Ribhu Gita - Siva Rahasya Purana Amsha 6

ঋভুগীতা ১৮ ॥ ঋভি-নিদাধ সংবাদঃ ॥

ঋভুঃ -

শৃণু ভূযঃ পরং তত্ত্বং সদ্যো মোক্ষপ্রদাযকম্ ।
সর্বং ব্রহ্মৈব সততং সর্বং শান্তং ন সংশযঃ ॥ ১॥
ব্রহ্মাক্ষরমিদং সর্বং পরাকারমিদং নহি ।
ইদমিত্যপি যদ্দোষং বযমিত্যপি ভাষণম্ ॥ ২॥
যত্কিঞ্চিত্স্মরণং নাস্তি যত্কিঞ্চিদ্ ধ্যানমেব হি ।
যত্কিঞ্চিদ্ জ্ঞানরূপং বা তত্সর্বং ব্রহ্ম এব হি ॥ ৩॥
যত্কিঞ্চিদ্ ব্রহ্মবাক্যং বা যত্কিঞ্চিদ্বেদবাক্যকম্ ।
যত্কিঞ্চিদ্গুরুবাক্যং বা তত্সর্বং ব্রহ্ম এব হি ॥ ৪॥
যত্কিঞ্চিত্কল্মষং সত্যং যত্কিঞ্চিত্ প্রিযভাষণম্ ।
যত্কিঞ্চিন্মননং সত্তা তত্সর্বং ব্রহ্ম এব হি ॥ ৫॥
যত্কিঞ্চিত্ শ্রবণং নিত্যং যত্ কিঞ্চিদ্ধ্যানমশ্নুতে ।
যত্কিঞ্চিন্নিশ্চযং শ্রদ্ধা তত্সর্বং ব্রহ্ম এব হি ॥ ৬॥
যত্কিঞ্চিদ্ গুরূপদেশং যত্কিঞ্চিদ্গুরুচিন্তনম্ ।
যত্কিঞ্চিদ্যোগভেদং বা তত্সর্বং ব্রহ্ম এব হি ॥ ৭॥
সর্বং ত্যজ্য গুরুং ত্যজ্য সর্বং সন্ত্যজ্য নিত্যশঃ ।
তূষ্ণীমেবাসনং ব্রহ্ম সুখমেব হি কেবলম্ ॥ ৮॥
সর্বং ত্যক্ত্বা সুখং নিত্যং সর্বত্যাগং সুখং মহত্ ।
সর্বত্যাগং পরানন্দং সর্বত্যাগং পরং সুখম্ ॥ ৯॥
সর্বত্যাগং মনস্ত্যাগঃ সর্বত্যাগমহংকৃতেঃ ।
সর্বত্যাগং মহাযাগঃ সর্বত্যাগং সুখং পরম্ ॥ ১০॥
সর্বত্যাগং মহামোক্ষং চিত্তত্যাগং তদেব হি ।
চিত্তমেব জগন্নিত্যং চিত্তমেব হি সংসৃতিঃ ॥ ১১॥
চিত্তমেব মহামাযা চিত্তমেব শরীরকম্ ।
চিত্তমেব ভযং দেহঃ চিত্তমেব মনোমযম্ ॥ ১২॥
চিত্তমেব প্রপঞ্চাখ্যং চিত্তমেব হি কল্মষম্ ।
চিত্তমেব জডং সর্বং চিত্তমেবেন্দ্রিযাদিকম্ ॥ ১৩॥
চিত্তমেব সদা সত্যং চিত্তমেব নহি ক্বচিত্ ।
চিত্তমেব মহাশাস্ত্রং চিত্তমেব মনঃপ্রদম্ ॥ ১৪॥
চিত্তমেব সদা পাপং চিত্তমেব সদা মতম্ ।
চিত্তমেব হি সর্বাখ্যং চিত্তমেব সদা জহি ॥ ১৫॥
চিত্তং নাস্তীতি চিন্তা স্যাত্ আত্মমাত্রং প্রকাশতে ।
চিত্তমস্তীতি চিন্তা চেত্ চিত্তত্বং স্বযমেব হি ॥ ১৬॥
স্বযমেব হি চিত্তাখ্যং স্বযং ব্রহ্ম ন সংশযঃ ।
চিত্তমেব হি সর্বাখ্যং চিত্তং সর্বমিতি স্মৃতম্ ॥ ১৭॥
ব্রহ্মৈবাহং স্বযংজ্যোতির্ব্রহ্মৈবাহং ন সংশযঃ ।
সর্বং ব্রহ্ম ন সন্দেহঃ সর্বং চিজ্জ্যোতিরেব হি ॥ ১৮॥
অহং ব্রহ্মৈব নিত্যাত্মা পূর্ণাত্ পূর্ণতরং সদা ।
অহং পৃথ্ব্যাদিসহিতং অহমেব বিলক্ষণম্ ॥ ১৯॥
