Ribhu Gita - Siva Rahasya Purana Amsha 6

ঋভুগীতা ৮ ॥ প্রপঞ্চ-শূন্যত্ব-সর্বনাস্তিতত্ব নিরূপণম্ ॥

ঋভুঃ -

বক্ষ্যে প্রপঞ্চশূন্যত্বং শশশৃঙ্গেণ সংমিতম্ ।
দুর্লভং সর্বলোকেষু সাবধানমনাঃ শৃণু ॥ ১॥
ইদং প্রপঞ্চং যত্ কিঞ্চিদ্যঃ শৃণোতি চ পশ্যতি ।
দৃশ্যরূপং চ দৃগ্রূপং সর্বং শশবিষাণবত্ ॥ ২॥
ভূমিরাপোঽনলো বাযুঃ খং মনো বুদ্ধিরেব চ ।
অহংকারশ্চ তেজশ্চ সর্বং শশবিষাণবত্ ॥ ৩॥
নাশ জন্ম চ সত্যং চ লোকং ভুবনমণ্ডলম্ ।
পুণ্যং পাপং জযো মোহঃ সর্বং শশবিষাণবত্ ॥ ৪॥
কামক্রোধৌ লোভমোহৌ মদমোহৌ রতির্ধৃতিঃ ।
গুরুশিষ্যোপদেশাদি সর্বং শশবিষাণবত্ ॥ ৫॥
অহং ত্বং জগদিত্যাদি আদিরন্তিমমধ্যমম্ ।
ভূতং ভব্যং বর্তমানং সর্বং শশবিষাণবত্ ॥ ৬॥
স্থূলদেহং সূক্ষ্মদেহং কারণং কার্যমপ্যযম্ ।
দৃশ্যং চ দর্শনং কিঞ্চিত্ সর্বং শশবিষাণবত্ ॥ ৭॥
ভোক্তা ভোজ্যং ভোগরূপং লক্ষ্যলক্ষণমদ্বযম্ ।
শমো বিচারঃ সন্তোষঃ সর্বং শশবিষাণবত্ ॥ ৮॥
যমং চ নিযমং চৈব প্রাণাযামাদিভাষণম্ ।
গমনং চলনং চিত্তং সর্বং শশবিষাণবত্ ॥ ৯॥
শ্রোত্রং নেত্রং গাত্রগোত্রং গুহ্যং জাড্যং হরিঃ শিবঃ ।
আদিরন্তো মুমুক্ষা চ সর্বং শশবিষাণবত্ ॥ ১০॥
জ্ঞানেন্দ্রিযং চ তন্মাত্রং কর্মেন্দ্রিযগণং চ যত্ ।
জাগ্রত্স্বপ্নসুষুপ্ত্যাদি সর্বং শশবিষাণবত্ ॥ ১১॥
চতুর্বিংশতিতত্ত্বং চ সাধনানাং চতুষ্টযম্ ।
সজাতীযং বিজাতীযং সর্বং শশবিষাণবত্ ॥ ১২॥
সর্বলোকং সর্বভূতং সর্বধর্মং সতত্বকম্ ।
সর্বাবিদ্যা সর্ববিদ্যা সর্বং শশবিষাণবত্ ॥ ১৩॥
সর্ববর্ণঃ সর্বজাতিঃ সর্বক্ষেত্রং চ তীর্থকম্ ।
সর্ববেদং সর্বশাস্ত্রং সর্বং শশবিষাণবত্ ॥ ১৪॥
সর্ববন্ধং সর্বমোক্ষং সর্ববিজ্ঞানমীশ্বরঃ ।
সর্বকালং সর্ববোধ সর্বং শশবিষাণবত্ ॥ ১৫॥
সর্বাস্তিত্বং সর্বকর্ম সর্বসঙ্গযুতির্মহান্ ।
সর্বদ্বৈতমসদ্ভাবং সর্বং শশবিষাণবত্ ॥ ১৬॥
সর্ববেদান্তসিদ্ধান্তঃ সর্বশাস্ত্রার্থনির্ণযঃ ।
সর্বজীবত্বসদ্ভাবং সর্বং শশবিষাণবত্ ॥ ১৭॥
