Ribhu Gita - Siva Rahasya Purana Amsha 6

ঋভুগীতা ২৫ ॥ ব্রহ্মণঃ সর্ব-রূপত্ব নিরূপণ প্রকরণম্ ॥

ঋভুঃ -

বক্ষ্যে প্রসিদ্ধমাত্মানং সর্বলোকপ্রকাশকম্ ।
সর্বাকারং সদা সিদ্ধং সর্বত্র নিবিডং মহত্ ॥ ১॥
তদ্ব্রহ্মাহং ন সন্দেহ ইতি নিশ্চিত্য তিষ্ঠ ভোঃ ।
চিদেবাহং চিদেবাহং চিত্রং চেদহমেব হি ॥ ২॥
বাচাবধিশ্চ দেবোঽহং চিদেব মনসঃ পরঃ ।
চিদেবাহং পরং ব্রহ্ম চিদেব সকলং পদম্ ॥ ৩॥
স্থূলদেহং চিদেবেদং সূক্ষ্মদেহং চিদেব হি ।
চিদেব করণং সোঽহং কাযমেব চিদেব হি ॥ ৪॥
অখণ্ডাকারবৃত্তিশ্চ উত্তমাধমমধ্যমাঃ ।
দেহহীনশ্চিদেবাহং সূক্ষ্মদেহশ্চিদেব হি ॥ ৫॥
চিদেব কারণং সোঽহং বুদ্ধিহীনশ্চিদেব হি ।
ভাবহীনশ্চিদেবাহং দোষহীনশ্চিদেব হি ॥ ৬॥
অস্তিত্বং ব্রহ্ম নাস্ত্যেব নাস্তি ব্রহ্মেতি নাস্তি হি ।
অস্তি নাস্তীতি নাস্ত্যেব অহমেব চিদেব হি ॥ ৭॥
সর্বং নাস্ত্যেব নাস্ত্যেব সাকারং নাস্তি নাস্তি হি ।
যত্কিঞ্চিদপি নাস্ত্যেব অহমেব চিদেব হি ॥ ৮॥
অন্বযব্যতিরেকং চ আদিমধ্যান্তদূষণম্ ।
সর্বং চিন্মাত্ররূপত্বাদহমেব চিদেব হি ॥ ৯॥
সর্বাপরং চ সদসত্ কার্যকারণকর্তৃকম্ ।
সর্বং নাস্ত্যেব নাস্ত্যেব অহমেব হি কেবলম্ ॥ ১০॥
অশুদ্ধং শুদ্ধমদ্বৈতং দ্বৈতমেকমনেককম্ ।
সর্বং নাস্ত্যেব নাস্ত্যেব অহমেব হি কেবলম্ ॥ ১১॥
অসত্যসত্যমদ্বন্দ্বং দ্বন্দ্বং চ পরতঃ পরম্ ।
সর্বং নাস্ত্যেব নাস্ত্যেব অহমেব হি কেবলম্ ॥ ১২॥
ভূতং ভবিষ্যং বর্তং চ মোহামোহৌ সমাসমৌ ।
সর্বং নাস্ত্যেব নাস্ত্যেব অহমেব হি কেবলম্ ॥ ১৩॥
ক্ষণং লবং ত্রুটির্ব্রহ্ম ত্বংপদং তত্পদং তথা ।
সর্বং নাস্ত্যেব নাস্ত্যেব অহমেব হি কেবলম্ ॥ ১৪॥
ত্বংপদং তত্পদং বাপি ঐক্যং চ হ্যহমেব হি ।
সর্বং নাস্ত্যেব নাস্ত্যেব অহমেব হি কেবলম্ ॥ ১৫॥
আনন্দং পরমানন্দং সর্বানন্দং নিজং মহত্ ।
সর্বং নাস্ত্যেব নাস্ত্যেব অহমেব হি কেবলম্ ॥ ১৬॥
অহং ব্রহ্ম ইদং ব্রহ্ম কং ব্রহ্ম হ্যক্ষরং পরম্ ।
সর্বং নাস্ত্যেব নাস্ত্যেব অহমেব হি কেবলম্ ॥ ১৭॥
বিষ্ণুরেব পরং ব্রহ্ম শিবো ব্রহ্মাহমেব হি ।
সর্বং নাস্ত্যেব নাস্ত্যেব অহমেব হি কেবলম্ ॥ ১৮॥
শ্রোত্রং ব্রহ্ম পরং ব্রহ্ম শব্দং ব্রহ্ম পদং শুভম্ ।