অহং সূক্ষ্মশরীরান্তমহমেব পুরাতনম্ ।
অহমেব হি মানাত্মা সর্বং ব্রহ্মৈব কেবলম্ ॥ ২০॥
চিদাকারো হ্যহং পূর্ণশ্চিদাকারমিদং জগত্ ।
চিদাকারং চিদাকাশং চিদাকাশমহং সদা ॥ ২১॥
চিদাকাশং ত্বমেবাসি চিদাকাশমহং সদা ।
চিদাকাশং চিদেবেদং চিদাকাশান্ন কিঞ্চন ॥ ২২॥
চিদাকাশততং সর্বং চিদাকাশং প্রকাশকম্ ।
চিদাকারং মনো রূপং চিদাকাশং হি চিদ্ঘনম্ ॥ ২৩॥
চিদাকাশং পরং ব্রহ্ম চিদাকাশং চ চিন্মযঃ ।
চিদাকাশং শিবং সাক্ষাচ্চিদাকাশমহং সদা ॥ ২৪॥
সচ্চিদানন্দরূপোঽহং সচ্চিদানন্দশাশ্বতঃ ।
সচ্চিদানন্দ সন্মাত্রং সচ্চিদানন্দভাবনঃ ॥ ২৫॥
সচ্চিদানন্দপূর্ণোঽহং সচ্চিদানন্দকারণম্ ।
সচ্চিদানন্দসন্দোহঃ সচ্চিদানন্দ ঈশ্বরঃ ॥ ২৬॥var was হীনকঃ
সচ্চিদানন্দনিত্যোঽহং সচ্চিদানন্দলক্ষণম্ ।
সচ্চিদানন্দমাত্রোঽহং সচ্চিদানন্দরূপকঃ ॥ ২৭॥
আত্মৈবেদমিদং সর্বমাত্মৈবাহং ন সংশযঃ ।
আত্মৈবাস্মি পরং সত্যমাত্মৈব পরমং পদম্ ॥ ২৮॥
আত্মৈব জগদাকারং আত্মৈব ভুবনত্রযম্ ।
আত্মৈব জগতাং শ্রেষ্ঠঃ আত্মৈব হি মনোমযঃ ॥ ২৯॥
আত্মৈব জগতাং ত্রাতা আত্মৈব গুরুরাত্মনঃ ।
আত্মৈব বহুধা ভাতি আত্মৈবৈকং পরাত্মনঃ ॥ ৩০॥
আত্মৈব পরমং ব্রহ্ম আত্মৈবাহং ন সংশযঃ ।
আত্মৈব পরমং লোকং আত্মৈব পরমাত্মনঃ ॥ ৩১॥
আত্মৈব জীবরূপাত্মা আত্মৈবেশ্বরবিগ্রহঃ ।
আত্মৈব হরিরানন্দঃ আত্মৈব স্বযমাত্মনঃ ॥ ৩২॥
আত্মৈবানন্দসন্দোহ আত্মৈবেদং সদা সুখম্ ।
আত্মৈব নিত্যশুদ্ধাত্মা আত্মৈব জগতঃ পরঃ ॥ ৩৩॥
আত্মৈব পঞ্চভূতাত্মা আত্মৈব জ্যোতিরাত্মনঃ ।
আত্মৈব সর্বদা নান্যদাত্মৈব পরমোঽব্যযঃ ॥ ৩৪॥
আত্মৈব হ্যাত্মভাসাত্মা আত্মৈব বিভুরব্যযঃ ।
আত্মৈব ব্রহ্মবিজ্ঞানং আত্মৈবাহং ত্বমেব হি ॥ ৩৫॥
আত্মৈব পরমানন্দ আত্মৈবাহং জগন্মযঃ ।
আত্মৈবাহং জগদ্ভানং আত্মৈবাহং ন কিঞ্চন ॥ ৩৬॥
আত্মৈব হ্যাত্মনঃ স্নানমাত্মৈব হ্যাত্মনো জপঃ ।
আত্মৈব হ্যাত্মনো মোদমাত্মৈবাত্মপ্রিযঃ সদা ॥ ৩৭॥
আত্মৈব হ্যাত্মনো নিত্যো হ্যাত্মৈব গুণভাসকঃ ।
আত্মৈব তুর্যরূপাত্মা আত্মাতীতস্ততঃ পরঃ ॥ ৩৮॥
আত্মৈব নিত্যপূর্ণাত্মা আত্মৈবাহং ন সংশযঃ ।
আত্মৈব ত্বমহং চাত্মা সর্বমাত্মৈব কেবলম্ ॥ ৩৯॥
নিত্যোঽহং নিত্যপূর্ণোঽহং নিত্যোঽহং সর্বদা সদা ।
আত্মৈবাহং জগন্নান্যদ্ অমৃতাত্মা পুরাতনঃ ॥ ৪০॥
পুরাতনোঽহং পুরুষোঽহমীশঃ পরাত্ পরোঽহং পরমেশ্বরোঽহম্ ।