যদ্যত্ সংবেদ্যতে কিঞ্চিত্ যদ্যজ্জগতি দৃশ্যতে ।
যদ্যচ্ছৃণোতি গুরুণা সর্বং শশবিষাণবত্ ॥ ১৮॥
যদ্যদ্ধ্যাযতি চিত্তে চ যদ্যত্ সংকল্প্যতে ক্বচিত্ ।
বুদ্ধ্যা নিশ্চীযতে যচ্চ সর্বং শশবিষাণবত্ ॥ ১৯॥
যদ্যদ্ বাচা ব্যাকরোতি যদ্বাচা চার্থভাষণম্ ।
যদ্যত্ সর্বেন্দ্রিযৈর্ভাব্যং সর্বং শশবিষাণবত্ ॥ ২০॥
যদ্যত্ সন্ত্যজ্যতে বস্তু যচ্ছৃণোতি চ পশ্যতি ।
স্বকীযমন্যদীযং চ সর্বং শশবিষাণবত্ ॥ ২১॥
সত্যত্বেন চ যদ্ভাতি বস্তুত্বেন রসেন চ ।
যদ্যত্ সঙ্কল্প্যতে চিত্তে সর্বং শশবিষাণবত্ ॥ ২২॥
যদ্যদাত্মেতি নির্ণীতং যদ্যন্নিত্যমিতং বচঃ ।
যদ্যদ্বিচার্যতে চিত্তে সর্বং শশবিষাণবত্ ॥ ২৩॥
শিবঃ সংহরতে নিত্যং বিষ্ণুঃ পাতি জগত্ত্রযম্ ।
স্রষ্টা সৃজতি লোকান্ বৈ সর্বং শশবিষাণবত্ ॥ ২৪॥
জীব ইত্যপি যদ্যস্তি ভাষযত্যপি ভাষণম্ ।
সংসার ইতি যা বার্তা সর্বং শশবিষাণবত্ ॥ ২৫॥
যদ্যদস্তি পুরাণেষু যদ্যদ্বেদেষু নির্ণযঃ ।
সর্বোপনিষদাং ভাবং সর্বং শশবিষাণবত্ ॥ ২৬॥
শশশৃঙ্গবদেবেদমুক্তং প্রকরণং তব ।
যঃ শৃণোতি রহস্যং বৈ ব্রহ্মৈব ভবতি স্বযম্ ॥ ২৭॥
ভূযঃ শৃণু নিদাঘ ত্বং সর্বং ব্রহ্মেতি নিশ্চযম্ ।
সুদুর্লভমিদং নৄণাং দেবানামপি সত্তম ॥ ২৮॥
ইদমিত্যপি যদ্রূপমহমিত্যপি যত্পুনঃ ।
দৃশ্যতে যত্তদেবেদং সর্বং ব্রহ্মেতি কেবলম্ ॥ ২৯॥
দেহোঽযমিতি সঙ্কল্পস্তদেব ভযমুচ্যতে ।
কালত্রযেঽপি তন্নাস্তি সর্বং ব্রহ্মেতি কেবলম্ ॥ ৩০॥
দেহোঽহমিতি সঙ্কল্পস্তদন্তঃকরণং স্মৃতম্ ।
কালত্রযেঽপি তন্নাস্তি সর্বং ব্রহ্মেতি কেবলম্ ॥ ৩১॥
দেহোঽহমিতি সঙ্কল্পঃ স হি সংসার উচ্যতে ।
কালত্রযেঽপি তন্নাস্তি সর্বং ব্রহ্মেতি কেবলম্ ॥ ৩২॥
দেহোঽহমিতি সঙ্কল্পস্তদ্বন্ধনমিহোচ্যতে ।
কালত্রযেঽপি তন্নাস্তি সর্বং ব্রহ্মেতি কেবলম্ ॥ ৩৩॥
দেহোঽহমিতি যদ্ জ্ঞানং তদেব নরকং স্মৃতম্ ।
কালত্রযেঽপি তন্নাস্তি সর্বং ব্রহ্মেতি কেবলম্ ॥ ৩৪॥
দেহোঽহমিতি সঙ্কল্পো জগত্ সর্বমিতীর্যতে ।
কালত্রযেঽপি তন্নাস্তি সর্বং ব্রহ্মেতি কেবলম্ ॥ ৩৫॥
