Ribhu Gita - Siva Rahasya Purana Amsha 6

ঋভুগীতা ৩৭ ॥ সর্ব-সিদ্ধান্ত প্রকরণম্ ॥

ঋভুঃ -

নিদাঘ শৃণু বক্ষ্যামি রহস্যং পরমদ্ভুতম্ ।
শ্লোকৈকশ্রবণেনৈব সদ্যো মোক্ষমবাপ্নুযাত্ ॥ ১॥
ইদং দৃষ্টং পরং ব্রহ্ম দৃশ্যবদ্ভাতি চিত্ততঃ ।
সর্বং চৈতন্যমাত্রত্বাত্ নান্যত্ কিঞ্চিন্ন বিদ্যতে ॥ ২॥
ইদমেব হি নাস্ত্যেব অযমিত্যপি নাস্তি হি ।
এক এবাপ্যণুর্বাপি নাস্তি নাস্তি ন সংশযঃ ॥ ৩॥
ব্যবহারমিদং ক্বাপি বার্তামাত্রমপি ক্ব বা ।
বন্ধরূপং বন্ধবার্তা বন্ধকার্যং পরং চ বা ॥ ৪॥
সন্মাত্রকার্যং সন্মাত্রমহং ব্রহ্মেতি নিশ্চযম্ ।
দুঃখং সুখং বা বোধো বা সাধকং সাধ্যনির্ণযঃ ॥ ৫॥
আত্মেতি পরমাত্মেতি জীবাত্মেতি পৃথঙ্ ন হি ।
দেহোঽহমিতি মূর্তোঽহং জ্ঞানবিজ্ঞানবানহম্ ॥ ৬॥
কার্যকারণরূপোঽহমন্তঃকরণকার্যকম্ ।
একমিত্যেকমাত্রং বা নাস্তি নাস্তীতি ভাবয ॥ ৭॥
সর্বসঙ্কল্পমাত্রেতি সর্বং ব্রহ্মেতি বা জগত্ ।
তত্ত্বজ্ঞানং পরং ব্রহ্ম ওঙ্কারার্থং সুখং জপম্ ॥ ৮॥
দ্বৈতাদ্বৈতং সদাদ্বৈতং তথা মানাবমানকম্ ।
সর্বং চৈতন্যমাত্রত্বাত্ নান্যত্ কিঞ্চিন্ন বিদ্যতে ॥ ৯॥
আত্মানন্দমহং ব্রহ্ম প্রজ্ঞানং ব্রহ্ম এব হি ।
ইদং রূপমহং রূপং প্রিযাপ্রিযবিচারণম্ ॥ ১০॥
যদ্যত্ সংভাব্যতে লোকে যদ্যত্ সাধনকল্পনম্ ।
যদ্যন্তরহিতং ব্রহ্মভাবনং চিত্তনির্মিতম্ ॥ ১১॥
স্থূলদেহোঽহমেবাত্র সূক্ষ্মদেহোঽহমেব হি ।
বুদ্ধের্ভেদং মনোভেদং অহংকারং জডং চ তত্ ॥ ১২॥
সর্বং চৈতন্যমাত্রত্বাত্ নান্যত্ কিঞ্চিন্ন বিদ্যতে ।
শ্রবণং মননং চৈব সাক্ষাত্কারবিচারণম্ ॥ ১৩॥
আত্মৈবাহং পরং চৈব নাহং মোহমযং স্বযম্ ।
ব্রহ্মৈব সর্বমেবেদং ব্রহ্মৈব পরমং পদম্ ॥ ১৪॥
ব্রহ্মৈব কারণং কার্যং ব্রহ্মৈব জগতাং জযঃ ।
ব্রহ্মৈব সর্বং চৈতন্যং ব্রহ্মৈব মনসাযতে ॥ ১৫॥
ব্রহ্মৈব জীববদ্ভাতি ব্রহ্মৈব চ হরীযতে ।
ব্রহ্মৈব শিববদ্ভাতি ব্রহ্মৈব প্রিযমাত্মনঃ ॥ ১৬॥
ব্রহ্মৈব শান্তিবদ্ভাতি ব্রহ্মণোঽন্যন্ন কিঞ্চন ।
নাহং ন চাযং নৈবান্যন্নোত্পন্নং ন পরাত্ পরম্ ॥ ১৭॥
ন চেদং ন চ শাস্ত্রার্থং ন মীমাংসং ন চোদ্ভবম্ ।
ন লক্ষণং ন বেদাদি নাপি চিত্তং ন মে মনঃ ॥ ১৮॥
ন মে নাযং নেদমিদং ন বুদ্ধিনিশ্চযং সদা ।
কদাচিদপি নাস্ত্যেব সত্যং সত্যং ন কিঞ্চন ॥ ১৯॥
