ঋভুগীতা ৬ ॥ প্রপঞ্চস্য সচ্চিন্মযত্ব কথনম্ ॥

ঈশ্বরঃ -

• ব্রতানি মিথ্যা ভুবনানি মিথ্যা
• ভাবাদি মিথ্যা ভবনানি মিথ্যা ।
• ভযং চ মিথ্যা ভরণাদি মিথ্যা
• ভুক্তং চ মিথ্যা বহুবন্ধমিথ্যা ॥ ১॥
• বেদাশ্চ মিথ্যা বচনানি মিথ্যা
• বাক্যানি মিথ্যা বিবিধানি মিথ্যা ।
• বিত্তানি মিথ্যা বিযদাদি মিথ্যা
• বিধুশ্চ মিথ্যা বিষযাদি মিথ্যা ॥ ২॥
• গুরুশ্চ মিথ্যা গুণদোষমিথ্যা
• গুহ্যং চ মিথ্যা গণনা চ মিথ্যা ।
• গতিশ্চ মিথ্যা গমনং চ মিথ্যা
• সর্বং চ মিথ্যা গদিতং চ মিথ্যা ॥ ৩॥
• বেদশাস্ত্রপুরাণং চ কার্যং কারণমীশ্বরঃ ।
• লোকো ভূতং জনং চৈব সর্বং মিথ্যা ন সংশযঃ ॥ ৪॥
• বন্ধো মোক্ষঃ সুখং দুঃখং ধ্যানং চিত্তং সুরাসুরাঃ ।
• গৌণং মুখ্যং পরং চান্যত্ সর্বং মিথ্যা ন সংশযঃ ॥ ৫॥
• বাচা বদতি যত্কিঞ্চিত্ সর্বং মিথ্যা ন সংশযঃ ।
• সঙ্কল্পাত্ কল্প্যতে যদ্যত্ মনসা চিন্ত্যতে চ যত্ ॥ ৬॥
• বুদ্ধ্যা নিশ্চীযতে কিঞ্চিত্ চিত্তেন নীযতে ক্বচিত্ ।
• প্রপঞ্চে পঞ্চতে যদ্যত্ সর্বং মিথ্যেতি নিশ্চযঃ ॥ ৭॥
• শ্রোত্রেণ শ্রূযতে যদ্যন্নেত্রেণ চ নিরীক্ষ্যতে ।
• নেত্রং শ্রোত্রং গাত্রমেব সর্বং মিথ্যা ন সংশযঃ ॥ ৮॥
• ইদমিত্যেব নির্দিষ্টমিদমিত্যেব কল্পিতম্ ।
• যদ্যদ্বস্তু পরিজ্ঞাতং সর্বং মিথ্যা ন সংশযঃ ॥ ৯॥
• কোঽহং কিন্তদিদং সোঽহং অন্যো বাচযতে নহি ।
• যদ্যত্ সংভাব্যতে লোকে সর্বং মিথ্যেতি নিশ্চযঃ ॥ ১০॥
• সর্বাভ্যাস্যং সর্বগোপ্যং সর্বকারণবিভ্রমঃ ।
• সর্বভূতেতি বার্তা চ মিথ্যেতি চ বিনিশ্চযঃ ॥ ১১॥
• সর্বভেদপ্রভেদো বা সর্বসংকল্পবিভ্রমঃ ।
• সর্বদোষপ্রভেদশ্চ সর্বং মিথ্যা ন সংশযঃ ॥ ১২॥
• রক্ষকো বিষ্ণুরিত্যাদি ব্রহ্মসৃষ্টেস্তু কারণম্ ।
• সংহারে শিব ইত্যেবং সর্বং মিথ্যা ন সংশযঃ ॥ ১৩॥
• স্নানং জপস্তপো হোমঃ স্বাধ্যাযো দেবপূজনম্ ।
• মন্ত্রো গোত্রং চ সত্সঙ্গঃ সর্বং মিথ্যা ন সংশযঃ ॥ ১৪॥
• সর্বং মিথ্যা জগন্মিথ্যা ভূতং ভব্যং ভবত্তথা ।
• নাস্তি নাস্তি বিভাবেন সর্বং মিথ্যা ন সংশযঃ ॥ ১৫॥
• চিত্তভেদো জগদ্ভেদঃ অবিদ্যাযাশ্চ সংভবঃ ।
• অনেককোটিব্রহ্মাণ্ডাঃ সর্বং ব্রহ্মেতি নিশ্চিনু ॥ ১৬॥
• লোকত্রযেষু সদ্ভাবো গুণদোষাদিজৃংভণম্ ।
• সর্বদেশিকবার্তোক্তিঃ সর্বং ব্রহ্মেতি নিশ্চিনু ॥ ১৭॥
• উত্কৃষ্টং চ নিকৃষ্টং চ উত্তমং মধ্যমং চ তত্ ।
• ॐকারং চাপ্যকারং চ সর্বং ব্রহ্মেতি নিশ্চিনু ॥ ১৮॥
• যদ্যজ্জগতি দৃশ্যেত যদ্যজ্জগতি বীক্ষ্যতে ।
• যদ্যজ্জগতি বর্তেত সর্বং ব্রহ্মেতি নিশ্চিনু ॥ ১৯॥
• যেন কেনাক্ষরেণোক্তং যেন কেনাপি সঙ্গতম্ ।
• যেন কেনাপি নীতং তত্ সর্বং ব্রহ্মেতি নিশ্চিনু ॥ ২০॥
• যেন কেনাপি গদিতং যেন কেনাপি মোদিতম্ ।
• যেন কেনাপি চ প্রোক্তং সর্বং ব্রহ্মেতি নিশ্চিনু ॥ ২১॥
• যেন কেনাপি যদ্দত্তং যেন কেনাপি যত্ কৃতম্ ।
• যত্র কুত্র জলস্নানং সর্বং ব্রহ্মেতি নিশ্চিনু ॥ ২২॥
• যত্র যত্র শুভং কর্ম যত্র যত্র চ দুষ্কৃতম্ ।
• যদ্যত্ করোষি সত্যেন সর্বং মিথ্যেতি নিশ্চিনু ॥ ২৩॥
• ইদং সর্বমহং সর্বং সর্বং ব্রহ্মেতি নিশ্চিনু ।
• যত্ কিঞ্চিত্ প্রতিভাতং চ সর্বং মিথ্যেতি নিশ্চিনু ॥ ২৪॥

