী চিন্মাত্রান্নাস্তি কিঞ্চন ।
চিন্মাত্রমেব নযনং চিন্মাত্রং শ্রবণং সুখম্ ॥ ৩৮॥
চিন্মাত্রমেব করণং চিন্মাত্রং কার্যমীশ্বরম্ ।
চিন্মাত্রং চিন্মযং সত্যং চিন্মাত্রং নাস্তি নাস্তি হি ॥ ৩৯॥
চিন্মাত্রমেব বেদান্তং চিন্মাত্রং ব্রহ্ম নিশ্চযম্ ।
চিন্মাত্রমেব সদ্ভাবি চিন্মাত্রং ভাতি নিত্যশঃ ॥ ৪০॥
চিদেব জগদাকারং চিদেব পরমং পদম্ ।
চিদেব হি চিদাকারং চিদেব হি চিদব্যযঃ ॥ ৪১॥
চিদেব হি শিবাকারং চিদেব হি শিববিগ্রহঃ ।
চিদাকারমিদং সর্বং চিদাকারং সুখাসুখম্ ॥ ৪২॥
চিদেব হি জডাকারং চিদেব হি নিরন্তরম্ ।
চিদেবকলনাকারং জীবাকারং চিদেব হি ॥ ৪৩॥
চিদেব দেবতাকারং চিদেব শিবপূজনম্ ।
চিদেব ত্বং চিদেবাহং সর্বং চিন্মাত্রমেব হি ॥ ৪৪॥
চিদেব পরমাকারং চিদেব হি নিরামযম্ ।
চিন্মাত্রমেব সততং চিন্মাত্রং হি পরাযণম্ ॥ ৪৫॥
চিন্মাত্রমেব বৈরাগ্যং চিন্মাত্রং নির্গুণং সদা ।
চিন্মাত্রমেব সঞ্চারং চিন্মাত্রং মন্ত্রতন্ত্রকম্ ॥ ৪৬॥
চিদাকারমিদং বিশ্বং চিদাকারং জগত্ত্রযম্ ।
চিদাকারমহঙ্কারং চিদাকারং পরাত্ পরম্ ॥ ৪৭॥
চিদাকারমিদং ভেদং চিদাকারং তৃণাদিকম্ ।
চিদাকারং চিদাকাশং চিদাকারমরূপকম্ ॥ ৪৮॥
চিদাকারং মহানন্দং চিদাকারং সুখাত্ সুখম্ ।
চিদাকারং সুখং ভোজ্যং চিদাকারং পরং গুরুম্ ॥ ৪৯॥
চিদাকারমিদং বিশ্বং চিদাকারমিদং পুমান্ ।
চিদাকারমজং শান্তং চিদাকারমনামযম্ ॥ ৫০॥
চিদাকারং পরাতীতং চিদাকারং চিদেব হি ।
চিদাকারং চিদাকাশং চিদাকাশং শিবাযতে ॥ ৫১॥
চিদাকারং সদা চিত্তং চিদাকারং সদাঽমৃতম্ ।
চিদাকারং চিদাকাশং তদা সর্বান্তরান্তরম্ ॥ ৫২॥
চিদাকারমিদং পূর্ণং চিদাকারমিদং প্রিযম্ ।
চিদাকারমিদং সর্বং চিদাকারমহং সদা ॥ ৫৩॥
চিদাকারমিদং স্থানং চিদাকারং হৃদম্বরম্ ।
চিদাবোধং চিদাকারং চিদাকাশং ততং সদা ॥ ৫৪॥
চিদাকারং সদা পূর্ণং চিদাকারং মহত্ফলম্ ।
চিদাকারং পরং তত্ত্বং চিদাকারং পরং ভবান্ ॥ ৫৫॥
চিদাকারং সদামোদং চিদাকারং সদা মৃতম্ ।
চিদাকারং পরং ব্রহ্ম চিদহং চিদহং সদা ॥ ৫৬॥
চিদহং চিদহং চিত্তং চিত্তং স্বস্য ন সংশযঃ ।
চিদেব জগদাকারং চিদেব শিবশঙ্করঃ ॥ ৫৭॥
চিদেব গগনাকারং চিদেব গণনাযকম্ ।
চিদেব ভুবনাকারং চিদেব ভবভাবনম্ ॥ ৫৮॥
চিদেব হৃদযাকারং চিদেব হৃদযেশ্বরঃ ।
চিদেব অমৃতাকারং চিদেব চলনাস্পদম্ ॥ ৫৯॥
চিদেবাহং চিদেবাহং চিন্মযং চিন্মযং সদা ।
চিদেব সত্যবিশ্বাসং চিদেব ব্রহ্মভাবনম্ ॥ ৬০॥
চিদেব পরমং দেবং চিদেব হৃদযালযম্ ।
চিদেব সকলাকারং চিদেব জনমণ্ডলম্ ॥ ৬১॥
চিদেব সর্বমানন্দং চিদেব প্রিযভাষণম্ ।
চিদেব ত্বং চিদেবাহং সর্বং চিন্মাত্রমেব হি ॥ ৬২॥
চিদেব পরমং ধ্যানং চিদেব পরমর্হণম্ ।
চিদেব ত্বং চিদেবাহং সর্বং চিন্মযমেব হি ॥ ৬৩॥
চিদেব ত্বং প্রকরণং সর্ববেদেষু দুর্লভম্ ।
সকৃচ্ছ্রবণমাত্রেণ ব্রহ্মৈব ভবতি ধ্রুবম্ ॥ ৬৪॥
যস্যাভিধ্যানযোগাজ্জনিমৃতিবিবশাঃ শাশ্বতং বৃত্তিভির্যে
মাযামোহৈর্বিহীনা হৃদুদরভযজং ছিদ্যতে গ্রন্থিজাতম্ ।
বিশ্বং বিশ্বাধিকরসং ভবতি ভবতো দর্শনাদাপ্তকামঃ
সো নিত্যো নির্বিকল্পো ভবতি ভুবি সদা ব্রহ্মভূতোঽন্তরাত্মা ॥ ৬৫॥

॥ ইতি শ্রীশিবরহস্যে শঙ্করাখ্যে ষষ্ঠাংশে ঋভুনিদাঘসংবাদে চিদেবত্বংপ্রকরণবর্ণনং নাম ষোডশোঽধ্যাযঃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com