Ribhu Gita - Siva Rahasya Purana Amsha 6

ঋভুগীতা ৩৬ ॥ ব্রহ্ম-ভাবনোপদেশ প্রকরণম্ ॥

ঋভুঃ -

শৃণু বক্ষ্যামি বিপ্রেন্দ্র সর্বং ব্রহ্মৈব নির্ণযম্ ।
যস্য শ্রবণমাত্রেণ সদ্যো মুক্তিমবাপ্নুযাত্ ॥ ১॥
ইদমেব সদা নাস্তি হ্যহমেব হি কেবলম্ ।
আত্মৈব সর্বদা নাস্তি আত্মৈব সুখলক্ষণম্ ॥ ২॥
আত্মৈব পরমং তত্ত্বমাত্মৈব জগতাং গণঃ ।
আত্মৈব গগনাকারমাত্মৈব চ নিরন্তরম্ ॥ ৩॥
আত্মৈব সত্যং ব্রহ্মৈব আত্মৈব গুরুলক্ষণম্ ।
আত্মৈব চিন্মযং নিত্যমাত্মৈবাক্ষরমব্যযম্ ॥ ৪॥
আত্মৈব সিদ্ধরূপং বা আত্মৈবাত্মা ন সংশযঃ ।
আত্মৈবজগদাকারং আত্মৈবাত্মা স্বযং স্বযম্ ॥ ৫॥
আত্মৈব শান্তিকলনমাত্মৈব মনসা বিযত্ ।
আত্মৈব সর্বং যত্ কিঞ্চিদাত্মৈব পরমং পদম্ ॥ ৬॥
আত্মৈব ভুবনাকারমাত্মৈব প্রিযমব্যযম্ ।
আত্মৈবান্যন্ন চ ক্বাপি আত্মৈবান্যং মনোমযম্ ॥ ৭॥
আত্মৈব সর্ববিজ্ঞানমাত্মৈব পরমং ধনম্ ।
আত্মৈব ভূতরূপং বা আত্মৈব ভ্রমণং মহত্ ॥ ৮॥
আত্মৈব নিত্যশুদ্ধং বা আত্মৈব গুরুরাত্মনঃ ।
আত্মৈব হ্যাত্মনঃ শিষ্য আত্মৈব লযমাত্মনি ॥ ৯॥
আত্মৈব হ্যাত্মনো ধ্যানমাত্মৈব গতিরাত্মনঃ ।
আত্মৈব হ্যাত্মনো হোম আত্মৈব হ্যাত্মনো জপঃ ॥ ১০॥
আত্মৈব তৃপ্তিরাত্মৈব আত্মনোঽন্যন্ন কিঞ্চন ।
আত্মৈব হ্যাত্মনো মূলমাত্মৈব হ্যাত্মনো ব্রতম্ ॥ ১১॥
আত্মজ্ঞানং ব্রতং নিত্যমাত্মজ্ঞানং পরং সুখম্ ।
আত্মজ্ঞানং পরানন্দমাত্মজ্ঞানং পরাযণম্ ॥ ১২॥
আত্মজ্ঞানং পরং ব্রহ্ম আত্মজ্ঞানং মহাব্রতম্ ।
আত্মজ্ঞানং স্বযং বেদ্যমাত্মজ্ঞানং মহাধনম্ ॥ ১৩॥
আত্মজ্ঞানং পরং ব্রহ্ম আত্মজ্ঞানং মহত্ সুখম্ ।
আত্মজ্ঞানং মহানাত্মা আত্মজ্ঞানং জনাস্পদম্ ॥ ১৪॥
আত্মজ্ঞানং মহাতীর্থমাত্মজ্ঞানং জযপ্রদম্ ।
আত্মজ্ঞানং পরং ব্রহ্ম আত্মজ্ঞানং চরাচরম্ ॥ ১৫॥
আত্মজ্ঞানং পরং শাস্ত্রমাত্মজ্ঞানমনূপমম্ ।
আত্মজ্ঞানং পরো যোগ আত্মজ্ঞানং পরা গতিঃ ॥ ১৬॥
আত্মজ্ঞানং পরং ব্রহ্ম ইত্যেবং দৃঢনিশ্চযঃ ।
আত্মজ্ঞানং মনোনাশঃ আত্মজ্ঞানং পরো গুরুঃ ॥ ১৭॥
আত্মজ্ঞানং চিত্তনাশঃ আত্মজ্ঞানং বিমুক্তিদম্ ।
আত্মজ্ঞানং ভযনাশমাত্মজ্ঞানং সুখাবহম্ ॥ ১৮॥
আত্মজ্ঞানং মহাতেজ আত্মজ্ঞানং মহাশুভম্ ।
আত্মজ্ঞানং সতাং রূপমাত্মজ্ঞানং সতাং প্রিযম্ ॥ ১৯॥
আত্মজ্ঞানং সতাং মোক্ষমাত্মজ্ঞানং বিবেকজম্ ।
আত্মজ্ঞানং পরো ধর্ম আত্মজ্ঞানং সদা জপঃ ॥ ২০॥
আত্মজ্ঞানস্য সদৃশমাত্মবিজ্ঞানমেব হি ।