ঋভুঃ -

• পুনর্বক্ষ্যে রহস্যানাং রহস্যং পরমাদ্ভুতম্ ।
• শঙ্করেণ কুমারায প্রোক্তং কৈলাস পর্বতে ॥ ২৫॥
• তন্মাত্রং সর্বচিন্মাত্রমখণ্ডৈকরসং সদা ।
• একবর্জিতচিন্মাত্রং সর্বং চিন্মযমেব হি ॥ ২৬॥
• ইদং চ সর্বং চিন্মাত্রং সর্বং চিন্মযমেব হি ।
• আত্মাভাসং চ চিন্মাত্রং সর্বং চিন্মযমেব হি ॥ ২৭॥
• সর্বলোকং চ চিন্মাত্রং সর্বং চিন্মযমেব হি ।
• ত্বত্তা মত্তা চ চিন্মাত্রং চিন্মাত্রান্নাস্তি কিঞ্চন ॥ ২৮॥
• আকাশো ভূর্জলং বাযুরগ্নির্ব্রহ্মা হরিঃ শিবঃ ।
• যত্কিঞ্চিদন্যত্ কিঞ্চিচ্চ সর্বং চিন্মযমেব হি ॥ ২৯॥
• অখণ্ডৈকরসং সর্বং যদ্যচ্চিন্মাত্রমেব হি ।
• ভূতং ভব্যং চ চিন্মাত্রং সর্বং চিন্মযমেব হি ॥ ৩০॥
• দ্রব্যং কালশ্চ চিন্মাত্রং জ্ঞানং চিন্মযমেব চ ।
• জ্ঞেযং জ্ঞানং চ চিন্মাত্রং সর্বং চিন্মযমেব হি ॥ ৩১॥
• সংভাষণং চ চিন্মাত্রং বাক্ চ চিন্মাত্রমেব হি ।
• অসচ্চ সচ্চ চিন্মাত্রং সর্বং চিন্মযমেব হি ॥ ৩২॥
• আদিরন্তং চ চিন্মাত্রং অস্তি চেচ্চিন্মযং সদা ।
• ব্রহ্মা যদ্যপি চিন্মাত্রং বিষ্ণুশ্চিন্মাত্রমেব হি ॥ ৩৩॥
• রুদ্রোঽপি দেবাশ্চিন্মাত্রং অস্তি নরতির্যক্সুরাসুরম্ ।
• গুরুশিষ্যাদি সন্মাত্রং জ্ঞানং চিন্মাত্রমেব হি ॥ ৩৪॥
• দৃগ্দৃশ্যং চাপি চিন্মাত্রং জ্ঞাতা জ্ঞেযং ধ্রুবাধ্রুবম্ ।
• সর্বাশ্চর্যং চ চিন্মাত্রং দেহং চিন্মাত্রমেব হি ॥ ৩৫॥
• লিঙ্গং চাপি চ চিন্মাত্রং কারণং কার্যমেব চ ।
• মূর্তামূর্তং চ চিন্মাত্রং পাপপুণ্যমথাপি চ ॥ ৩৬॥
• দ্বৈতাদ্বৈতং চ চিন্মাত্রং বেদবেদান্তমেব চ ।
• দিশোঽপি বিদিশশ্চৈব চিন্মাত্রং তস্য পালকাঃ ॥ ৩৭॥
• চিন্মাত্রং ব্যবহারাদি ভূতং ভব্যং ভবত্তথা ।
• চিন্মাত্রং নামরূপং চ ভূতানি ভুবনানি চ ॥ ৩৮॥
• চিন্মাত্রং প্রাণ এবেহ চিন্মাত্রং সর্বমিন্দ্রিযম্ ।