সর্বং নাস্ত্যেব নাস্ত্যেব অহমেব হি কেবলম্ ॥ ১৯॥
স্পর্শো ব্রহ্ম পদং ত্বক্চ ত্বক্চ ব্রহ্ম পরস্পরম্ ।
সর্বং নাস্ত্যেব নাস্ত্যেব অহমেব হি কেবলম্ ॥ ২০॥
পরং রূপং চক্ষুভিঃ এব তত্রৈব যোজ্যতাম্ ।
সর্বং নাস্ত্যেব নাস্ত্যেব অহমেব হি কেবলম্ ॥ ২১॥
ব্রহ্মৈব সর্বং সততং সচ্চিদানন্দমাত্রকম্ ।
সর্বং নাস্ত্যেব নাস্ত্যেব অহমেব হি কেবলম্ ॥ ২২॥
চিন্মযানন্দমাত্রোঽহং ইদং বিশ্বমিদং সদা ।
সর্বং নাস্ত্যেব নাস্ত্যেব অহমেব হি কেবলম্ ॥ ২৩॥
ব্রহ্মৈব সর্বং যত্কিঞ্চিত্ তদ্ব্রহ্মাহং ন সংশযঃ ।
সর্বং নাস্ত্যেব নাস্ত্যেব অহমেব হি কেবলম্ ॥ ২৪॥
বাচা যত্ প্রোচ্যতে নাম মনসা মনুতে তু যত্ ।
সর্বং নাস্ত্যেব নাস্ত্যেব অহমেব হি কেবলম্ ॥ ২৫॥
কারণে কল্পিতে যদ্যত্ তূষ্ণীং বা স্থীযতে সদা ।
শরীরেণ তু যদ্ ভুঙ্ক্তে ইন্দ্রিযৈর্যত্তু ভাব্যতে ।
সর্বং নাস্ত্যেব নাস্ত্যেব অহমেব হি কেবলম্ ॥ ২৬॥
বেদে যত্ কর্ম বেদোক্তং শাস্ত্রং শাস্ত্রোক্তনির্ণযম্ ।
গুরূপদেশসিদ্ধান্তং শুদ্ধাশুদ্ধবিভাসকম্ ॥ ২৭॥
কামাদিকলনং ব্রহ্ম দেবাদি কলনং পৃথক্ ।
জীবযুক্তেতি কলনং বিদেহো মুক্তিকল্পনম্ ॥ ২৮॥
ব্রহ্ম ইত্যপি সঙ্কল্পং ব্রহ্মবিদ্বরকল্পনম্ ।
বরীযানিতি সঙ্কল্পং বরিষ্ঠ ইতি কল্পনম্ ॥ ২৯॥
ব্রহ্মাহমিতি সঙ্কল্পং চিদহং চেতি কল্পনম্ ।
মহাবিদ্যেতি সঙ্কল্পং মহামাযেতি কল্পনম্ ॥ ৩০॥
মহাশূন্যেতি সঙ্কল্পং মহাচিন্তেতি কল্পনম্ ।
মহালোকেতি সঙ্কল্পং মহাসত্যেতি কল্পনম্ ॥ ৩১॥
মহারূপেতি সঙ্কল্পং মহারূপং চ কল্পনম্ ।
সর্বসঙ্কল্পকং চিত্তং সর্বসঙ্কল্পকং মনঃ ॥ ৩২॥
সর্বং নাস্ত্যেব নাস্ত্যেব সর্বং ব্রহ্মৈব কেবলম্ ।
সর্বং দ্বৈতং মনোরূপং সর্বং দুঃখং মনোমযম্ ॥ ৩৩॥
চিদেবাহং ন সন্দেহঃ চিদেবেদং জগত্ত্রযম্ ।
যত্কিঞ্চিদ্ভাষণং বাপি যত্কিঞ্চিন্মনসো জপম্ ।
যত্কিঞ্চিন্মানসং কর্ম সর্বং ব্রহ্মৈব কেবলম্ ॥ ৩৪॥
সর্বং নাস্তীতি সন্মন্ত্রং জীবব্রহ্মস্বরূপকম্ ।
ব্রহ্মৈব সর্বমিত্যেবং মন্ত্রঞ্চৈবোত্তমোত্তমম্ ॥ ৩৫॥
অনুক্তমন্ত্রং সন্মন্ত্রং বৃত্তিশূন্যং পরং মহত্ ।
সর্বং ব্রহ্মেতি সঙ্কল্পং তদেব পরমং পদম্ ॥ ৩৬॥
সর্বং ব্রহ্মেতি সঙ্কল্পং মহাদেবেতি কীর্তনম্ ।