দেহোঽহমিতি সঙ্কল্পো হৃদযগ্রন্থিরীরিতঃ ।
কালত্রযেঽপি তন্নাস্তি সর্বং ব্রহ্মেতি কেবলম্ ॥ ৩৬॥
দেহত্রযেঽপি ভাবং যত্ তদ্দেহজ্ঞানমুচ্যতে ।
কালত্রযেঽপি তন্নাস্তি সর্বং ব্রহ্মেতি কেবলম্ ॥ ৩৭॥
দেহোঽহমিতি যদ্ভাবং সদসদ্ভাবমেব চ ।
কালত্রযেঽপি তন্নাস্তি সর্বং ব্রহ্মেতি কেবলম্ ॥ ৩৮॥
দেহোঽহমিতি সঙ্কল্পস্তত্প্রপঞ্চমিহোচ্যতে ।
কালত্রযেঽপি তন্নাস্তি সর্বং ব্রহ্মেতি কেবলম্ ॥ ৩৯॥
দেহোঽহমিতি সঙ্কল্পস্তদেবাজ্ঞানমুচ্যতে ।
কালত্রযেঽপি তন্নাস্তি সর্বং ব্রহ্মেতি কেবলম্ ॥ ৪০॥
দেহোঽহমিতি যা বুদ্ধির্মলিনা বাসনোচ্যতে ।
কালত্রযেঽপি তন্নাস্তি সর্বং ব্রহ্মেতি কেবলম্ ॥ ৪১॥
দেহোঽহমিতি যা বুদ্ধিঃ সত্যং জীবঃ স এব সঃ ।
কালত্রযেঽপি তন্নাস্তি সর্বং ব্রহ্মেতি কেবলম্ ॥ ৪২॥
দেহোঽহমিতি সঙ্কল্পো মহানরকমীরিতম্ ।
কালত্রযেঽপি তন্নাস্তি সর্বং ব্রহ্মেতি কেবলম্ ॥ ৪৩॥
দেহোঽহমিতি যা বুদ্ধির্মন এবেতি নিশ্চিতম্ ।
কালত্রযেঽপি তন্নাস্তি সর্বং ব্রহ্মেতি কেবলম্ ॥ ৪৪॥
দেহোঽহমিতি যা বুদ্ধিঃ পরিচ্ছিন্নমিতীর্যতে ।
কালত্রযেঽপি তন্নাস্তি সর্বং ব্রহ্মেতি কেবলম্ ॥ ৪৫॥
দেহোঽহমিতি যদ্ জ্ঞানং সর্বং শোক ইতীরিতম্ ।
কালত্রযেঽপি তন্নাস্তি সর্বং ব্রহ্মেতি কেবলম্ ॥ ৪৬॥
দেহোঽহমিতি যদ্ জ্ঞানং সংস্পর্শমিতি কথ্যতে ।
কালত্রযেঽপি তন্নাস্তি সর্বং ব্রহ্মেতি কেবলম্ ॥ ৪৭॥
দেহোঽহমিতি যা বুদ্ধিস্তদেব মরণং স্মৃতম্ ।
কালত্রযেঽপি তন্নাস্তি সর্বং ব্রহ্মেতি কেবলম্ ॥ ৪৮॥
দেহোঽহমিতি যা বুদ্ধিস্তদেবাশোভনং স্মৃতম্ ।
কালত্রযেঽপি তন্নাস্তি সর্বং ব্রহ্মেতি কেবলম্ ॥ ৪৯॥
দেহোঽহমিতি যা বুদ্ধির্মহাপাপমিতি স্মৃতম্ ।
কালত্রযেঽপি তন্নাস্তি সর্বং ব্রহ্মেতি কেবলম্ ॥ ৫০॥
দেহোঽহমিতি যা বুদ্ধিঃ তুষ্টা সৈব হি চোচ্যতে ।
কালত্রযেঽপি তন্নাস্তি সর্বং ব্রহ্মেতি কেবলম্ ॥ ৫১॥
দেহোঽহমিতি সঙ্কল্পঃ সর্বদোষমিতি স্মৃতম্ ।
কালত্রযেঽপি তন্নাস্তি সর্বং ব্রহ্মেতি কেবলম্ ॥ ৫২॥
