ঋভুগীতা ৪৯ ॥ শিবস্য জ্ঞানদাতৃত্ব নিরূপণম্ ॥

স্কন্দঃ -

• পুরা মগধদেশীযো ব্রাহ্মণো বেদপারগঃ ।
• উচথ্যতনযো বাগ্মী বেদার্থপ্রবণে ধৃতঃ ॥ ১॥
• নাম্না সুদর্শনো বিপ্রান্ পাঠযন্ শাস্ত্রমুত্তমম্ ।
• বেদান্তপরযা ভক্ত্যা বর্ণাশ্রমরতঃ সদা ॥ ২॥
• মোক্ষমিচ্ছেদপি সদা বিপ্রোঽপি চ জনার্দনাত্ ।
• বিষ্ণুপূজাপরো নিত্যং বিষ্ণুক্ষেত্রেষু সংবসন্ ॥ ৩॥
• গোপীচন্দনফালোসৌ তুলস্যৈবার্চযদ্ধরিম্ ।
• উবাস নিযতং বিপ্রো বিষ্ণুধ্যানপরাযণঃ ॥ ৪॥
• দশবর্ষমিদং তস্য কৃত্যং দৃষ্ট্বা জনার্দনঃ ।
• মোক্ষেচ্ছোরাজুহাবৈনং পুরতোদ্ভূয তং দ্বিজম্ ॥ ৫॥

বিষ্ণুঃ -

• ঔচথ্য মুনিশার্দূল তপস্যভিরতঃ সদা ।
• বৃণু কামং দদাম্যেব বিনা জ্ঞানং দ্বিজোত্তম ॥ ৬॥

সূতঃ -

• ইতি বিষ্ণোর্গিরং শ্রুত্বা বিপ্রঃ কিঞ্চিদ্ভযান্বিতঃ ।
• প্রণিপত্যাহ তং বিষ্ণুং স্তুবন্নারাযণেতি তম্ ॥ ৭॥

সুদর্শনঃ -

• বিষ্ণো জিষ্ণো নমস্তেঽস্তু শঙ্খচক্রগদাধর ।
• ত্বত্পাদনলিনং প্রাপ্তো জ্ঞানাযানর্হণঃ কিমু ॥ ৮॥
• কিমন্যৈর্ধর্মকামার্থৈর্নশ্বরৈরিহ শঙ্খভৃত্ ।
• ইত্যুক্তং তদ্বচঃ শ্রুত্বা বিষ্ণু প্রাহ সুদর্শনম্ ॥ ৯॥

