Ribhu Gita - Siva Rahasya Purana Amsha 6

ঋভুগীতা ২৮ ॥ আত্ম-বৈলক্ষণ্য প্রকরণম্ ॥

ঋভুঃ -

ব্রহ্মৈবাহং চিদেবাহং নির্মলোঽহং নিরন্তরঃ ।
শুদ্ধস্বরূপ এবাহং নিত্যরূপঃ পরোঽস্ম্যহম্ ॥ ১॥
নিত্যনির্মলরূপোঽহং নিত্যচৈতন্যবিগ্রহঃ ।
আদ্যন্তরূপহীনোঽহমাদ্যন্তদ্বৈতহীনকঃ ॥ ২॥
অজস্রসুখরূপোঽহং অজস্রানন্দরূপবান্ ।
অহমেবাদিনির্মুক্তঃ অহং কারণবর্জিতঃ ॥ ৩॥
অহমেব পরং ব্রহ্ম অহমেবাহমেব হি ।
ইত্যেবং ভাবযন্নিত্যং সুখমাত্মনি নির্মলঃ ॥ ৪॥
সুখং তিষ্ঠ সুখং তিষ্ঠ সুচিরং সুখমাবহ ।
সর্ববেদমনন্যস্ত্বং সর্বদা নাস্তি কল্পনম্ ॥ ৫॥
সর্বদা নাস্তি চিত্তাখ্যং সর্বদা নাস্তি সংসৃতিঃ ।
সর্বদা নাস্তি নাস্ত্যেব সর্বদা জগদেব ন ॥ ৬॥
জগত্প্রসঙ্গো নাস্ত্যেব দেহবার্তা কুতস্ততঃ ।
ব্রহ্মৈব সর্বচিন্মাত্রমহমেব হি কেবলম্ ॥ ৭॥
চিত্তমিত্যপি নাস্ত্যেব চিত্তমস্তি হি নাস্তি হি ।
অস্তিত্বভাবনা নিষ্ঠা জগদস্তিত্ববাঙ্মৃষা ॥ ৮॥
অস্তিত্ববক্তা বার্তা হি জগদস্তীতি ভাবনা ।
স্বাত্মনোঽন্যজ্জগদ্রক্ষা দেহোঽহমিতি নিশ্চিতঃ ॥ ৯॥
মহাচণ্ডাল এবাসৌ মহাবিপ্রোঽপি নিশ্চযঃ ।
তস্মাদিতি জগন্নেতি চিত্তং বা বুদ্ধিরেব চ ॥ ১০॥
নাস্তি নাস্তীতি সহসা নিশ্চযং কুরু নির্মলঃ ।
দৃশ্যং নাস্ত্যেব নাস্ত্যেব নাস্তি নাস্তীতি ভাবয ॥ ১১॥
অহমেব পরং ব্রহ্ম অহমেব হি নিষ্কলঃ ।
অহমেব ন সন্দেহঃ অহমেব সুখাত্ সুখম্ ॥ ১২॥
অহমেব হি দিব্যাত্মা অহমেব হি কেবলঃ ।
বাচামগোচরোঽহং বৈ অহমেব ন চাপরঃ ॥ ১৩॥
অহমেব হি সর্বাত্মা অহমেব সদা প্রিযঃ ।
অহমেব হি ভাবাত্মা অহং বৃত্তিবিবর্জিতঃ ॥ ১৪॥
অহমেবাপরিচ্ছিন্ন অহমেব নিরন্তরঃ ।
অহমেব হি নিশ্চিন্ত অহমেব হি সদ্গুরুঃ ॥ ১৫॥
অহমেব সদা সাক্ষী অহমেবাহমেব হি ।
নাহং গুপ্তো ন বাঽগুপ্তো ন প্রকাশাত্মকঃ সদা ॥ ১৬॥
নাহং জডো ন চিন্মাত্রঃ ক্বচিত্ কিঞ্চিত্ তদস্তি হি ।
নাহং প্রাণো জডত্বং তদত্যন্তং সর্বদা ভ্রমঃ ॥ ১৭॥
অহমত্যন্তমানন্দ অহমত্যন্তনির্মলঃ ।
অহমত্যন্তবেদাত্মা অহমত্যন্তশাঙ্করঃ ॥ ১৮॥
অহমিত্যপি মে কিঞ্চিদহমিত্যপি ন স্মৃতিঃ ।
সর্বহীনোঽহমেবাগ্রে সর্বহীনঃ সুখাচ্ছুভাত্ ॥ ১৯॥
পরাত্ পরতরং ব্রহ্ম পরাত্ পরতরঃ পুমান্ ।
পরাত্ পরতরোঽহং বৈ সর্বস্যাত্ পরতঃ পরঃ ॥ ২০॥
সর্বদেহবিহীনোঽহং সর্বকর্মবিবর্জিতঃ ।
সর্বমন্ত্রঃ প্রশান্তাত্মা সর্বান্তঃকরণাত্ পরঃ ॥ ২১॥
সর্বস্তোত্রবিহীনোঽহং সর্বদেবপ্রকাশকঃ ।
সর্বস্নানবিহীনাত্মা একমগ্নোঽহমদ্বযঃ ॥ ২২॥
আত্মতীর্থে হ্যাত্মজলে আত্মানন্দমনোহরে ।
আত্মৈবাহমিতি জ্ঞাত্বা আত্মারামোবসাম্যহম্ ॥ ২৩॥
আত্মৈব ভোজনং হ্যাত্মা তৃপ্তিরাত্মসুখাত্মকঃ ।
আত্মৈব হ্যাত্মনো হ্যাত্মা আত্মৈব পরমো হ্যহম্ ॥ ২৪॥
অহমাত্মাঽহমাত্মাহমহমাত্মা ন লৌকিকঃ ।
সর্বাত্মাহং সদাত্মাহং নিত্যাত্মাহং গুণান্তরঃ ॥ ২৫॥
এবং নিত্যং ভাবযিত্বা সদা ভাবয সিদ্ধযে ।
সিদ্ধং তিষ্ঠতি চিন্মাত্রো নিশ্চযং মাত্রমেব সা ।
নিশ্চযং চ লযং যাতি স্বযমেব সুখী ভব ॥ ২৬॥
শাখাদিভিশ্চ শ্রুতযো হ্যনন্তা-
স্ত্বামেকমেব ভগবন্ বহুধা বদন্তি ।
বিষ্ণ্বিন্দ্রধাতৃরবিসূন্বনলানিলাদি
ভূতাত্মনাথ গণনাথললাম শম্ভো ॥ ২৭॥

॥ ইতি শ্রীশিবরহস্যে শঙ্করাখ্যে ষষ্ঠাংশে ঋভুনিদাঘসংবাদে আত্মবৈলক্ষণ্যপ্রকরণং নাম অষ্টাবিংশোঽধ্যাযঃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com