নৈকমাত্রং ন চাযং বা নান্তরং ন বহির্ন হি ।
ঈষণ্মাত্রং চ ন দ্বৈতং ন জন্যং ন চ দৃশ্যকম্ ॥ ২০॥
ন ভাবনং ন স্মরণং ন বিস্মরণমণ্বপি ।
ন কালদেশকলনং ন সঙ্কল্পং ন বেদনম্ ॥ ২১॥
ন বিজ্ঞানং ন দেহান্যং ন বেদোঽহং ন সংসৃতিঃ ।
ন মে দুঃখং ন মে মোক্ষং ন গতির্ন চ দুর্গতিঃ ॥ ২২॥
নাত্মা নাহং ন জীবোঽহং ন কূটস্থো ন জাযতে ।
ন দেহোঽহং ন চ শ্রোত্রং ন ত্বগিন্দ্রিযদেবতা ॥ ২৩॥
সর্বং চৈতন্যমাত্রত্বাত্ সর্বং নাস্ত্যেব সর্বদা ।
অখণ্ডাকাররূপত্বাত্ সর্বং নাস্ত্যেব সর্বদা ॥ ২৪॥
হুংকারস্যাবকাশো বা হুংকারজননং চ বা ।
নাস্ত্যেব নাস্তি নাস্ত্যেব নাস্তি নাস্তি কদাচন ॥ ২৫॥
অন্যত্ পদার্থমল্পং বা অন্যদেবান্যভাষণম্ ।
আত্মনোঽন্যদসত্যং বা সত্যং বা ভ্রান্তিরেব চ ॥ ২৬॥
নাস্ত্যেব নাস্তি নাস্ত্যেব নাস্তি শব্দোঽপি নাস্তি হি ।
সর্বং চৈতন্যমাত্রত্বাত্ সর্বং নাস্ত্যেব সর্বদা ॥ ২৭॥
সর্বং ব্রহ্ম ন সন্দেহো ব্রহ্মৈবাহং ন সংশযঃ ।
বাক্যং চ বাচকং সর্বং বক্তা চ ত্রিপুটীদ্বযম্ ॥ ২৮॥
জ্ঞাতা জ্ঞানং জ্ঞেযভেদং মাতৃমানমিতি প্রিযম্ ।
যদ্যচ্ছাস্ত্রেষু নির্ণীতং যদ্যদ্বেদেষু নিশ্চিতম্ ॥ ২৯॥
পরাপরমতীতং চ অতীতোঽহমবেদনম্ ।
গুরুর্গুরূপদেশশ্চ গুরুং বক্ষ্যে ন কস্যচিত্ ॥ ৩০॥
গুরুরূপা গুরুশ্রদ্ধা সদা নাস্তি গুরুঃ স্বযম্ ।
আত্মৈব গুরুরাত্মৈব অন্যাভাবান্ন সংশযঃ ॥ ৩১॥
আত্মনঃ শুভমাত্মৈব অন্যাভাবান্ন সংশযঃ ।
আত্মনো মোহমাত্মৈব আত্মনোঽস্তি ন কিঞ্চন ॥ ৩২॥
আত্মনঃ সুখমাত্মৈব অন্যন্নাস্তি ন সংশযঃ ।
আত্মন্যেবাত্মনঃ শক্তিঃ আত্মন্যেবাত্মনঃ প্রিযম্ ॥ ৩৩॥
আত্মন্যেবাত্মনঃ স্নানং আত্মন্যেবাত্মনো রতিঃ ।
আত্মজ্ঞানং পরং শ্রেযঃ আত্মজ্ঞানং সুদুর্লভম্ ॥ ৩৪॥
আত্মজ্ঞানং পরং ব্রহ্ম আত্মজ্ঞানং সুখাত্ সুখম্ ।
আত্মজ্ঞানাত্ পরং নাস্তি আত্মজ্ঞানাত্ স্মৃতির্ন হি ॥ ৩৫॥
ব্রহ্মৈবাত্মা ন সন্দেহ আত্মৈব ব্রহ্মণঃ স্বযম্ ।
স্বযমেব হি সর্বত্র স্বযমেব হি চিন্মযঃ ॥ ৩৬॥
স্বযমেব চিদাকাশঃ স্বযমেব নিরন্তরম্ ।
স্বযমেব চ নানাত্মা স্বযমেব চ নাপরঃ ॥ ৩৭॥
স্বযমেব গুণাতীতঃ স্বযমেব মহত্ সুখম্ ।
স্বযমেব হি শান্তাত্মা স্বযমেব হি নিষ্কলঃ ॥ ৩৮॥
স্বযমেব চিদানন্দঃ স্বযমেব মহত্প্রভুঃ ।
স্বযমেব সদা সাক্ষী স্বযমেব সদাশিবঃ ॥ ৩৯॥
স্বযমেব হরিঃ সাক্ষাত্ স্বযমেব প্রজাপতিঃ ।