• চিন্মাত্রং পঞ্চকোশাদি চিন্মাত্রানন্দমুচ্যতে ॥ ৩৯॥
• নিত্যানিত্যং চ চিন্মাত্রং সর্বং চিন্মাত্রমেব হি ।
• চিন্মাত্রং নাস্তি নিত্যং চ চিন্মাত্রং নাস্তি সত্যকম্ ॥ ৪০॥
• চিন্মাত্রমপি বৈরাগ্যং চিন্মাত্রকমিদং কিল ।
• আধারাদি হি চিন্মাত্রং আধেযং চ মুনীশ্বর ॥ ৪১॥
• যচ্চ যাবচ্চ চিন্মাত্রং যচ্চ যাবচ্চ দৃশ্যতে ।
• যচ্চ যাবচ্চ দূরস্থং সর্বং চিন্মাত্রমেব হি ॥ ৪২॥
• যচ্চ যাবচ্চ ভূতানি যচ্চ যাবচ্চ বক্ষ্যতে ।
• যচ্চ যাবচ্চ বেদোক্তং সর্বং চিন্মাত্রমেব হি ॥ ৪৩॥
• চিন্মাত্রং নাস্তি বন্ধং চ চিন্মাত্রং নাস্তি মোক্ষকম্ ।
• চিন্মাত্রমেব সন্মাত্রং সত্যং সত্যং শিবং স্পৃশে ॥ ৪৪॥
• সর্বং বেদত্রযপ্রোক্তং সর্বং চিন্মাত্রমেব হি ।
• শিবপ্রোক্তং কুমারায তদেতত্ কথিতং ত্বযি ।
• যঃ শৃণোতি সকৃদ্বাপি ব্রহ্মৈব ভবতি স্বযম্ ॥ ৪৫॥

সূতঃ -

• ঈশাবাস্যাদিমন্ত্রৈর্বরগগনতনোঃ ক্ষেত্রবাসার্থবাদৈঃ
• তল্লিঙ্গাগারমধ্যস্থিতসুমহদীশান লিঙ্গেষু পূজা ।
• অক্লেদ্যে চাভিষেকো ... ... ... দিগ্বাসসে বাসদানং
• নো গন্ধঘ্রাণহীনে রূপদৃশ্যাদ্বিহীনে গন্ধপুষ্পার্পণানি ॥ ৪৬॥
• স্বভাসে দীপদানং ... সর্বভক্ষে মহেশে
• নৈবেদ্যং নিত্যতৃপ্তে সকলভুবনগে প্রক্রমো বা নমস্যা ।
• কুর্যাং কেনাপি ভাবৈর্মম নিগমশিরোভাব এব প্রমাণম্ ॥ ৪৭॥
• অবিচ্ছিন্নৈশ্ছিন্নৈঃ পরিকরবরৈঃ পূজনধিযা
• ভজন্ত্যজ্ঞাস্তদ্জ্ঞাঃ বিধিবিহিতবুদ্ধ্যাগতধিযঃ ।var was তদজ্ঞাঃ
• তথাপীশং ভাবৈর্ভজতি ভজতামাত্মপদবীং
• দদাতীশো বিশ্বং ভ্রমযতি গতজ্ঞাংশ্চ কুরুতে ॥ ৪৮॥

• ॥ ইতি শ্রীশিবরহস্যে শঙ্করাখ্যে ষষ্ঠাংশে ঋভুনিদাঘসংবাদে প্রপঞ্চস্য সচ্চিন্মযত্বকথনং নাম ষষ্ঠোঽধ্যাযঃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com