Ribhu Gita - Siva Rahasya Purana Amsha 6

ঋভুগীতা ২৪ ॥ অহংব্রহ্ম প্রকরণ নিরূপণম্ ॥

ঋভুঃ -

পুনঃ পুনঃ পরং বক্ষ্যে আত্মনোঽন্যদসত্ স্বতঃ ।
অসতো বচনং নাস্তি সতো নাস্তি সদা স্থিতে ॥ ১॥
ব্রহ্মাভ্যাস পরস্যাহং বক্ষ্যে নির্ণযমাত্মনঃ ।
তস্যাপি সকৃদেবাহং বক্ষ্যে মঙ্গলপূর্বকম্ ॥ ২॥
সর্বং ব্রহ্মাহমেবাস্মি চিন্মাত্রো নাস্তি কিঞ্চন ।
অহমেব পরং ব্রহ্ম অহমেব চিদাত্মকম্ ॥ ৩॥
অহং মমেতি নাস্ত্যেব অহং জ্ঞানীতি নাস্তি চ ।
শুদ্ধোঽহং ব্রহ্মরূপোঽহমানন্দোঽহমজো নরঃ ॥ ৪॥var was নজঃ
দেবোঽহং দিব্যভানোঽহং তুর্যোঽহং ভবভাব্যহম্ ।
অণ্ডজোঽহমশেষোঽহমন্তরাদন্তরোঽস্ম্যহম্ ॥ ৫॥
অমরোঽহমজস্রোঽহমত্যন্তপরমোঽস্ম্যহম্ ।
পরাপরস্বরূপোঽহং নিত্যানিত্যরসোঽস্ম্যহম্ ॥ ৬॥
গুণাগুণবিহীনোঽহং তুর্যাতুর্যরসোঽস্ম্যহম্ ।
শান্তাশান্তবিহীনোঽহং জ্ঞানাজ্ঞানরসোঽস্ম্যহম্ ॥ ৭॥
কালাকালবিহীনোঽহমাত্মানাত্মবিবর্জিতঃ ।
লব্ধালব্ধাদিহীনোঽহং সর্বশূন্যোঽহমব্যযঃ ॥ ৮॥
অহমেবাহমেবাহমনন্তরনিরন্তরম্ ।
শাশ্বতোঽহমলক্ষ্যোঽহমাত্মা ন পরিপূর্ণতঃ ॥ ৯॥
ইত্যাদিশব্দমুক্তোঽহং ইত্যাদ্যং চ ন চাস্ম্যহম্ ।
ইত্যাদিবাক্যমুক্তোঽহং সর্ববর্জিতদুর্জযঃ ॥ ১০॥
নিরন্তরোঽহং ভূতোঽহং ভব্যোঽহং ভববর্জিতঃ ।
লক্ষ্যলক্ষণহীনোঽহং কার্যহীনোঽহমাশুগঃ ॥ ১১॥
ব্যোমাদিরূপহীনোঽহং ব্যোমরূপোঽহমচ্যুতঃ ।
অন্তরান্তরভাবোঽহমন্তরান্তরবর্জিতঃ ॥ ১২॥
সর্বসিদ্ধান্তরূপোঽহং সর্বদোষবিবর্জিতঃ ।
ন কদাচন মুক্তোঽহং ন বদ্ধোঽহং কদাচন ॥ ১৩॥
এবমেব সদা কৃত্বা ব্রহ্মৈবাহমিতি স্মর ।
এতাবদেব মাত্রং তু মুক্তো ভবতু নিশ্চযঃ ॥ ১৪॥
চিন্মাত্রোঽহং শিবোঽহং বৈ শুভমাত্রমহং সদা ।
সদাকারোঽহং মুক্তোঽহং সদা বাচামগোচরঃ ॥ ১৫॥
সর্বদা পরিপূর্ণোঽহং বেদোপাধিবিবর্জিতঃ ।
চিত্তকার্যবিহীনোঽহং চিত্তমস্তীতি মে ন হি ॥ ১৬॥
যত্ কিঞ্চিদপি নাস্ত্যেব নাস্ত্যেব প্রিযভাষণম্ ।
আত্মপ্রিযমনাত্মা হি ইদং মে বস্তুতো ন হি ॥ ১৭॥
ইদং দুঃখমিদং সৌখ্যমিদং ভাতি অহং ন হি ।
সর্ববর্জিতরূপোঽহং সর্ববর্জিতচেতনঃ ॥ ১৮॥
অনির্বাচ্যমনির্বাচ্যং পরং ব্রহ্ম রসোঽস্ম্যহম্ ।
