Ribhu Gita - Siva Rahasya Purana Amsha 6

ঋভুগীতা ৩০ ॥ ব্রহ্মৈক-রূপত্ব নিরূপণ প্রকরণম্ ॥

ঋভুঃ -

বক্ষ্যে পরং ব্রহ্মমাত্রং জগত্সন্ত্যাগপূর্বকম্ ।
সকৃচ্ছ্রবণমাত্রেণ ব্রহ্মভাবং পরং লভেত্ ॥ ১॥
ব্রহ্ম ব্রহ্মপরং মাত্রং নির্গুণং নিত্যনির্মলম্ ।
শাশ্বতং সমমত্যন্তং ব্রহ্মণোঽন্যন্ন বিদ্যতে ॥ ২॥
অহং সত্যঃ পরানন্দঃ শুদ্ধো নিত্যো নিরঞ্জনঃ ।
সর্বং ব্রহ্ম ন সন্দেহস্তদ্ব্রহ্মাহং ন সংশযঃ ॥ ৩॥
অখণ্ডৈকরসৈবাস্মি পরিপূর্ণোঽস্মি সর্বদা ।
ব্রহ্মৈব সর্বং নান্যোঽস্তি সর্বং ব্রহ্ম ন সংশযঃ ॥ ৪॥
সর্বদা কেবলাত্মাহং সর্বং ব্রহ্মেতি নিত্যশঃ ।
আনন্দরূপমেবাহং নান্যত্ কিঞ্চিন্ন শাশ্বতম্ ॥ ৫॥
শুদ্ধানন্দস্বরূপোঽহং শুদ্ধবিজ্ঞানমাত্মনঃ ।
একাকারস্বরূপোঽহং নৈকসত্তাবিবর্জিতঃ ॥ ৬॥
অন্তরজ্ঞানশুদ্ধোঽহমহমেব পরাযণম্ ।
সর্বং ব্রহ্ম ন সন্দেহস্তদ্ব্রহ্মাহং ন সংশযঃ ॥ ৭॥
অনেকতত্ত্বহীনোঽহং একত্বং চ ন বিদ্যতে ।
সর্বং ব্রহ্ম ন সন্দেহস্তদ্ব্রহ্মাহং ন সংশযঃ ॥ ৮॥
সর্বপ্রকাররূপোঽস্মি সর্বং ইত্যপি বর্জিতঃ ।
সর্বং ব্রহ্ম ন সন্দেহস্তদ্ব্রহ্মাহং ন সংশযঃ ॥ ৯॥
নির্মলজ্ঞানরূপোঽহমহমেব ন বিদ্যতে ।
শুদ্ধব্রহ্মস্বরূপোঽহং বিশুদ্ধপদবর্জিতঃ ॥ ১০॥
নিত্যানন্দস্বরূপোঽহং জ্ঞানানন্দমহং সদা ।
সূক্ষ্মাত্ সূক্ষ্মতরোঽহং বৈ সূক্ষ্ম ইত্যাদিবর্জিতঃ ॥ ১১॥
অখণ্ডানন্দমাত্রোঽহং অখণ্ডানন্দবিগ্রহঃ ।
সদাঽমৃতস্বরূপোঽহং সদা কৈবল্যবিগ্রহঃ ॥ ১২॥
ব্রহ্মানন্দমিদং সর্বং নাস্তি নাস্তি কদাচন ।
জীবত্বধর্মহীনোঽহমীশ্বরত্ববিবর্জিতঃ ॥ ১৩॥
বেদশাস্ত্রস্বরূপোঽহং শাস্ত্রস্মরণকারণম্ ।
জগত্কারণকার্যং চ ব্রহ্মবিষ্ণুমহেশ্বরাঃ ॥ ১৪॥
বাচ্যবাচকভেদং চ স্থূলসূক্ষ্মশরীরকম্ ।
জাগ্রত্স্বপ্নসুষুপ্তাদ্যপ্রাজ্ঞতৈজসবিশ্বকাঃ ॥ ১৫॥
সর্বশাস্ত্রস্বরূপোঽহং সর্বানন্দমহং সদা ।
অতীতনামরূপার্থ অতীতঃ সর্বকল্পনাত্ ॥ ১৬॥
দ্বৈতাদ্বৈতং সুখং দুঃখং লাভালাভৌ জযাজযৌ ।
সর্বং ব্রহ্ম ন সন্দেহস্তদ্ব্রহ্মাহং ন সংশযঃ ॥ ১৭॥
সাত্ত্বিকং রাজসং ভেদং সংশযং হৃদযং ফলম্ ।
দৃক্ দৃষ্টং সর্বদ্রষ্টা চ ভূতভৌতিকদৈবতম্ ॥ ১৮॥
সর্বং ব্রহ্ম ন সন্দেহস্তদ্ব্রহ্মাহং ন সংশযঃ ।
তুর্যরূপমহং সাক্ষাত্ জ্ঞানরূপমহং সদা ॥ ১৯॥
