ঋভুগীতা ৪৬ ॥ জ্ঞানোপায-ভূত শিব-ব্রত নিরূপণম্ ॥
নিদাঘঃ -
- এতদ্গ্রন্থং সদা শ্রুত্বা চিত্তজাড্যমকুর্বতঃ ।
- যাবদ্দেহং সদা বিত্তৈঃ শুশ্রূষেত্ পূজযেদ্গুরুম্ ॥ ১॥
- তত্পূজযৈব সততং অহং ব্রহ্মেতি নিশ্চিনু ।
- নিত্যং পূর্ণোঽস্মি নিত্যোঽস্মি সর্বদা শান্তবিগ্রহঃ ॥ ২॥
- এতদেবাত্মবিজ্ঞানং অহং ব্রহ্মেতি নির্ণযঃ ।
- নিরঙ্কুশস্বরূপোঽস্মি অতিবর্ণাশ্রমী ভব ॥ ৩॥
- অগ্নিরিত্যাদিভির্মন্{}ত্রৈঃ সর্বদা ভস্মধারণম্ ।
- ত্রিযাযুষৈস্ত্র্যংবকৈশ্চ কুর্বন্তি চ ত্রিপুণ্ড্রকম্ ॥ ৪॥
- ত্রিপুণ্ড্রধারিণামেব সর্বদা ভস্মধারণম্ ।
- শিবপ্রসাদসংপত্তির্ভবিষ্যতি ন সংশযঃ ॥ ৫॥
- শিবপ্রসাদাদেতদ্বৈ জ্ঞানং সংপ্রাপ্যতে ধ্রুবম্ ।
- শিরোব্রতমিদং প্রোক্তং কেবলং ভস্মধারণম্ ॥ ৬॥
- ভস্মধারণমাত্রেণ জ্ঞানমেতদ্ভবিষ্যতি ।
- অহং বত্সরপর্যন্তং কৃত্বা বৈ ভস্মধারণম্ ॥ ৭॥
- ত্বত্পাদাব্জং প্রপন্নোঽস্মি ত্বত্তো লব্ধাত্ম নির্বৃতিঃ ।
- সর্বাধারস্বরূপোঽহং সচ্চিদানন্দমাত্রকম্ ॥ ৮॥
- ব্রহ্মাত্মাহং সুলক্ষণ্যো ব্রহ্মলক্ষণপূর্বকম্ ।
- আনন্দানুভবং প্রাপ্তঃ সচ্চিদানন্দবিগ্রহঃ ॥ ৯॥
- গুণরূপাদিমুক্তোঽস্মি জীবন্মুক্তো ন সংশযঃ ।
- মৈত্র্যাদিগুণসংপন্নো ব্রহ্মৈবাহং পরো মহান্ ॥ ১০॥
- সমাধিমানহং নিত্যং জীবন্মুক্তেষু সত্তমঃ ।
- অহং ব্রহ্মাস্মি নিত্যোঽস্মি সমাধিরিতি কথ্যতে ॥ ১১॥
- প্রারব্ধপ্রতিবন্ধশ্চ জীবন্মুক্তেষু বিদ্যতে ।
- প্রারব্ধবশতো যদ্যত্ প্রাপ্যং ভুঞ্জে সুখং বস ॥ ১২॥
- দূষণং ভূষণং চৈব সদা সর্বত্র সংভবেত্ ।
- স্বস্বনিশ্চযতো বুদ্ধ্যা মুক্তোঽহমিতি মন্যতে ॥ ১৩॥
- অহমেব পরং ব্রহ্ম অহমেব পরা গতিঃ ।
- এবং নিশ্চযবান্ নিত্যং জীবন্মুক্তেতি কথ্যতে ॥ ১৪॥
- এতদ্ভেদং চ সন্ত্যজ্য স্বরূপে তিষ্ঠতি প্রভুঃ ।
- ইন্দ্রিযার্থবিহীনোঽহমিন্দ্রিযার্থবিবর্জিতঃ ॥ ১৫॥
- সর্বেন্দ্রিযগুণাতীতঃ সর্বেন্দ্রিযবিবর্জিতঃ ।
- সর্বস্য প্রভুরেবাহং সর্বং ময্যেব তিষ্ঠতি ॥ ১৬॥
- অহং চিন্মাত্র এবাস্মি সচ্চিদান্দবিগ্রহঃ ।
- সর্বং ভেদং সদা ত্যক্ত্বা ব্রহ্মভেদমপি ত্যজেত্ ॥ ১৭॥
- অজস্রং ভাবযন্ নিত্যং বিদেহো মুক্ত এব সঃ ।
- অহং ব্রহ্ম পরং ব্রহ্ম অহং ব্রহ্ম জগত্প্রভুঃ ॥ ১৮॥
- অহমেব গুণাতীতঃ অহমেব মনোমযঃ ।
- অহং ময্যো মনোমেযঃ প্রাণমেযঃ সদামযঃ ॥ ১৯॥
- সদৃঙ্মযো ব্রহ্মমযোঽমৃতমযঃ সভূতোমৃতমেব হি ।
- অহং সদানন্দধনোঽব্যযঃ সদা ।
- স বেদময্যো প্রণবোঽহমীশঃ ॥ ২০॥
- অপাণিপাদো জবনো গৃহীতা
- অপশ্যঃ পশ্যাম্যাত্মবত্ সর্বমেব ।
- যত্তদ্ভূতং যচ্চ ভব্যোঽহমাত্মা
- সর্বাতীতো বর্তমানোঽহমেব ॥ ২২॥
- ॥ ইতি শ্রীশিবরহস্যে শঙ্করাখ্যে ষষ্ঠাংশে ঋভুনিদাঘসংবাদে জ্ঞানোপাযভূতশিবব্রতনিরূপণং নাম ষট্চত্বারিংশোঽধ্যাযঃ ॥
Special Thanks
The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.
Credits
Encoded by Anil Sharma anilandvijaya at gmail.com
Proofread by Sunder Hattangadi and Anil Sharma
https://sanskritdocuments.org
Send corrections to sanskrit at cheerful.com