বিষ্ণুঃ -

• সুদর্শন শৃণুষ্বৈতন্মত্তো নান্যমনা দ্বিজ ।
• বদামি তে হিতং সত্যং মযা প্রাপ্তং যথা তব ॥ ১০॥
• মদর্চনেন ধ্যানেন মোক্ষেচ্ছা জাযতে নৃণাম্ ।
• মোক্ষদাতা মহাদেবো জ্ঞানবিজ্ঞানদাযকঃ ॥ ১১॥
• তদর্চনেন সংপ্রাপ্তং মযা পূর্বং সুদর্শনম্ ।
• সহস্রারং দৈত্যহন্তৃ সাক্ষাত্ ত্র্যক্ষপ্রপূজযা ॥ ১২॥
• তমারাধয যত্নেন ভস্মধারণপূর্বকম্ ।
• অগ্নিরিত্যাদিভির্মন্ত্রৈস্ত্রিযাযুষত্রিপুণ্ড্রকৈঃ ॥ ১৩॥
• রুদ্রাক্ষধারকো নিত্যং রুদ্রপঞ্চাক্ষরাদরঃ ।
• শিবলিঙ্গং বিল্বপত্রৈঃ পূজযন্ জ্ঞানবান্ ভব ॥ ১৪॥
• বসন্ ক্ষেত্রে মহেশস্য স্নাহি তীর্থে চ শাঙ্করে ।
• অহং ব্রহ্মাদযো দেবাঃ পূজযৈব পিনাকিনঃ ॥ ১৫॥
• বলিনঃ শিবলিঙ্গস্য পূজযা বিপ্রসত্তম ।
• যস্য ফালতলং মেঽদ্য ত্রিপুণ্ড্রপরিচিন্হিতম্ ॥ ১৬॥
• ব্রহ্মেন্দ্রদেবমুনিভিস্ত্রিপুণ্ড্রং ভস্মনা ধৃতম্ ।
• পশ্য বক্ষসি বাহ্বোর্মে রুদ্রাক্ষাণাং স্রজং শুভাম্ ॥ ১৭॥
• পঞ্চাক্ষরজপাসক্তো রুদ্রাধ্যাযপরাযণঃ ।
• ত্রিকালমর্চযামীশং বিল্বপত্রৈরহং শিবম্ ॥ ১৮॥
• কমলা বিমলা নিত্যং কোমলৈর্বিল্বপল্লবৈঃ ।
• পূজযত্যনিশং লিঙ্গে তথা ব্রহ্মাদযঃ সুরাঃ ॥ ১৯॥
• মুনযো মনবোঽপ্যেবং তথান্যে দ্বিজসত্তমাঃ ।
• নৃপাসুরাস্তথা দৈত্যা বলিনঃ শিবপূজযা ॥ ২০॥
• জ্ঞানং মোক্ষস্তথা ভাগ্যং লভ্যতে শঙ্করার্চনাত্ ।
• তস্মাত্ ত্বমপি ভক্ত্যৈব সমারাধয শঙ্করম্ ॥ ২১॥
• পশবো বিষ্ণুবিধযস্তথান্যে মুনযঃ সুরাঃ ।
• সর্বেষাং পতিরীশানস্তত্প্রসাদাদ্বিমুক্তিভাক্ ॥ ২২॥
• প্রসাদজনকং তস্য ভস্মধারণমেব হি ।
• প্রসাদজনকং তস্য মুনে রুদ্রাক্ষধারণম্ ॥ ২৩॥
• প্রসাদজনকস্তস্য রুদ্রাধ্যাযজপঃ সদা ।
• প্রসাদজনকস্তস্য পঞ্চাক্ষরজপো দ্বিজ ॥ ২৪॥
• প্রসাদজনকং তস্য শিবলিঙ্গৈকপূজনম্ ।
• প্রসাদে শাংভবে জাতে ভুক্তিমুক্তী করে স্থিতে ॥ ২৫॥
• তস্য ভক্ত্যৈব সর্বেষাং মোচনং ভবপাশতঃ ।
• তস্য প্রীতিকরং সাক্ষাদ্বিল্বৈর্লিঙ্গস্য পূজনম্ ॥ ২৬॥
• তস্য প্রীতিকরং সাক্ষাচ্ছিবক্ষেত্রেষু বর্তনম্ ।
• তস্য প্রীতিকরং সাক্ষাত্ শিবতীর্থনিষেবণম্ ॥ ২৭॥
• তস্য প্রীতিকরং সাক্ষাত্ ভস্মরুদ্রাক্ষধারণম্ ।
• তস্য প্রীতিকরং সাক্ষাত্ প্রদোষে শিবপূজনম্ ॥ ২৮॥
• তস্য প্রীতিকরং সাক্ষাদ্ রুদ্রপঞ্চাক্ষরাবৃতিঃ ।
• তস্য প্রীতিকরং সাক্ষাচ্ছিবভক্তজনার্চনম্ ॥ ২৯॥
• তস্য প্রীতিকরং সাক্ষাত্ সোমে সাযন্তনার্চনম্ ।
• তস্য প্রীতিকরং সাক্ষাত্ তন্নির্মাল্যৈকভোজনম্ ॥ ৩০॥
• তস্য প্রীতিকরং সাক্ষাদ্ অষ্টমীষ্বর্চনং নিশি ।
• তস্য প্রীতিকরং সাক্ষাত্ চতুর্দশ্যর্চনং নিশি ॥ ৩১॥
• তস্য প্রীতিকরং সাক্ষাত্ তন্নাম্নাং স্মৃতিরেব হি ।
• এতাবানেন ধর্মো হি শম্ভোঃ প্রিযকরো মহান্ ॥ ৩২॥
• অন্যদভ্যুদযং বিপ্র শ্রুতিস্মৃতিষু কীর্তিতম্ ।
• ধর্মো বর্ণাশ্রমপ্রোক্তো মুনিভিঃ কথিতো মুনে ॥ ৩৩॥
• অবিমুক্তে বিশেষেণ শিবো নিত্যং প্রকাশতে ।
• তস্মাত্ কাশীতি তত্ প্রোক্তং যতো হীশঃ প্রকাশতে ॥ ৩৪॥
• তত্রৈবামরণং তিষ্ঠেদিতি জাবালিকী শ্রুতিঃ ।
• তত্র বিশ্বেশ্বরে লিঙ্গে নিত্যং ব্রহ্ম প্রকাশতে ॥ ৩৫॥
• তত্রান্নপূর্ণা সর্বেষাং ভুক্ত্যন্নং সংপ্রযচ্ছতি ।
• তত্রাস্তি মণিকর্ণাখ্যং মণিকুণ্ডং বিনির্মিতম্ ॥ ৩৬॥
• জ্ঞানোদযোঽপি তত্রাস্তি সর্বেষাং জ্ঞানদাযকঃ ।
• তত্র যাহি মযা সার্ধং তত্রৈব বস বৈ মুনে ॥ ৩৭॥
• তত্রান্তে মোক্ষদং জ্ঞানং দদাতীশ্বর এব হি ।
• ইত্যুক্ত্বা তেন বিপ্রেণ যযৌ কাশীং হরিঃ স্বযম্ ॥ ৩৮॥
• স্নাত্বা তীর্থে চক্রসংজ্ঞে জ্ঞানবাপ্যাং হরিদ্বিজঃ ।
• তং দ্বিজং স্নাপযামাস ভস্মনাপাদমস্তকম্ ॥ ৩৯॥
• ধৃতত্রিপুণ্ড্ররুদ্রাক্ষং কৃত্বা তং চ সুদর্শনম্ ।
• পূজযচ্চাথ বিশ্বেশং পূজযামাস চ দ্বিজান্ ॥ ৪০॥
• বিল্বৈর্গন্ধাক্ষতৈর্দীপৈর্নৈবেদ্যৈশ্চ মনোহরৈঃ ।
• তুষ্টাব প্রণিপত্যৈবং স দ্বিজো মধুসূদনঃ ॥ ৪১॥