অজ্ঞানং চৈব নাস্ত্যেব তত্কার্যং কুত্র বিদ্যতে ।
সর্বং ব্রহ্ম ন সন্দেহস্তদ্ব্রহ্মাহং ন সংশযঃ ॥ ২০॥
চিত্তবৃত্তিবিলাসং চ বুদ্ধীনামপি নাস্তি হি ।
দেহসঙ্কল্পহীনোঽহং বুদ্ধিসঙ্কল্পকল্পনা ॥ ২১॥
সর্বং ব্রহ্ম ন সন্দেহস্তদ্ব্রহ্মাহং ন সংশযঃ ।
বুদ্ধিনিশ্চযরূপোঽহং নিশ্চযং চ গলত্যহো ॥ ২২॥
অহংকারং বহুবিধং দেহোঽহমিতি ভাবনম্ ।
সর্বং ব্রহ্ম ন সন্দেহস্তদ্ব্রহ্মাহং ন সংশযঃ ॥ ২৩॥
ব্রহ্মাহমপি কাণোঽহং বধিরোঽহং পরোঽস্ম্যহম্ ।
সর্বং ব্রহ্ম ন সন্দেহস্তদ্ব্রহ্মাহং ন সংশযঃ ॥ ২৪॥
দেহোঽহমিতি তাদাত্ম্যং দেহস্য পরমাত্মনঃ ।
সর্বং ব্রহ্ম ন সন্দেহস্তদ্ব্রহ্মাহং ন সংশযঃ ॥ ২৫॥
সর্বোঽহমিতি তাদাত্ম্যং সর্বস্য পরমাত্মনঃ ।
ইতি ভাবয যত্নেন ব্রহ্মৈবাহমিতি প্রভো ॥ ২৬॥
দৃঢনিশ্চযমেবেদং সত্যং সত্যমহং পরম্ ।
দৃঢনিশ্চযমেবাত্র সদ্গুরোর্বাক্যনিশ্চযম্ ॥ ২৭॥
দৃঢনিশ্চযসাম্রাজ্যে তিষ্ঠ তিষ্ঠ সদা পরঃ ।
অহমেব পরং ব্রহ্ম আত্মানন্দপ্রকাশকঃ ॥ ২৮॥
শিবপূজা শিবশ্চাহং বিষ্ণুর্বিষ্ণুপ্রপূজনম্ ।
যদ্যত্ সংবেদ্যতে কিঞ্চিত্ যদ্যন্নিশ্চীযতে ক্বচিত্ ॥ ২৯॥
তদেব ত্বং ত্বমেবাহং ইত্যেবং নাস্তি কিঞ্চন ।
ইদং চিত্তমিদং দৃশ্যং ইত্যেবমিতি নাস্তি হি ॥ ৩০॥
সদসদ্ভাবশেষোঽপি তত্তদ্ভেদং ন বিদ্যতে ।
সুখরূপমিদং সর্বং সুখরূপমিদং ন চ ॥ ৩১॥
লক্ষভেদং সকৃদ্ভেদং সর্বভেদং ন বিদ্যতে ।
ব্রহ্মানন্দো ন সন্দেহস্তদ্ব্রহ্মাহং ন সংশযঃ ॥ ৩২॥
ব্রহ্মভেদং তুর্যভেদং জীবভেদমভেদকম্ ।
ইদমেব হি নোত্পন্নং সর্বদা নাস্তি কিঞ্চন ॥ ৩৩॥
স দেবমিতি নির্দেশো নাস্তি নাস্ত্যেব সর্বদা ।
অস্তি চেত্ কিল বক্তব্যং নাস্তি চেত্ কথমুচ্যতে ॥ ৩৪॥
পরং বিশেষমেবেতি নাস্তি কিঞ্চিত্ সদা মযি ।
চঞ্চলং মনশ্চৈব নাস্তি নাস্তি ন সংশযঃ ॥ ৩৫॥
এবমেব সদা পূর্ণো নিরীহস্তিষ্ঠ শান্তধীঃ ।
সর্বং ব্রহ্মাস্মি পূর্ণোঽস্মি এবং চ ন কদাচন ॥ ৩৬॥
আনন্দোঽহং বরিষ্ঠোঽহং ব্রহ্মাস্মীত্যপি নাস্তি হি ।
ব্রহ্মানন্দমহানন্দমাত্মানন্দমখণ্ডিতম্ ॥ ৩৭॥
ইদং পরমহন্তা চ সর্বদা নাস্তি কিঞ্চন ।
ইদং সর্বমিতি খ্যাতি আনন্দং নেতি নো ভ্রমঃ ॥ ৩৮॥
সর্বং ব্রহ্ম ন সন্দেহস্তদ্ব্রহ্মাহং ন সংশযঃ ।
লক্ষ্যলক্ষণভাবং চ দৃশ্যদর্শনদৃশ্যতা ॥ ৩৯॥