অহং ব্রহ্ম ন সন্দেহ অহমেব পরাত্ পরঃ ॥ ১৯॥
অহং চৈতন্যভূতাত্মা দেহো নাস্তি কদাচন ।
লিঙ্গদেহং চ নাস্ত্যেব কারণং দেহমেব ন ॥ ২০॥
অহং ত্যক্ত্বা পরং চাহং অহং ব্রহ্মস্বরূপতঃ ।
কামাদিবর্জিতোঽতীতঃ কালভেদপরাত্পরঃ ॥ ২১॥
ব্রহ্মৈবেদং ন সংবেদ্যং নাহং ভাবং ন বা নহি ।
সর্বসংশযসংশান্তো ব্রহ্মৈবাহমিতি স্থিতিঃ ॥ ২২॥
নিশ্চযং চ ন মে কিঞ্চিত্ চিন্তাভাবাত্ সদাঽক্ষরঃ ।
চিদহং চিদহং ব্রহ্ম চিদহং চিদহং সদা ॥ ২৩॥
এবং ভাবনযা যুক্তস্ত্যক্তশঙ্কঃ সুখীভব ।
সর্বসঙ্গং পরিত্যজ্য আত্মৈক্যৈবং ভবান্বহম্ ॥ ২৪॥
সঙ্গং নাম প্রবক্ষ্যেঽহং ব্রহ্মাহমিতি নিশ্চযঃ ।
সত্যোঽহং পরমাত্মাঽহং স্বযমেব স্বযং স্বযম্ ॥ ২৫॥
নাহং দেহো ন চ প্রাণো ন দ্বন্দ্বো ন চ নির্মলঃ ।
এষ এব হি সত্সঙ্গঃ এষ এব হি নির্মলঃ ॥ ২৬॥
মহত্সঙ্গে মহদ্ব্রহ্মভাবনং পরমং পদম্ ।
অহং শান্তপ্রভাবোঽহং অহং ব্রহ্ম ন সংশযঃ ॥ ২৭॥
অহং ত্যক্তস্বরূপোঽহং অহং চিন্তাদিবর্জিতঃ ।
এষ এব হি সত্সঙ্গঃ এষ নিত্যং ভবানহম্ ॥ ২৮॥
সর্বসঙ্কল্পহীনোঽহং সর্ববৃত্তিবিবর্জিতঃ ।
অমৃতোঽহমজো নিত্যং মৃতিভীতিরতীতিকঃ ॥ ২৯॥
সর্বকল্যাণরূপোঽহং সর্বদা প্রিযরূপবান্ ।
সমলাঙ্গো মলাতীতঃ সর্বদাহং সদানুগঃ ॥ ৩০॥
অপরিচ্ছিন্নসন্মাত্রং সত্যজ্ঞানস্বরূপবান্ ।
নাদান্তরোঽহং নাদোঽহং নামরূপবিবর্জিতঃ ॥ ৩১॥
অত্যন্তাভিন্নহীনোঽহমাদিমধ্যান্তবর্জিতঃ ।
এবং নিত্যং দৃঢাভ্যাস এবং স্বানুভবেন চ ॥ ৩২॥
এবমেব হি নিত্যাত্মভাবনেন সুখী ভব ।
এবমাত্মা সুখং প্রাপ্তঃ পুনর্জন্ম ন সংভবেত্ ॥ ৩৩॥
সদ্যো মুক্তো ভবেদ্ব্রহ্মাকারেণ পরিতিষ্ঠতি ।
আত্মাকারমিদং বিশ্বমাত্মাকারমহং মহত্ ॥ ৩৪॥
আত্মৈব নান্যদ্ভূতং বা আত্মৈব মন এব হি ।
আত্মৈব চিত্তবদ্ভাতি আত্মৈব স্মৃতিবত্ ক্বচিত্ ॥ ৩৫॥
আত্মৈব বৃত্তিবদ্ভাতি আত্মৈব ক্রোধবত্ সদা ।var was বৃত্তিমদ্ভাতি
আত্মৈব শ্রবণং তদ্বদাত্মৈব মননং চ তত্ ॥ ৩৬॥
আত্মৈবোপক্রমং নিত্যমুপসংহারমাত্মবত্ ।
আত্মৈবাভ্যাং সমং নিত্যমাত্মৈবাপূর্বতাফলম্ ॥ ৩৭॥
অর্থবাদবদাত্মা হি পরমাত্মোপপত্তি হি ।