দেহোঽহমিতি সঙ্কল্পস্তদেব মলমুচ্যতে ।
কালত্রযেঽপি তন্নাস্তি সর্বং ব্রহ্মেতি কেবলম্ ॥ ৫৩॥
দেহোঽহমিতি সঙ্কল্পো মহত্সংশযমুচ্যতে ।
কালত্রযেঽপি তন্নাস্তি সর্বং ব্রহ্মেতি কেবলম্ ॥ ৫৪॥
যত্কিঞ্চিত্স্মরণং দুঃখং যত্কিঞ্চিত্ স্মরণং জগত্ ।
যত্কিঞ্চিত্স্মরণং কামো যত্কিঞ্চিত্স্মরণং মলম্ ॥ ৫৫॥
যত্কিঞ্চিত্স্মরণং পাপং যত্কিঞ্চিত্স্মরণং মনঃ ।
যত্কিঞ্চিদপি সঙ্কল্পং মহারোগেতি কথ্যতে ॥ ৫৬॥
যত্কিঞ্চিদপি সঙ্কল্পং মহামোহেতি কথ্যতে ।
যত্কিঞ্চিদপি সঙ্কল্পং তাপত্রযমুদাহৃতম্ ॥ ৫৭॥
যত্কিঞ্চিদপি সঙ্কল্পং কামক্রোধং চ কথ্যতে ।
যত্কিঞ্চিদপি সঙ্কল্পং সংবন্ধো নেতরত্ ক্বচিত্ ॥ ৫৮॥
যত্কিঞ্চিদপি সঙ্কল্পং সর্বদুঃখেতি নেতরত্ ।
যত্কিঞ্চিদপি সঙ্কল্পং জগত্সত্যত্ববিভ্রমম্ ॥ ৫৯॥
যত্কিঞ্চিদপি সঙ্কল্পং মহাদোষং চ নেতরত্ ।
যত্কিঞ্চিদপি সঙ্কল্পং কালত্রযমুদীরিতম্ ॥ ৬০॥
যত্কিঞ্চিদপি সঙ্কল্পং নানারূপমুদীরিতম্ ।
যত্র যত্র চ সঙ্কল্পং তত্র তত্র মহজ্জগত্ ॥ ৬১॥
যত্র যত্র চ সঙ্কল্পং তদেবাসত্যমেব হি ।
যত্কিঞ্চিদপি সঙ্কল্পং তজ্জগন্নাস্তি সংশযঃ ॥ ৬২॥
যত্কিঞ্চিদপি সঙ্কল্পং তত্সর্বং নেতি নিশ্চযঃ ।
মন এব জগত্সর্বং মন এব মহারিপুঃ ॥ ৬৩॥
মন এব হি সংসারো মন এব জগত্ত্রযম্ ।
মন এব মহাদুঃখং মন এব জরাদিকম্ ॥ ৬৪॥
মন এব হি কালং চ মন এব মলং সদা ।
মন এব হি সঙ্কল্পো মন এব হি জীবকঃ ॥ ৬৫॥
মন এবাশুচির্নিত্যং মন এবেন্দ্রজালকম্ ।
মন এব সদা মিথ্যা মনো বন্ধ্যাকুমারবত্ ॥ ৬৬॥
মন এব সদা নাস্তি মন এব জডং সদা ।
মন এব হি চিত্তং চ মনোঽহংকারমেব চ ॥ ৬৭॥
মন এব মহদ্বন্ধং মনোঽন্তঃকরণং ক্বচিত্ ।
মন এব হি ভূমিশ্চ মন এব হি তোযকম্ ॥ ৬৮॥
মন এব হি তেজশ্চ মন এব মরুন্মহান্ ।
মন এব হি চাকাশো মন এব হি শব্দকঃ ॥ ৬৯॥
মন এব স্পর্শরূপং মন এব হি রূপকম্ ।
মন এব রসাকারং মনো গন্ধঃ প্রকীর্তিতঃ ॥ ৭০॥
অন্নকোশং মনোরূপং প্রাণকোশং মনোমযম্ ।
মনোকোশং মনোরূপং বিজ্ঞানং চ মনোমযঃ ॥ ৭১॥