আত্মজ্ঞানেন সদৃশং ন ভূতং ন ভবিষ্যতি ॥ ২১॥
আত্মজ্ঞানং পরো মন্ত্র আত্মজ্ঞানং পরং তপঃ ।
আত্মজ্ঞানং হরিঃ সাক্ষাদাত্মজ্ঞানং শিবঃ পরঃ ॥ ২২॥
আত্মজ্ঞানং পরো ধাতা আত্মজ্ঞানং স্বসংমতম্ ।
আত্মজ্ঞানং স্বযং পুণ্যমাত্মজ্ঞানং বিশোধনম্ ॥ ২৩॥
আত্মজ্ঞানং মহাতীর্থমাত্মজ্ঞানং শমাদিকম্ ।
আত্মজ্ঞানং প্রিযং মন্ত্রমাত্মজ্ঞানং স্বপাবনম্ ॥ ২৪॥
আত্মজ্ঞানং চ কিন্নাম অহং ব্রহ্মেতি নিশ্চযঃ ।
অহং ব্রহ্মেতি বিশ্বাসমাত্মজ্ঞানং মহোদযম্ ॥ ২৫॥
অহং ব্রহ্মাস্মি নিত্যোঽস্মি সিদ্ধোঽস্মীতি বিভাবনম্ ।
আনন্দোঽহং পরানন্দং শুদ্ধোঽহং নিত্যমব্যযঃ ॥ ২৬॥
চিদাকাশস্বরূপোঽস্মি সচ্চিদানন্দশাশ্বতম্ ।
নির্বিকারোঽস্মি শান্তোঽহং সর্বতোঽহং নিরন্তরঃ ॥ ২৭॥
সর্বদা সুখরূপোঽস্মি সর্বদোষবিবর্জিতঃ ।
সর্বসঙ্কল্পহীনোঽস্মি সর্বদা স্বযমস্ম্যহম্ ॥ ২৮॥
সর্বং ব্রহ্মেত্যনুভবং বিনা শব্দং পঠ স্বযম্ ।
কোট্যশ্বমেধে যত্ পুণ্যং ক্ষণাত্ তত্পুণ্যমাপ্নুযাত্ ॥ ২৯॥
অহং ব্রহ্মেতি নিশ্চিত্য মেরুদানফলং লভেত্ ।
ব্রহ্মৈবাহমিতি স্থিত্বা সর্বভূদানমপ্যণু ॥ ৩০॥
ব্রহ্মৈবাহমিতি স্থিত্বা কোটিশো দানমপ্যণু ।
ব্রহ্মৈবাহমিতি স্থিত্বা সর্বানন্দং তৃণাযতে ॥ ৩১॥
ব্রহ্মৈব সর্বমিত্যেব ভাবিতস্য ফলং স্বযম্ ।
ব্রহ্মৈবাহমিতি স্থিত্বা সমানং ব্রহ্ম এব হি ॥ ৩২॥
তস্মাত্ স্বপ্নেঽপি নিত্যং চ সর্বং সন্ত্যজ্য যত্নতঃ ।
অহং ব্রহ্ম ন সন্দেহঃ অহমেব গতির্মম ॥ ৩৩॥
অহমেব সদা নান্যদহমেব সদা গুরুঃ ।
অহমেব পরো হ্যাত্মা অহমেব ন চাপরঃ ॥ ৩৪॥
অহমেব গুরুঃ শিষ্যঃ অহমেবেতি নিশ্চিনু ।
ইদমিত্যেব নির্দেশঃ পরিচ্ছিন্নো জগন্ন হি ॥ ৩৫॥
ন ভূমির্ন জলং নাগ্নির্ন বাযুর্ন চ খং তথা ।
সর্বং চৈতন্যমাত্রত্বাত্ নান্যত্ কিঞ্চন বিদ্যতে ॥ ৩৬॥
ইত্যেবং ভাবনপরো দেহমুক্তঃ সুখীভব ।
অহমাত্মা ইদং নাস্তি সর্বং চৈতন্যমাত্রতঃ ॥ ৩৭॥
অহমেব হি পূর্ণাত্মা আনন্দাব্ধিরনামযঃ ।
ইদমেব সদা নাস্তি জডত্বাদসদেব হি ।
ইদং ব্রহ্ম সদা ব্রহ্ম ইদং নেতি সুখী ভব ॥ ৩৮॥
তুরঙ্গশৃঙ্গসন্নিভা শ্রুতিপরোচনা ...
বিশেষকামবাসনা বিনিশ্চিতাত্মবৃত্তিতঃ ।
নরাঃ সুরা মুনীশ্বরা অসঙ্গসঙ্গমপ্যুমা-
পতিং ... ন তে ভজন্তি কেচন ... ॥ ৩৯॥

॥ ইতি শ্রীশিবরহস্যে শঙ্করাখ্যে ষষ্ঠাংশে ঋভুনিদাঘসংবাদে ব্রহ্মভাবনোপদেশপ্রকরণং নাম ষট্{}ত্রিংশোঽধ্যাযঃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com