ইচ্ছা প্রারভ্যবদ্ব্রহ্ম ইচ্ছামারভ্যবত্ পরঃ ॥ ৩৮॥var was প্রারব্ধবদ্
পরেচ্ছারব্ধবদ্ব্রহ্মা ইচ্ছাশক্তিশ্চিদেব হি ।
অনিচ্ছাশক্তিরাত্মৈব পরেচ্ছাশক্তিরব্যযঃ ॥ ৩৯॥
পরমাত্মৈবাধিকারো বিষযং পরমাত্মনঃ ।
সংবন্ধং পরমাত্মৈব প্রযোজনং পরাত্মকম্ ॥ ৪০॥
ব্রহ্মৈব পরমং সঙ্গং কর্মজং ব্রহ্ম সঙ্গমম্ ।
ব্রহ্মৈব ভ্রান্তিজং ভাতি দ্বন্দ্বং ব্রহ্মৈব নান্যতঃ ॥ ৪১॥
সর্বং ব্রহ্মেতি নিশ্চিত্য সদ্য এব বিমোক্ষদম্ ।
সবিকল্পসমাধিস্থং নির্বিকল্পসমাধি হি ॥ ৪২॥
শব্দানুবিদ্ধং ব্রহ্মৈব ব্রহ্ম দৃশ্যানুবিদ্ধকম্ ।
ব্রহ্মৈবাদিসমাধিশ্চ তন্মধ্যমসমাধিকম্ ॥ ৪৩॥
ব্রহ্মৈব নিশ্চযং শূন্যং তদুক্তমসমাধিকম্ ।
দেহাভিমানরহিতং তদ্বৈরাগ্যসমাধিকম্ ॥ ৪৪॥
এতদ্ভাবনযা শান্তং জীবন্মুক্তসমাধিকঃ ।
অত্যন্তং সর্বশান্তত্বং দেহো মুক্তসমাধিকম্ ॥ ৪৫॥
এতদভ্যাসিনাং প্রোক্তং সর্বং চৈতত্সমন্বিতম্ ।
সর্বং বিস্মৃত্য বিস্মৃত্য ত্যক্ত্বা ত্যক্ত্বা পুনঃ পুনঃ ॥ ৪৬॥
সর্ববৃত্তিং চ শূন্যেন স্থাস্যামীতি বিমুচ্য হি ।
ন স্থাস্যামীতি বিস্মৃত্য ভাস্যামীতি চ বিস্মর ॥ ৪৭॥
চৈতন্যোঽহমিতি ত্যক্ত্বা সন্মাত্রোঽহমিতি ত্যজ ।
ত্যজনং চ পরিত্যজ্য ভাবনং চ পরিত্যজ ॥ ৪৮॥
সর্বং ত্যক্ত্বা মনঃ ক্ষিপ্রং স্মরণং চ পরিত্যজ ।
স্মরণং কিঞ্চিদেবাত্র মহাসংসারসাগরম্ ॥ ৪৯॥
স্মরণং কিঞ্চিদেবাত্র মহাদুঃখং ভবেত্ তদা ।
মহাদোষং ভবং বন্ধং চিত্তজন্ম শতং মনঃ ॥ ৫০॥
প্রারব্ধং হৃদযগ্রন্থি ব্রহ্মহত্যাদি পাতকম্ ।
স্মরণং চৈবমেবেহ বন্ধমোক্ষস্য কারণম্ ॥ ৫১॥
অহং ব্রহ্মপ্রকরণং সর্বদুঃখবিনাশকম্ ।
সর্বপ্রপঞ্চশমনং সদ্যো মোক্ষপ্রদং সদা ।
এতচ্ছ্রবণমাত্রেণ ব্রহ্মৈব ভবতি স্বযম্ ॥ ৫২॥
ভক্ত্যা পদ্মদলাক্ষপূজিতপদধ্যানানুবৃত্ত্যা মনঃ
স্বান্তানন্তপথপ্রচারবিধুরং মুক্ত্যৈ ভবেন্মানসম্ ।
সঙ্কল্পোজ্ঝিতমেতদল্পসুমহাশীলো দযাম্ভোনিধৌ
কশ্চিত্ স্যাচ্ছিবভক্তধুর্যসুমহাশান্তঃ শিবপ্রেমতঃ ॥ ৫৩॥

॥ ইতি শ্রীশিবরহস্যে শঙ্করাখ্যে ষষ্ঠাংশে ঋভুনিদাঘসংবাদে অহং ব্রহ্মপ্রকরণনিরূপণং নাম চতুর্বিংশোঽধ্যাযঃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com