অত্যন্তাভাবমেবেতি সর্বদানুভবং মহত্ ।
সর্বং ব্রহ্ম ন সন্দেহস্তদ্ব্রহ্মাহং ন সংশযঃ ॥ ৪০॥
গুহ্যং মন্ত্রং গুণং শাস্ত্রং সত্যং শ্রোত্রং কলেবরম্ ।
মরণং জননং কার্যং কারণং পাবনং শুভম্ ॥ ৪১॥
কামক্রোধৌ লোভমোহৌ মদো মাত্সর্যমেব হি ।
দ্বৈতদোষং ভযং শোকং সর্বং নাস্ত্যেব সর্বদা ॥ ৪২॥
ইদং নাস্ত্যেব নাস্ত্যেব নাস্ত্যেব সকলং সুখম্ ।
ইদং ব্রহ্মেতি মননমহং ব্রহ্মেতি চিন্তনম্ ॥ ৪৩॥
অহং ব্রহ্মেতি মননং ত্বং ব্রহ্মত্ববিনাশনম্ ।
সত্যত্বং ব্রহ্মবিজ্ঞানং অসত্যত্বং ন বাধ্যতে ॥ ৪৪॥
এক এব পরো হ্যাত্মা একত্বশ্রান্তিবর্জিতঃ ।
সর্বং ব্রহ্ম সদা ব্রহ্ম তদ্ব্রহ্মাহং ন সংশযঃ ॥ ৪৫॥
জীবরূপা জীবভাবা জীবশব্দত্রযং ন হি ।
ঈশরূপং চেশভাবং ঈশশব্দং চ কল্পিতম্ ॥ ৪৬॥
নাক্ষরং ন চ সর্বং বা ন পদং বাচ্যবাচকম্ ।
হৃদযং মন্ত্রতন্ত্রং চ চিত্তং বুদ্ধির্ন কিঞ্চন ॥ ৪৭॥
মূঢো জ্ঞানী বিবেকী বা শুদ্ধ ইত্যপি নাস্তি হি ।
নিশ্চযং প্রণবং তারং আত্মাযং গুরুশিষ্যকম্ ॥ ৪৮॥
তূষ্ণীং তূষ্ণীং মহাতূষ্ণীং মৌনং বা মৌনভাবনম্ ।
প্রকাশনং প্রকাশং চ আত্মানাত্মবিবেচনম্ ॥ ৪৯॥
ধ্যানযোগং রাজযোগং ভোগমষ্টাঙ্গলক্ষণম্ ।
সর্বং ব্রহ্ম ন সন্দেহস্তদ্ব্রহ্মাহং ন সংশযঃ ॥ ৫০॥
অস্তিত্বভাষণং চাপি নাস্তিত্বস্য চ ভাষণম্ ।
পঞ্চাশদ্বর্ণরূপোঽহং চতুঃষষ্টিকলাত্মকঃ ॥ ৫১॥
সর্বং ব্রহ্ম ন সন্দেহস্তদ্ব্রহ্মাহং ন সংশযঃ ।
ব্রহ্মৈবাহং প্রসন্নাত্মা ব্রহ্মৈবাহং চিদব্যযঃ ॥ ৫২॥
শাস্ত্রজ্ঞানবিদূরোঽহং বেদজ্ঞানবিদূরকঃ ।
উক্তং সর্বং পরং ব্রহ্ম নাস্তি সন্দেহলেশতঃ ॥ ৫৩॥
সর্বং ব্রহ্ম ন সন্দেহস্তদ্ব্রহ্মাহং ন সংশযঃ ।
ব্রহ্মৈবাহং প্রসন্নাত্মা ব্রহ্মৈবাহং চিদব্যযঃ ॥ ৫৪॥
ইত্যেবং ব্রহ্মতন্মাত্রং তত্র তুভ্যং প্রিযং ততঃ ।
যস্তু বুদ্ধ্যেত সততং সর্বং ব্রহ্ম ন সংশযঃ ।
নিত্যং শৃণ্বন্তি যে মর্ত্যাস্তে চিন্মাত্রমযামলাঃ ॥ ৫৫॥
সন্দেহসন্দেহকরোঽর্যকাস্বকৈঃ
করাদিসন্দোহজগদ্বিকারিভিঃ ।
যো বীতমোহং ন করোতি দুর্হৃদং
বিদেহমুক্তিং শিবদৃক্প্রভাবতঃ ॥ ৫৬॥

॥ ইতি শ্রীশিবরহস্যে শঙ্করাখ্যে ষষ্ঠাংশে ঋভুনিদাঘসংবাদে ব্রহ্মৈকরূপত্বনিরূপণপ্রকরণং নাম ত্রিংশোঽধ্যাযঃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com