ঋভুগীতা ১৭ ॥ সর্ব সিদ্ধান্ত সংগ্রহ প্রকরণম্ ॥

ঋভুঃ -

• নিদাঘ শৃণু গুহ্যং মে সর্বসিদ্ধান্তসঙ্গ্রহম্ ।
• দ্বৈতাদ্বৈতমিদং শূন্যং শান্তং ব্রহ্মৈব সর্বদা ॥ ১॥
• অহমেব পরং ব্রহ্ম অহমেব পরাত্ পরম্ ।
• দ্বৈতাদ্বৈতমিদং শূন্যং শান্তং ব্রহ্মৈব কেবলম্ ॥ ২॥
• অহমেব হি শান্তাত্মা অহমেব হি সর্বগঃ ।
• অহমেব হি শুদ্ধাত্মা অহমেব হি নিত্যশঃ ॥ ৩॥
• অহমেব হি নানাত্মা অহমেব হি নির্গুণঃ ।
• অহমেব হি নিত্যাত্মা অহমেব হি কারণম্ ॥ ৪॥
• অহমেব হি জগত্ সর্বং ইদং চৈবাহমেব হি ।
• অহমেব হি মোদাত্মা অহমেব হি মুক্তিদঃ ॥ ৫॥
• অহমেব হি চৈতন্যং অহমেব হি চিন্মযঃ ।
• অহমেব হি চৈতন্যমহং সর্বান্তরঃ সদা ॥ ৬॥
• অহমেব হি ভূতাত্মা ভৌতিকং ত্বহমেব হি ।
• অহমেব ত্বমেবাহমহমেবাহমেব হি ॥ ৭॥
• জীবাত্মা ত্বহমেবাহমহমেব পরেশ্বরঃ ।
• অহমেব বিভুর্নিত্যমহমেব স্বযং সদা ॥ ৮॥
• অহমেবাক্ষরং সাক্ষাত্ অহমেব হি মে প্রিযম্ ।
• অহমেব সদা ব্রহ্ম অহমেব সদাঽব্যযঃ ॥ ৯॥
• অহমেবাহমেবাগ্রে অহমেবান্তরান্তরঃ ।
• অহমেব চিদাকাশমহমেবাবভাসকঃ ॥ ১০॥
• অহমেব সদা স্রষ্টা অহমেব হি রক্ষকঃ ।
• অহমেব হি লীলাত্মা অহমেব হি নিশ্চযঃ ॥ ১১॥
• অহমেব সদা সাক্ষী ত্বমেব ত্বং পুরাতনঃ ।
• ত্বমেব হি পরং ব্রহ্ম ত্বমেব হি নিরন্তরম্ ॥ ১২॥
• অহমেবাহমেবাহমহমেব ত্বমেব হি ।
• অহমেবাদ্বযাকারঃ অহমেব বিদেহকঃ ॥ ১৩॥
• অহমেব মমাধারঃ অহমেব সদাত্মকঃ ।
• অহমেবোপশান্তাত্মা অহমেব তিতিক্ষকঃ ॥ ১৪॥
• অহমেব সমাধানং শ্রদ্ধা চাপ্যহমেব হি ।
• অহমেব মহাব্যোম অহমেব কলাত্মকঃ ॥ ১৫॥
• অহমেব হি কামান্তঃ অহমেব সদান্তরঃ ।
• অহমেব পুরস্তাচ্চ অহং পশ্চাদহং সদা ॥ ১৬॥
• অহমেব হি বিশ্বাত্মা অহমেব হি কেবলম্ ।
• অহমেব পরং ব্রহ্ম অহমেব পরাত্পরঃ ॥ ১৭॥
• অহমেব চিদানন্দঃ অহমেব সুখাসুখম্ ।
• অহমেব গুরুত্বং চ অহমেবাচ্যুতঃ সদা ॥ ১৮॥
• অহমেব হি বেদান্তঃ অহমেব হি চিন্তনঃ ।
• দেহোঽহং শুদ্ধচৈতন্যঃ অহং সংশযবর্জিতঃ ॥ ১৯॥
• অহমেব পরং জ্যোতিরহমেব পরং পদম্ ।
• অহমেবাবিনাশ্যাত্মা অহমেব পুরাতনঃ ॥ ২০॥
• অহং ব্রহ্ম ন সন্দেহঃ অহমেব হি নিষ্কলঃ ।
• অহং তুর্যো ন সন্দেহঃ অহমাত্মা ন সংশযঃ ॥ ২১॥
• অহমিত্যপি হীনোঽহমহং ভাবনবর্জিতঃ ।
• অহমেব হি ভাবান্তা অহমেব হি শোভনম্ ॥ ২২॥
• অহমেব ক্ষণাতীতঃ অহমেব হি মঙ্গলম্ ।
• অহমেবাচ্যুতানন্দঃ অহমেব নিরন্তরম্ ॥ ২৩॥
• অহমেবাপ্রমেযাত্মা অহং সংকল্পবর্জিতঃ ।
• অহং বুদ্ধঃ পরংধাম অহং বুদ্ধিবিবর্জিতঃ ॥ ২৪॥
• অহমেব সদা সত্যং অহমেব সদাসুখম্ ।
• অহমেব সদা লভ্যং অহং সুলভকারণম্ ॥ ২৫॥
• অহং সুলভবিজ্ঞানং দুর্লভো জ্ঞানিনাং সদা ।