সুদর্শনবিষ্ণূ -

• ভজ ভজ ভসিতানলোজ্বলাক্ষং
• ভুজগাভোগভুজঙ্গসঙ্গহস্তম্ ।
• ভবভীমমহোগ্ররুদ্রমীড্যং
• ভবভর্জকতর্জকং মহৈনসাম্ ॥ ৪২॥
• বেদঘোষভটকাটকাবধৃক্ দেহদাহদহনামল কাল ।
• জূটকোটিসুজটাতটিদুদ্যদ্রাগরঞ্জিতটিনীশশিমৌলে ॥ ৪৩॥
• শংবরাঙ্কবরভূষ পাহি মামম্বরান্তরচরস্ফুটবাহ ।
• বারিজাদ্যঘনঘোষ শঙ্কর ত্রাহি বারিজভবেড্য মহেশ ॥ ৪৪॥
• মদগজবরকৃত্তিবাস শংভো
• মধুমদনাক্ষিসরোরুহার্চ্যপাদ ।
• যমমদদমনান্ধশিক্ষ শংভো
• পুরহর পাহি দযাকটাক্ষসারৈঃ ॥ ৪৫॥
• অপাং পুষ্পং মৌলৌ হিমভযহরঃ ফালনযনঃ
• জটাজূটে গঙ্গাঽম্বুজবিকসনঃ সব্যনযনঃ ।
• গরং কণ্ঠে যস্য ত্রিভুবনগুরোঃ শংবরহর
• মতঙ্গোদ্যত্কৃত্তের্ভবহরণপাদাব্জভজনম্ ॥ ৪৬॥
• শ্রীবিল্বমূলশিতিকণ্ঠমহেশলিঙ্গং
• বিল্বাম্বুজোত্তমবরৈঃ পরিপূজ্য ভক্ত্যা ।
• স্তম্বেরমাঙ্গবদনোত্তমসঙ্গভঙ্গ
• রাজদ্বিষাঙ্গপরিসঙ্গমহেশশাঙ্গম্ ॥ ৪৭॥
• যো গৌরীরমণার্চনোদ্যতমতির্ভূযো ভবেচ্ছাংভবো
• ভক্তো জন্মপরংপরাসু তু ভবেন্মুক্তোঽথ মুক্ত্যঙ্গনা-
• কান্তস্বান্তনিতান্তশান্তহৃদযে কার্তান্তবার্তোজ্ঝিতঃ ।
• বিষ্ণুব্রহ্মসুরেন্দ্ররঞ্জিতমুমাকান্তাংঘ্রিপঙ্কেরুহ-
• ধ্যানানন্দনিমগ্নসর্বহৃদযঃ কিঞ্চিন্ন জানাত্যপি ॥ ৪৮॥
• কামারাতিপদাম্বুজার্চনরতঃ পাপানুতাপাধিক-
• ব্যাপারপ্রবণপ্রকীর্ণমনসা পুণ্যৈরগণ্যৈরপি ।
• নো দূযেত বিশেষসন্ততিমহাসারানুকারাদরা-
• দারাগ্রাহকুমারমারসুশরাদ্যাঘাতভীতৈরপি ॥ ৪৯॥

• ॥ ইতি শ্রীশিবরহস্যে শঙ্করাখ্যে ষষ্ঠাংশে বিষ্ণূচথ্যসংবাদে শিবস্য জ্ঞানদাতৃত্বনিরূপণং নাম একোনপঞ্চাশোঽধ্যাযঃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com