ভবপ্রদোঽহং ভবনাশনোঽহং সুখপ্রদোঽহং সুখরূপমদ্বযম্ ॥ ৪১॥
আনন্দোঽহমশেষোঽহমমৃতোহং ন সংশযঃ ।
অজোঽহমাত্মরূপোঽহমন্যন্নাস্তি সদা প্রিযঃ ॥ ৪২॥
ব্রহ্মৈবাহমিদং ব্রহ্ম সর্বং ব্রহ্ম সদাঽব্যযঃ ।
সদা সর্বপদং নাস্তি সর্বমেব সদা ন হি ॥ ৪৩॥
নির্গুণোঽহং নিরাধার অহং নাস্তীতি সর্বদা ।
অনর্থমূলং নাস্ত্যেব মাযাকার্যং ন কিঞ্চন ॥ ৪৪॥
অবিদ্যাবিভবো নাস্তি অহং ব্রহ্ম ন সংশযঃ ।
সর্বং ব্রহ্ম চিদাকাশং তদেবাহং ন সংশযঃ ॥ ৪৫॥
তদেবাহং স্বযং চাহং পরং চাহং পরেশ্বরঃ ।
বিদ্যাধরোঽহমেবাত্র বিদ্যাবিদ্যে ন কিঞ্চন ॥ ৪৬॥
চিদহং চিদহং নিত্যং তুর্যোঽহং তুর্যকঃ পরঃ ।
ব্রহ্মৈব সর্বং ব্রহ্মৈব সর্বং ব্রহ্ম সদাঽস্ম্যহম্ ॥ ৪৭॥
মত্তোঽন্যন্নাপরং কিঞ্চিন্মত্তোঽন্যদ্ব্রহ্ম চ ক্বচিত্ ।
মত্তোঽন্যত্ পরমং নাস্তি মত্তোঽন্যচ্চিত্পদং নহি ॥ ৪৮॥
মত্তোঽন্যত্ সত্পদং নাস্তি মত্তোঽন্যচ্চিত্পদং ন মে ।
মত্তোঽন্যত্ ভবনং নাস্তি মত্তোঽন্যদ্ ব্রহ্ম এব ন ॥ ৪৯॥
মত্তোঽন্যত্ কারণং নাস্তি মত্তোঽন্যত্ কিঞ্চিদপ্যণু ।
মত্তোঽন্যত্ সত্ত্বরূপং চ মত্তোঽন্যত্ শুদ্ধমেব ন ॥ ৫০॥
মত্তোঽন্যত্ পাবনং নাস্তি মত্তোঽন্যত্ তত্পদং ন হি ।
মত্তোঽন্যত্ ধর্মরূপং বা মত্তোঽন্যদখিলং ন চ ॥ ৫১॥
মত্তোঽন্যদসদেবাত্র মত্তোঽন্যন্মিথ্যা এব হি ।
মত্তোঽন্যদ্ভাতি সর্বস্বং মত্তোঽন্যচ্ছশশৃঙ্গবত্ ॥ ৫২॥
মত্তোঽন্যদ্ভাতি চেন্মিথ্যা মত্তোঽন্যচ্চেন্দ্রজালকম্ ।
মত্তোঽন্যত্ সংশযো নাস্তি মত্তোঽন্যত্ কার্য কারণম্ ॥ ৫৩॥
ব্রহ্মমাত্রমিদং সর্বং সোঽহমস্মীতি ভাবনম্ ।
সর্বমুক্তং ভগবতা এবমেবেতি নিশ্চিনু ॥ ৫৪॥
বহুনোক্তেন কিং যোগিন্ নিশ্চযং কুরু সর্বদা ।
সকৃন্নিশ্চযমাত্রেণ ব্রহ্মৈব ভবতি স্বযম্ ॥ ৫৫॥
বননগভুবনং যচ্ছঙ্করান্নান্যদস্তি
জগদিদমসুরাদ্যং দেবদেবঃ স এব ।
তনুমনগমনাদ্যৈঃ কোশকাশাবকাশে
স খলু পরশিবাত্মা দৃশ্যতে সূক্ষ্মবুদ্ধ্যা ॥ ৫৬॥
চক্ষুঃশ্রোত্রমনোঽসবশ্চ হৃদি খাদুদ্ভাসিতধ্যান্তরাত্
তস্মিন্নেব বিলীযতে গতিপরং যদ্বাসনা বাসিনী ।
চিত্তং চেতযতে হৃদিন্দ্রিযগণং বাচাং মনোদূরগং
তং ব্রহ্মামৃতমেতদেব গিরিজাকান্তাত্মনা সংজ্ঞিতম্ ॥ ৫৭॥

॥ ইতি শ্রীশিবরহস্যে শঙ্করাখ্যে ষষ্ঠাংশে ঋভুনিদাঘসংবাদে অষ্টাদশোঽধ্যাযঃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com