• অহং চিন্মাত্র এবাত্মা অহমেব হি চিদ্ঘনঃ ॥ ২৬॥
• অহমেব ত্বমেবাহং ব্রহ্মৈবাহং ন সংশযঃ ।
• অহমাত্মা ন সন্দেহঃ সর্বব্যাপী ন সংশযঃ ॥ ২৭॥
• অহমাত্মা প্রিযং সত্যং সত্যং সত্যং পুনঃ পুনঃ ।
• অহমাত্মাঽজরো ব্যাপী অহমেবাত্মনো গুরুঃ ॥ ২৮॥
• অহমেবামৃতো মোক্ষো অহমেব হি নিশ্চলঃ ।
• অহমেব হি নিত্যাত্মা অহং মুক্তো ন সংশযঃ ॥ ২৯॥
• অহমেব সদা শুদ্ধঃ অহমেব হি নির্গুণঃ ।
• অহং প্রপঞ্চহীনোঽহং অহং দেহবিবর্জিতঃ ॥ ৩০॥
• অহং কামবিহীনাত্মা অহং মাযাবিবর্জিতঃ ।
• অহং দোষপ্রবৃত্তাত্মা অহং সংসারবর্জিতঃ ॥ ৩১॥
• অহং সঙ্কল্পরহিতো বিকল্পরহিতঃ শিবঃ ।
• অহমেব হি তুর্যাত্মা অহমেব হি নির্মলঃ ॥ ৩২॥
• অহমেব সদা জ্যোতিরহমেব সদা প্রভুঃ ।
• অহমেব সদা ব্রহ্ম অহমেব সদা পরঃ ॥ ৩৩॥
• অহমেব সদা জ্ঞানমহমেব সদা মৃদুঃ ।
• অহমেব হি চিত্তং চ অহং মানবিবর্জিতঃ ॥ ৩৪॥
• অহংকারশ্চ সংসারমহঙ্কারমসত্সদা ।
• অহমেব হি চিন্মাত্রং মত্তোঽন্যন্নাস্তি নাস্তি হি ॥ ৩৫॥
• অহমেব হি মে সত্যং মত্তোঽন্যন্নাস্তি কিঞ্চন ।
• মত্তোঽন্যত্তত্পদং নাস্তি মত্তোঽন্যত্ ত্বত্পদং নহি ॥ ৩৬॥
• পুণ্যমিত্যপি ন ক্বাপি পাপমিত্যপি নাস্তি হি ।
• ইদং ভেদমযং ভেদং সদসদ্ভেদমিত্যপি ॥ ৩৭॥
• নাস্তি নাস্তি ত্বযা সত্যং সত্যং সত্যং পুনঃ পুনঃ ।
• নাস্তি নাস্তি সদা নাস্তি সর্বং নাস্তীতি নিশ্চযঃ ॥ ৩৮॥
• ইদমেব পরং ব্রহ্ম অহং ব্রহ্ম ত্বমেব হি ।
• কালো ব্রহ্ম কলা ব্রহ্ম কার্যং ব্রহ্ম ক্ষণং তদা ॥ ৩৯॥
• সর্বং ব্রহ্মাপ্যহং ব্রহ্ম ব্রহ্মাস্মীতি ন সংশযঃ ।
• চিত্তং ব্রহ্ম মনো ব্রহ্ম সত্যং ব্রহ্ম সদাঽস্ম্যহম্ ॥ ৪০॥
• নির্গুণং ব্রহ্ম নিত্যং চ নিরন্তরমহং পরঃ ।
• আদ্যন্তং ব্রহ্ম এবাহং আদ্যন্তং চ নহি ক্বচিত্ ॥ ৪১॥
• অহমিত্যপি বার্তাঽপি স্মরণং ভাষণং ন চ ।
• সর্বং ব্রহ্মৈব সন্দেহস্ত্বমিত্যপি ন হি ক্বচিত্ ॥ ৪২॥
• বক্তা নাস্তি ন সন্দেহঃ এষা গীতা সুদুর্লভঃ ।
• সদ্যো মোক্ষপ্রদং হ্যেতত্ সদ্যো মুক্তিং প্রযচ্ছতি ॥ ৪৩॥
• সদ্য এব পরং ব্রহ্ম পদং প্রাপ্নোতি নিশ্চযঃ ।
• সকৃচ্ছ্রবণমাত্রেণ সদ্যো মুক্তিং প্রযচ্ছতি ॥ ৪৪॥
• এতত্তু দুর্লভং লোকে ত্রৈলোক্যেঽপি চ দুর্লভম্ ।
• অহং ব্রহ্ম ন সন্দেহ ইত্যেবং ভাবযেত্ দৃঢম্ ।
• ততঃ সর্বং পরিত্যজ্য তূষ্ণীং তিষ্ঠ যথা সুখম্ ॥ ৪৫॥

সূতঃ -

• ভুবনগগনমধ্যধ্যানযোগাঙ্গসঙ্গে
• যমনিযমবিশেষৈর্ভস্মরাগাঙ্গসঙ্গৈঃ ।
• সুখমুখভরিতাশাঃ কোশপাশাদ্বিহীনা
• হৃদি মুদিতপরাশাঃ শাংভবাঃ শংভুবচ্চ ॥ ৪৬॥

• ॥ ইতি শ্রীশিবরহস্যে শঙ্করাখ্যে ষষ্ঠাংশে ঋভুনিদাঘসংবাদে সর্বসিদ্ধান্তসংগ্রহপ্রকরণং নাম সপ্তদশোঽধ্যাযঃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com