মন এবানন্দকোশং মনো জাগ্রদবস্থিতম্ ।
মন এব হি স্বপ্নং চ মন এব সুষুপ্তিকম্ ॥ ৭২॥
মন এব হি দেবাদি মন এব যমাদযঃ ।
মন এব হি যত্কিঞ্চিন্মন এব মনোমযঃ ॥ ৭৩॥
মনোমযমিদং বিশ্বং মনোমযমিদং পুরম্ ।
মনোমযমিদং ভূতং মনোমযমিদং দ্বযম্ ॥ ৭৪॥
মনোমযমিযং জাতির্মনোমযমযং গুণঃ ।
মনোমযমিদং দৃশ্যং মনোমযমিদং জডম্ ॥ ৭৫॥
মনোমযমিদং যদ্যন্মনো জীব ইতি স্থিতম্ ।
সঙ্কল্পমাত্রমজ্ঞানং ভেদঃ সঙ্কল্প এব হি ॥ ৭৬॥
সঙ্কল্পমাত্রং বিজ্ঞানং দ্বন্দ্বং সঙ্কল্প এব হি ।
সঙ্কল্পমাত্রকালং চ দেশং সঙ্কল্পমেব হি ॥ ৭৭॥
সঙ্কল্পমাত্রো দেহশ্চ প্রাণঃ সঙ্কল্পমাত্রকঃ ।
সঙ্কল্পমাত্রং মননং সঙ্কল্পং শ্রবণং সদা ॥ ৭৮॥
সঙ্কল্পমাত্রং নরকং সঙ্কল্পং স্বর্গ ইত্যপি ।
সঙ্কল্পমেব চিন্মাত্রং সঙ্কল্পং চাত্মচিন্তনম্ ॥ ৭৯॥
সঙ্কল্পং বা মনাক্তত্ত্বং ব্রহ্মসঙ্কল্পমেব হি ।
সঙ্কল্প এব যত্কিঞ্চিত্ তন্নাস্ত্যেব কদাচন ॥ ৮০॥
নাস্তি নাস্ত্যেব সঙ্কল্পং নাস্তি নাস্তি জগত্ত্রযম্ ।
নাস্তি নাস্তি গুরুর্নাস্তি নাস্তি শিষ্যোঽপি বস্তুতঃ ॥ ৮১॥
নাস্তি নাস্তি শরীরং চ নাস্তি নাস্তি মনঃ ক্বচিত্ ।
নাস্তি নাস্ত্যেব কিঞ্চিদ্বা নাস্তি নাস্ত্যখিলং জগত্ ॥ ৮২॥
নাস্তি নাস্ত্যেব ভূতং বা সর্বং নাস্তি ন সংশযঃ ।
"সর্বং নাস্তি" প্রকরণং মযোক্তং চ নিদাঘ তে ।
যঃ শৃণোতি সকৃদ্বাপি ব্রহ্মৈব ভবতি স্বযম্ ॥ ৮৩॥
বেদান্তৈরপি চন্দ্রশেখরপদাম্ভোজানুরাগাদরা-
দারোদারকুমারদারনিকরৈঃ প্রাণৈর্বনৈরুজ্ঝিতঃ ।
ত্যাগাদ্যো মনসা সকৃত্ শিবপদধ্যানেন যত্প্রাপ্যতে
তন্নৈবাপ্যতি শব্দতর্কনিবহৈঃ শান্তং মনস্তদ্ভবেত্ ॥ ৮৪॥
অশেষদৃশ্যোজ্ঝিতদৃঙ্মযানাং
সঙ্কল্পবর্জেন সদাস্থিতানাম্ ।
ন জাগ্রতঃ স্বপ্নসুষুপ্তিভাবো
ন জীবনং নো মরণং চ চিত্রম্ ॥ ৮৫॥

॥ ইতি শ্রীশিবরহস্যে শঙ্করাখ্যে ষষ্ঠাংশে ঋভুনিদাঘসংবাদে প্রপঞ্চশূন্যত্ব-সর্বনাস্তিত্বনিরূপণং নাম অষ্টমোঽধ্যাযঃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com