স্বযমেব পরং ব্রহ্ম ব্রহ্ম এব স্বযং সদা ॥ ৪০॥
সর্বং ব্রহ্ম স্বযং ব্রহ্ম স্বযং ব্রহ্ম ন সংশযঃ ।
দৃঢনিশ্চযমেব ত্বং সর্বথা কুরু সর্বদা ॥ ৪১॥
বিচারযন্ স্বযং ব্রহ্ম ব্রহ্মমাত্রং স্বযং ভবেত্ ।
এতদেব পরং ব্রহ্ম অহং ব্রহ্মেতি নিশ্চযঃ ॥ ৪২॥
এষ এব পরো মোক্ষ অহং ব্রহ্মেতি নিশ্চযঃ ।
এষ এব কৃতার্থো হি এষ এব সুখং সদা ॥ ৪৩॥
এতদেব সদা জ্ঞানং স্বযং ব্রহ্ম স্বযং মহত্ ।
অহং ব্রহ্ম এতদেব সদা জ্ঞানং স্বযং মহত্ ॥ ৪৪॥
অহং ব্রহ্ম এতদেব স্বভাবং সততং নিজম্ ।
অহং ব্রহ্ম এতদেব সদা নিত্যং স্বযং সদা ॥ ৪৫॥
অহং ব্রহ্ম এতদেব বন্ধনাশং ন সংশযঃ ।
অহং ব্রহ্ম এতদেব সর্বসিদ্ধান্তনিশ্চযম্ ॥ ৪৬॥
এষ বেদান্তসিদ্ধান্ত অহং ব্রহ্ম ন সংশযঃ ।
সর্বোপনিষদামর্থঃ সর্বানন্দমযং জগত্ ॥ ৪৭॥
মহাবাক্যস্য সিদ্ধান্ত অহং ব্রহ্মেতি নিশ্চযঃ ।
সাক্ষাচ্ছিবস্য সিদ্ধান্ত অহং ব্রহ্মেতি নিশ্চযঃ ॥ ৪৮॥
নারাযণস্য সিদ্ধান্ত অহং ব্রহ্মেতি নিশ্চযঃ ।
চতুর্মুখস্য সিদ্ধান্ত অহং ব্রহ্মেতি নিশ্চযঃ ॥ ৪৯॥
ঋষীণাং হৃদযং হ্যেতত্ দেবানামুপদেশকম্ ।
সর্বদেশিকসিদ্ধান্ত অহং ব্রহ্মেতি নিশ্চযঃ ॥ ৫০॥
যচ্চ যাবচ্চ ভূতানাং মহোপদেশ এব তত্ ।
অহং ব্রহ্ম মহামোক্ষং পরং চৈতদহং স্বযম্ ॥ ৫১॥
অহং চানুভবং চৈতন্মহাগোপ্যমিদং চ তত্ ।
অহং ব্রহ্ম এতদেব সদা জ্ঞানং স্বযং মহত্ ॥ ৫২॥
মহাপ্রকাশমেবৈতত্ অহং ব্রহ্ম এব তত্ ।
এতদেব মহামন্ত্রং এতদেব মহাজপঃ ॥ ৫৩॥
এতদেব মহাস্নানমহং ব্রহ্মেতি নিশ্চযঃ ।
এতদেব মহাতীর্থমহং ব্রহ্মেতি নিশ্চযঃ ॥ ৫৪॥
এতদেব মহাগঙ্গা অহং ব্রহ্মেতি নিশ্চযঃ ।
এষ এব পরো ধর্ম অহং ব্রহ্মেতি নিশ্চযঃ ॥ ৫৫॥
এষ এব মহাকাশ অহং ব্রহ্মেতি নিশ্চযঃ ।
এতদেব হি বিজ্ঞানমহং ব্রহ্মাস্মি কেবলম্ ।
সর্বসিদ্ধান্তমেবৈতদহং ব্রহ্মেতি নিশ্চযঃ ॥ ৫৬॥
সব্যাসব্যতযাদ্যবজ্ঞহৃদযা গোপোদহার্যঃ স্রিযঃ
পশ্যন্ত্যম্বুজমিত্রমণ্ডলগতং শংভুং হিরণ্যাত্মকম্ ।
সর্বত্র প্রসৃতৈঃ করৈর্জগদিদং পুষ্ণাতি মুষ্ণন্ ধনৈঃ
ঘৃষ্টং চৌষধিজালমম্বুনিকরৈর্বিশ্বোত্থধূতং হরঃ ॥ ৫৭॥

॥ ইতি শ্রীশিবরহস্যে শঙ্করাখ্যে ষষ্ঠাংশে ঋভুনিদাঘসংবাদে সর্বসিদ্ধান্তপ্রকরণং নাম সপ্তত্রিংশোঽধ্যাযঃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com