সর্বং ব্রহ্মেতি সঙ্কল্পং শিবপূজাসমং মহত্ ॥ ৩৭॥
সর্বং ব্রহ্মেত্যনুভবঃ সর্বাকারো ন সংশযঃ ।
সর্বং ব্রহ্মেতি সঙ্কল্পং সর্বত্যাগমিতীরিতম্ ॥ ৩৮॥
সর্বং ব্রহ্মেতি সঙ্কল্পং ভাবাভাববিনাশনম্ ।
সর্বং ব্রহ্মেতি সঙ্কল্পং মহাদেবেতি নিশ্চযঃ ॥ ৩৯॥
সর্বং ব্রহ্মেতি সঙ্কল্পং কালসত্তাবিনির্মুক্তঃ ।
সর্বং ব্রহ্মেতি সঙ্কল্পঃ দেহসত্তা বিমুক্তিকঃ ॥ ৪০॥
সর্বং ব্রহ্মেতি সঙ্কল্পঃ সচ্চিদানন্দরূপকঃ ।
সর্বোঽহং ব্রহ্মমাত্রৈব সর্বং ব্রহ্মৈব কেবলম্ ॥ ৪১॥
ইদমিত্যেব যত্কিঞ্চিত্ তদ্ব্রহ্মৈব ন সংশযঃ ।
ভ্রান্তিশ্চ নরকং দুঃখং স্বর্গভ্রান্তিরিতীরিতা ॥ ৪২॥
ব্রহ্মা বিষ্ণুরিতি ভ্রান্তির্ভ্রান্তিশ্চ শিবরূপকম্ ।
বিরাট্ স্বরাট্ তথা সম্রাট্ সূত্রাত্মা ভ্রান্তিরেব চ ॥ ৪৩॥
দেবাশ্চ দেবকার্যাণি সূর্যাচন্দ্রমসোর্গতিঃ ।
মুনযো মনবঃ সিদ্ধা ভ্রান্তিরেব ন সংশযঃ ॥ ৪৪॥
সর্বদেবাসুরা ভ্রান্তিস্তেষাং যুদ্ধাদি জন্ম চ ।
বিষ্ণোর্জন্মাবতারাণি চরিতং শান্তিরেব হি ॥ ৪৫॥
ব্রহ্মণঃ সৃষ্টিকৃত্যানি রুদ্রস্য চরিতানি চ ।
সর্বভ্রান্তিসমাযুক্তং ভ্রান্ত্যা লোকাশ্চতুর্দশ ॥ ৪৬॥
বর্ণাশ্রমবিভাগশ্চ ভ্রান্তিরেব ন সংশযঃ ।
ব্রহ্মবিষ্ণ্বীশরুদ্রাণামুপাসা ভ্রান্তিরেব চ ॥ ৪৭॥
তত্রাপি যন্ত্রমন্ত্রাভ্যাং ভ্রান্তিরেব ন সংশযঃ ।
বাচামগোচরং ব্রহ্ম সর্বং ব্রহ্মমযং চ হি ॥ ৪৮॥
সর্বং নাস্ত্যেব নাস্ত্যেব অহমেব চিদেব হি ।
এবং বদ ত্বং তিষ্ঠ ত্বং সদ্যো মুক্তো ভবিষ্যসি ॥ ৪৯॥
এতাবদুক্তং যত্কিঞ্চিত্ তন্নাস্ত্যেব ন সংশযঃ ।
এবং যদান্তরং ক্ষিপ্রং ব্রহ্মৈব দৃঢনিশ্চযম্ ॥ ৫০॥
দৃঢনিশ্চযমেবাত্র প্রথমং কারণং ভবেত্ ।
নিশ্চযঃ খল্বযং পশ্চাত্ স্বযমেব ভবিষ্যতি ॥ ৫১॥
আর্তং যচ্ছিবপাদতোঽন্যদিতরং তজ্জাদিশব্দাত্মকং
চেতোবৃত্তিপরং পরাপ্রমুদিতং ষড্ভাবসিদ্ধং জগত্ ।
ভূতাক্ষাদিমনোবচোভিরনঘে সান্দ্রে মহেশে ঘনে
সিন্ধৌ সৈন্ধবখণ্ডবজ্জগদিদং লীযেত বৃত্ত্যুজ্ঝিতম্ ॥ ৫২॥

॥ ইতি শ্রীশিবরহস্যে শঙ্করাখ্যে ষষ্ঠাংশে ঋভুনিদাঘসংবাদে ব্রহ্মণস্সর্বরূপত্বনিরূপণপ্রকরণং নাম পঞ্চবিংশোঽধ্যাযঃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com